Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstanda úzdik aýyl ákimi anyqtaldy

2021 jyldyń 19 qazan 2021 17:11

NUR-SULTAN. QazAqparat - Bul týraly QR Memlekettik qyzmet isteri agenttiginiń baspasóz hatshysy Erhan Tatken óziniń Facebook paraqshasynda málim etti, dep habarlaıdy QazAqparat.

«Memleket basshysy Qasym-Jomart Toqaev 2020 jylǵy 1 qyrkúıektegi Qazaqstan halqyna Joldaýynda aýyl ákimderiniń tikeleı saılaýyn ótkizýdiń mańyzdylyǵyn atap ótken bolatyn.

Osy oraıda, «Úzdik aýyl ákimi» konkýrsynyń mańyzy men ózektiligi arta tústi.

Óıtkeni konkýrstyń negizgi maqsaty – jumysta joǵary nátıjelerge qol jetkizgen, aýyldyq eldi mekenderdiń damýyna eleýli úles qosqan, sondaı-aq halyqpen belsendi ashyq jumys júrgizetin úzdik aýyl ákimderin anyqtaý jáne yntalandyrý.

Bıyl «Rýhanı jańǵyrý» baǵdarlamasy aıasynda Memlekettik qyzmet isteri agenttigi ekinshi márte uıymdastyrǵan konkýrs 15 qazanda aıaqtaldy.

Konkýrsqa qatysý úshin elimizdiń on tórt oblysynan júzden astam aýyldyq okrýg ákimderi ótinim bergen.

Oblystardyń arasynda Túrkistan oblysynan – 21 ákim, Batys Qazaqstan oblysynan – 15 ákim jáne Jambyl oblysynan – 14 ákim konkýrsqa ótinim berip, belsendilik tanytty.

Alaıda, úzdik atanýǵa at salysqan úmitkerler arasynda Batys Qazaqstan oblysy Tasqala aýdany Shejin aýyldyq okrýginiń ákimi Alǵadaı Jambyl óńirlik jáne respýblıkalyq deńgeılerde eń kóp ball jınap, kózge tústi.

Alǵadaı Jambyl osy aýdanda týyp ósken, mamandyǵy - muǵalim.

Qyzmettik jolyn Tasqala aýdanynda bastaǵan ol 2019 jyly memlekettik qyzmetke ornalasqan.

Konkýrstyń respýblıkalyq kezeńinde ol et jáne sút ónimderin qaıta óńdeý jáne aýyl sharýashylyǵy kooperatıvterin júzege asyrý arqyly qosymsha jumys oryndaryn qurýǵa baǵyttalǵan jobasyn qorǵady.

Budan bólek, ekinshi oryndy Jambyl oblysy Jambyl aýdany Polatqosshy aýyldyq okrýginiń ákimi Erjan Danaev jáne Túrkistan oblysy Tólebı aýdany Joǵarǵy Aqsý aýyldyq okrýginiń ákimi Abdıkadır Sıkımbaev bólisse, úshinshi oryndy Pavlodar oblysy Jelezın aýdany Bashmachın aýyldyq okrýginiń ákimi Merýert Madagýlova men Almaty oblysy Panfılov aýdany Aıdarly aýyldyq okrýginiń ákimi Aıdar Isaev ózara bólisti.

Sondaı-aq, Qaraǵandy oblysy Aqtoǵaı aýdany Tasaral aýyldyq okrýginiń ákimi Nýrjan Seıtov – «Úzdik sharýashyl ákim», Aqmola oblysy Stepnogorsk qalasy Aqsý kentiniń ákimi Marat Smaǵulov – «Ashyq ákim», Qyzylorda oblysy Jalaǵash aýdany Aqsý aýyldyq okrýginiń ákimi Qanat Nıetqulov – «Úzdik áleýmettik joba» nomınatsııalarynyń ıegerleri atandy»- dep jazdy Agenttiktiń baspasóz hatshysy Erhan Tatken.

Konkýrs jeńimpazy «Úzdik aýyl ákimi» statýetkasymen, sondaı-aq ár túrli nomınatsııa ıegerleri Memlekettik qyzmet isteri agenttigi tóraǵasynyń qurmet gramotalarymen marapattalady.


Joǵary qaraı