Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstanda zeınetaqy men memlekettik járdemaqylardyń mólsheri ósti

2022 jyldyń 5 qańtar 2022 14:59

NUR-SULTAN. QazAqparat - Qazaqstanda 2022 jylǵy 1 qańtardan bastap jasyna baılanysty zeınetaqy mólsheri 7% - ǵa, bazalyq zeınetaqy men memlekettik járdemaqy mólsheri 5% - ǵa ulǵaıdy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

«2022-2024 jyldarǵa arnalǵan respýblıkalyq bıýdjet týraly» Zańǵa sáıkes 2022 jylǵy 1 qańtardan bastap jasyna baılanysty jáne eńbek sińirgen jyldary úshin zeınetaqy tólemderiniń mólsheri 7% - ǵa, ıaǵnı ınflıatsııa deńgeıinen 2% - ǵa ilgerilep arttyryldy. Bul rette jasy boıynsha eń tómengi zeınetaqy mólsheri 46 302 teńgeni qurady.

Bazalyq zeınetaqy tóleminiń mólsheri 5% - ǵa arttyryldy. 2022 jylǵy 1 qańtardan bastap onyń eń tómengi mólsheri 19 450 teńgeni quraıdy.

Nátıjesinde bazalyq zeınetaqy tólemin eskere otyryp, eń tómengi zeınetaqy mólsheri 1 qańtardan bastap 65 752 teńgeni quraıdy.

Bul ósim 2,2 mln zeınetkerge qatysty.

Budan basqa, 2022 jylǵy 1 qańtardan bastap eń tómengi kúnkóris deńgeıi shamasynyń ózgerýine baılanysty járdemaqylardyń mynadaı túrleri 5% - ǵa arttyryldy:

- múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylar;

- múgedektigi bar balalardy tárbıelep otyrǵan ata-analarǵa, qamqorshylarǵa beriletin memlekettik járdemaqy;

- I toptaǵy múgedekke kútim jasaıtyn otbasylarǵa (adamdarǵa) beriletin memlekettik járdemaqy;

Aılyq eseptik kórsetkish mólsheriniń ulǵaıýyna baılanysty 1 qańtardan bastap kelesi járdemaqylardyń mólsheri 5% - ǵa artty:

- №1 jáne №2 tizimder boıynsha memlekettik arnaıy járdemaqylar;

- bala bir jasqa tolǵanǵa deıin onyń kútimine baılanysty memlekettik járdemaqylar;

- bala týǵanda beriletin birjolǵy memlekettik járdemaqy;

- arnaıy memlekettik járdemaqylar;

- «Altyn alqa», «Kúmis alqa» alqalarymen marapattalǵan nemese buryn «Batyr Ana» ataǵyn alǵan jáne «Ana dańqy» ordenimen marapattalǵan kópbalaly analarǵa arnaıy memlekettik járdemaqylar;

- birge turatyn tórt jáne odan da kóp kámeletke tolmaǵan balalary, onyń ishinde kámelettik jasqa tolǵannan keıin bilim berý uıymdaryn bitiretin ýaqytqa deıin (biraq jıyrma úsh jasqa tolǵanǵa deıin) orta, tehnıkalyq jáne kásiptik, orta bilimnen keıingi, joǵary jáne (nemese) joǵary oqý ornynan keıingi bilim berý uıymdarynda kúndizgi oqý nysany boıynsha oqıtyn balalary bar kópbalaly otbasylarǵa beriletin memlekettik járdemaqylar;

- Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattarǵa jáne jappaı saıası qýǵyn-súrgin qurbandaryna taǵaıyndalǵan, biraq tólenbegen birjolǵy aqshalaı ótemaqylar.

«Mindetti áleýmettik saqtandyrý týraly» Zańǵa sáıkes MÁSQ-dan eńbek etý qabiletinen aırylý jáne asyraýshysynan aırylý jaǵdaılaryna tólenetin áleýmettik tólemderdiń mólsheri de 5% - ǵa arttyryldy.


Joǵary qaraı