Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandaǵy áleýmettik saýalnama: Respondentterdiń 58,5% koronavırýs vaktsınasyn qoldaǵan

2021 jyldyń 5 qazan 2021 21:52

ALMATY. QazAqparat - Bıyl tamyz aıynda elimizde koronavırýs pandemııasymen kúres boıynsha «El úshin egilemin» azamattyq shtaby qurylǵan bolatyn. Shtabtyń maqsaty, qyzmeti, jospary jaıynda QazAqparat tilshisine Qazaqstan zańgerler odaǵynyń Nur-Sultan qalalyq fılıalynyń tóraǵasy, azamattyq shtabtyń belsendisi Serik Berkamalov aıtyp berdi, dep habarlaıdy QazAqparat tilshisi.

«Shtabtyń maqsaty – COVID-19- ǵa qatysty barynsha shynaıy aqparat taratyp, azamattardy vaktsına alýǵa úgitteý.

Uıymdastyrýshlar elimizdi qalypty, kovıdke deıingi ómirge qaıtarýdy maqsat etip otyr. Al, bul ujymdyq ımmýnıtetti qalyptastyryp, halyqtyń 70-80 paıyzyn egý arqyly múmkin bolmaq»,- deıdi Serik Berkamalov.

Onyń aıtýynsha, vaktsınatsııa týraly halyqqa shynaıy aqparat taratýǵa qol ushyn bermek belsendiler arasynda Vıacheslav Lokshın, Jibek Joldasova, Rafaıl Rozenson, Dınara Sátjan, Rahym Oshaqbaev, Ásel Qaraýlova, Saıda Táýkeleva, Maıra Izmaılova, sondaı-aq, belgili medıtsına mamandary, kásipkerler, qoǵam belsendileri men qoǵam qaıratkerleri, sarapshylar bar.

«Bastamashyl topqa 200-den astam joǵary kásibı maman kirdi. Olar óz bilimderin, kásibı tájirıbelerin jáne basqa da resýrstaryn eldi vaktsınaǵa qatysty haostan shyǵarý úshin jumsaýǵa daıyn»,- dep atap ótti spıker.

Serik Berkamalov azamattyq shtabtyń «qarsymyn jáne qarsy emespin» táýelsiz áleýmettik saýalnamasynyń nátıjesi jaıly aıtyp berdi.

«Saýalnamaǵa Qazaqstannyń barlyq óńirleri men respýblıkalyq mańyzy bar qalalarynan 18 jáne odan joǵary jastaǵy 2 559 respondent qatysty. Qatysqandardyń 11,9% jalpy ekpelerge qarsy bolsa, COVID-19-ǵa qarsy vaktsınaǵa 24,2% qarsy.

Suralǵandardyń 69,9% jalpy ekpelerdi, al 58,5% COVID-19-ǵa qarsy vaktsınany qoldaıdy.

Jalpy vaktsınatsııaǵa respondentterdiń 18,5%, al COVID-19-ǵa qarsy ekpege 17,4% beıtarap pikir bildirdi.

Óńirler boıynsha aıtar bolsaq, COVID-19-ǵa qarsy vaktsınaǵa qarsylyq tanytqandar sany boıynsha Soltústik Qazaqstan (46%), Atyraý oblysy (37,8%) jáne Almaty oblysy (35,2 %) alda.

Koronavırýsqa qarsy vaktsınaǵa beıtarap pikir bildirgen óńirler - Túrkistan oblysy (7,1%), Batys Qazaqstan oblysy (10,8 %) jáne Jambyl oblysy (11,8%). Túrkistan oblysy vaktsınatsııa boıynsha kósh bastap, koronavırýs ınfektsııasyna qatysty «jasyl» aımaqqa aýysqanyn bildiredi»,- dedi zańger.

Saýalnamanyń nátıjesi boıynsha koronavırsqa qarsy vaktsınany Qazaqstan halqynyń basym bóligi qoldaıdy jáne vaktsınany qaýipsiz sanaıdy. Respondentterdiń tek 2% vaktsınanyń densaýlyqqa uzaq janama áseri baryn atap ótken.

«Shtabtyń aldaǵy jospary - COVID-19- ǵa qatysty barynsha shynaıy aqparat taratyp, azamattardy vaktsına alýǵa úgitteýdi jalǵastyrý. COVID-19-ǵa qarsy vaktsınaǵa senimi tómen aımaqtarda aqparattyq jumysty qalypqa keltirý. Nysanaly toptarmen naqty jumys júrgizý qajet. Jappaı úgitteýmen qatar, jańa tásilderdi, áleýmettik jelilerdi paıdalaný qajet. Sondaı-aq, QazVac otandyq vaktsınasyn nasıhattaý - azamattyq shtabtyń josparyna kiredi»,- dep sózin qorytyndylady Serik Berkamalov.


Joǵary qaraı