Aýa raıy
Astana -2 °S
Almaty -1 °S
valıýta baǵamy
USD 389.75
EUR 434.26
RUB 6.12
CNY 55.05

Qazaqstanda «Ortalyq Azııa - Koreıa Respýblıkasy» forýmy ótedi

2019 jyldyń 17 qyrkúıek 2019 09:19

NUR-SULTAN. QazAqparat – Qazaqstan Respýblıkasynyń Syrtqy ister mınıstri Beıbit Atamqulovtyń Koreıa Respýblıkasyna resmı sapary ótýde. Bul týraly QazAqparat SІM baspasóz qyzmetine silteme jasap habarlaıdy.

Qazaqstannyń syrtqy saıası vedomstvosynyń basshysy Ońtústik Koreıa basshylyǵymen birqatar kezdesýler ótkizdi, atap aıtqanda Premer-Mınıstr Lı Nak En, Ulttyq Assambleıanyń (Parlament) spıkeri Mýn Hı San, BUU eks-Bas hatshysy Pan Gı Mýn, sondaı-aq Syrtqy ister mınıstri Kan Gen Hva men Saýda, ındýstrııa jáne energetıka mınıstri Son ıÝn Momen kelissózder júrgizdi.




Kezdesýler barysynda taraptar ekijaqty yntymaqtastyq pen halyqaralyq kún tártibiniń aǵymdaǵy máselelerin, saıası, saýda-ekonomıkalyq, ınvestıtsııalyq, áleýmettik, mádenı-gýmanıtarlyq jáne ózara is-qımyldyń basqa da salalaryndaǵy qatynastardy damytý perspektıvalaryn, sondaı-aq Koreı túbegindegi jaǵdaıdy talqylady.

Koreı Úkimetiniń basshysymen kelissózder barysynda taraptar joǵary deńgeıde saıası dıalogty qoldaýdyń mańyzdylyǵyn atap ótti. «Koreıa Respýblıkasy biz úshin Azııadaǵy negizgi strategııalyq seriktesterdiń biri bolyp tabylady jáne biz saıası ózara is-qımylymyzdyń deńgeıi osy mártebege sáıkes keletinin qanaǵattanýshylyqpen atap ótemiz», - dedi B. Atamqulov.

Qazaqstan SІM basshysy koreı tarapyn eldegi mańyzdy ishki saıası úderister týraly habardar etti jáne Qazaqstan burynǵydaı Ońtústik Koreıamen ózara tıimdi qarym-qatynasty keńeıtýge jáne nyǵaıtýǵa umtylatyn bolady dep sendirdi. Jańadan saılanǵan Memleket basshysy tájirıbeli saıasatker jáne tanymal dıplomat bolyp tabylatyn Qasym-Jomart Toqaev Qazaqstan-Koreı qarym-qatynastarynyń sabaqtastyǵy men joǵary serpinin saqtaıdy.

Bıylǵy jyly Qazaqstan men Ońtústik Koreıa arasyndaǵy strategııalyq áriptestikti ornatýǵa 10 jyl tolady. Osy jyldyń sáýir aıynda bolǵan Koreıa Respýblıkasynyń Prezıdenti Mýn Chje Innyń Qazaqstanǵa memlekettik sapary osy kezeńniń mańyzdy ındıkatory boldy.

«Sizdiń elińiz Tuńǵysh Prezıdent Nursultan Nazarbaevtyń basshylyǵymen óz ekonomıkasyn yryqtandyrýda úlken tabystarǵa qol jetkizip, endi ony órkendeý kútip tur. Biz Qazaqstanmen jan-jaqty yntymaqtastyqty damytýǵa daıynbyz», - dedi Premer-Mınıstr Lı Nak En.

Ulttyq Assambleıada taraptar parlamentaralyq baılanystar máselelerin talqylap, olardy nyǵaıtý, saıası dıalogtyń joǵary deńgeıin qoldaý jáne zań shyǵarý qyzmeti salasynda tájirıbe almasý qajettiligi týraly kelisti.

Koreıa Respýblıkasy men Reseı Federatsııasy bastamashylary bolyp tabylatyn «Úlken Eýrazııa: Dıalog. Senim. Seriktestik» atty Eýrazııa elderi Parlamentteri spıkerleriniń jınalysyna daıyndyq jumystary talqylandy. Ulttyq Assambleıanyń tóraǵasy Mýn Hı San osy jyldyń 23-24 qyrkúıeginde Nur-Sultan qalasynda ótetin atalǵan jınalysqa óziniń qatysýyn taǵy da rastady. Sonymen qatar, qazaqstandyq tarap koreı tarapyna is-sharany uıymdastyrýǵa kórsetken qoldaýy úshin alǵysyn bildirdi.




BUU burynǵy Bas hatshysy Pan Gı Mýnmen kezdesý dostyq jaǵdaıda ótti. Suhbattasýshy QR Tuńǵysh Prezıdenti - Elbasy Nursultan Nazarbaevqa jyly lebizin bildirip, búkil álem syılaıtyn saıasatker retinde onyń baǵa jetpes talantyn erekshe atap ótti. Onyń pikirinshe, Elbasynyń ıadrolyq qarýdan bas tartý sheshimi adamzat tarıhyna engeni sózsiz. Koreı dıplomaty Qasym-Jomart Toqaevty prezıdenttik qyzmetke saılanýymen quttyqtap, onymen halyqaralyq bedeldi uıymda qyzmetti birge atqarǵan BUU qurylymyndaǵy Qazaqstannyń jarqyn ókilderiniń biri bolǵanyn atap ótti.

Qazaqstan SІM basshysy qazaqstandyq basshylyqtyń atynan jyly lebizin bildirip, Pan Gı Mýnǵa elimizdiń syrtqy saıası bastamalaryna kórsetken qoldaýy úshin alǵysyn bildirdi.

Qazaqstan men Ońtústik Koreıa SІM basshylarynyń kelissózderi barysynda taraptar ekijaqty jáne halyqaralyq ózekti máseleler boıynsha ustanymdardyń uqsastyǵyn atap ótti. Qazaqstan men Ońtústik Koreıa arasynda eshqandaı saıası kelispeýshilikter joq, halyqaralyq uıymdar men kópjaqty forýmdar sheńberinde syndarly ózara is-qımyl júzege asyrylýda.

Qazaqstan SІM basshysy qazaqstandyq taraptyń Koreıa Respýblıkasymen yntymaqtastyqty jan-jaqty damytýǵa erekshe mán beretinine nazar aýdardy. Taraptar aldaǵy is-sharalar kestesin, atap aıtqanda aǵymdaǵy jyldyń qazan aıynda Qazaqstanda ótetin «Ortalyq Azııa - Koreıa Respýblıkasy» forýmyna daıyndyq barysyn talqylady.

Saýda, ındýstrııa jáne energetıka mınıstri Son ıÝn Momen kezdesýde saýda-ekonomıkalyq, ınvestıtsııalyq jáne tehnologııalyq yntymaqtastyqqa nazar aýdaryldy.




Koreıa biz úshin eń basym elderdiń biri, sondaı-aq Azııadaǵy ekinshi saýda seriktesi bolyp tabylady. Taýar aınalymy men ınvestıtsııalyq yntymaqtastyqtyń belsendi ósýi ózara is-qımyldyń joǵary deńgeıin kórsetedi. 2018 jyly taýar aınalymynyń kólemi 4 mlrd AQSh doll. qurady, al 2019 jyldyń birinshi jartysynda 2,7 mlrd dollarǵa jetip, bul ótken jyldyń sáıkes kezeńiniń kórsetkishterinen eki ese artyq ekenin kórsetedi.

Koreıa tarapy elimizdegi ınvestıtsııalyq ahýaldy jetildirý saıasatymen egjeı-tegjeıli tanysyp, Qazaqstan ekonomıkasyna belsendi ınvestıtsııa salýǵa shaqyrdy. 2005 jyldan bastap 2019 jyldar aralyǵynda Koreıa QR ekonomıkasyna 5,3 mlrd. dollar saldy.

Taraptar Koreıa Respýblıkasy Prezıdentiniń Qazaqstanǵa sapary barysynda qol qoıylǵan «Jańa jel» baǵdarlamasyn iske asyrý jónindegi Jumys tobynyń qyzmeti máselelerin talqylaýǵa egjeı-tegjeıli toqtaldy. Toptyń birinshi otyrysyn qyrkúıek aıynyń sońynda Qazaqstan astanasynda ótkizý josparlanyp otyr, ony úılestirýdi Qazaqstan tarapynan Indýstrııa jáne ınfraqurylymdyq damý mınıstrligi, al koreı tarapynan - Saýda, ındýstrııa jáne energetıka mınıstrligi júrgizedi.

Sonymen qatar, Qazaqstan SІM basshysy Ońtústik Koreıanyń iri bıznes ókilderimen, atap aıtqanda «Kolon», «Samsung Electronics», «Doosan Heavy Industry», «Hyosung Corporation Group» jáne «Hyundai Heavy Industries» atty kompanııalardyń basshylyǵymen birqatar kezdesýler ótkizdi. Koreı kásipkerleri mashına jasaý, aqparattyq-kommýnıkatsııalyq tehnologııalar jáne munaı hımııasy salalaryndaǵy ınvestıtsııalyq yntymaqtastyqtyń joǵary áleýetin atap ótti.








Joǵary qaraı