Aýa raıy
Astana -25 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda shylym shegýge tyıym salynǵan oryndar tizimi keńeıtildi

2020 jyldyń 6 tamyz 2020 10:25

NUR-SULTAN. QazAqparat – Qazaqstanda temeki shegýge tyıym salynǵan oryndar tizimi keńeıtildi, dep habarlaıdy QazAqparat Habar24kz saıtyna silteme jasap.

Saıttyń jazýynsha, jabyq avtobýs aıaldamalarynda, balalar alańdarynda, metroda jáne jerasty ótkelderinde elektrondy temeki, kalıan jáne temeki ónimderiniń barlyq túrlerin shegýge tyıym salynady.

«Bizdiń jastar kalıandy mekemelerde qoldanady. Endi olarǵa tolyqtaı tyıym salyndy. Dámhanalarda, qoǵamdyq oryndarda, jazǵy kafelerde shege almaıdy, ony tek úıde ǵana tutynýǵa bolady», - dedi Alkogol jáne temeki ónimderin satý qaýymdastyǵynyń atqarýshy dırektory Temirlan Jaqypbekov.

Buǵan deıin habarlanǵandaı, endi temekini jáne kalıanǵa arnalǵan túrli qospalardy 21 jastan bastap qana satyp alýǵa bolady. Satýshylar satyp alýshylardan jeke kýálikterin talap etýi kerek.

Taǵy bir jańalyq – temeki men kalıan qospalary dúken sórelerinde bolmaıdy. Bul ereje kelesi jyldan bastap kúshine enedi.

Kalıanǵa qarsy shekteýlerge qaramastan, tek shilde aıynyń ózinde elordalyq polıtsııa 20 zańbuzýshylyqty tirkedi. Quqyq qorǵaý organdarynyń qyzmetkerleri kún saıyn reıdter ótkizedi.

Kalıan men temekini ruqsat etilmegen jerde shekkeni úshin aıyppul salynýy múmkin. Aıyppul mólsheri eki esege artyp, 42 myń teńgeni quraıdy.


Basty sózder: Qoǵam, Zań,
Joǵary qaraı