Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda soǵys ardagerlerine 1 mln teńgeden berildi

2021 jyldyń 6 mamyr 2021 14:28

NUR-SULTAN. QazAqparat – Bıylǵy 1 mamyrdaǵy jaǵdaı boıynsha Qazaqstanda Ekinshi dúnıejúzilik soǵysta bolǵan 665 ardager bar. Bul týraly QR Eńbek jáne halyqty áleýmettik qorǵaý vıtse-mınıstri Erlan Áýkenov málim etti, dep habarlaıdy QazAqparat tilshisi.

Onyń aıtýynsha, jyl saıyn birjolǵy materıaldyq kómek tóleý dástúrge aınaldy. Sonymen, Táýelsizdiktiń 30 jyldyǵy jáne Jeńis kúni qarsańynda jergilikti atqarýshy organdar UOS qatysýshylary men múgedekterine jáne Ekinshi dúnıejúzilik soǵysy jeńisine úles qosqan azamattardyń basqa da sanattaryna tólemderdi júzege asyrý úshin 6,4 mlrd teńge qarastyryldy.

«Eńbek mınıstrligi oblystar men respýblıkalyq mańyzy bar qalalardyń ákimdikterine jeńiske úles qosqan azamattardyń joǵaryda atalǵan barlyq sanattary úshin materıaldyq kómektiń eń tómengi kepildendirilgen shegin belgileýdi usyndy. Nátıjesinde, barlyq óńirlerde UOS qatysýshylary men múgedekterine 1 mln teńge kóleminde birjolǵy materıaldyq kómek kórsetildi. Qorshaýdaǵy Lenıngrad turǵyndary men kontslagerlerdiń burynǵy kámeletke tolmaǵan tutqyndaryna keminde 50 myń teńge, Ekinshi dúnıejúzilik soǵysta qaıtys bolǵan múgedekterdiń áıelderine, soǵysta qaza tapqan jaýyngerlerdiń jesirlerine jáne UOS jyldary tyl eńbekkerlerine – keminde 30 myń teńge berildi», – dep habarlady Erlan Áýkenov ortalyq kommýnıkatsııalar qyzmetinde.

Vıtse-mınıstrdiń sózine qaraǵanda, 14 óńirde atalǵan tólemder jasaldy, al qalǵan óńirlerde 9 mamyrǵa deıin aıaqtalady. Sondaı-aq, Jeńistiń 76 jyldyǵyn merekeleý qurmetine ardagerlerge estelik syılyqtar tabys etiledi.


Joǵary qaraı