Aýa raıy
Astana -20 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandaǵy eki jańa qoryq UNESCO tizimine qosylýy múmkin

2020 jyldyń 29 qazan 2020 19:15

NUR-SULTAN. QazAqparat - UNESCO-nyń Qazaqstandaǵy «Adam jáne bıosfera» baǵdarlamasynyń ulttyq rezervattar jelisi eki jańa rezervatpen tolyqty, dep habarlaıy QazAqparat tilshisi.

Ekologııa, geologııa jáne tabıǵı resýrstar mınıstrligi baspasóz qyzmetiniń málimetinshe, UNESCO-nyń «Adam jáne bıosfera» baǵdarlamasynyń (MAV) Halyqaralyq úılestirý keńesiniń 32-shi sessııasynyń otyrysy 2020 jyldyń 27 jáne 28 qazanynda vırtýaldy formatta ótti.

Kezdesýdi ótkizýdiń tańdalǵan formaty COVID-19 pandemııasyna baılanysty jáne kezdesýge qatysýshylardyń qaýipsizdigin qamtamasyz etý maqsatynda túrli elderden tańdaldy.

Sessııaǵa Qazaqstan atynan UNESCO-nyń «Adam jáne bıosfera» baǵdarlamasynyń Qazaqstandyq ulttyq komıtetiniń (MAV) músheleri Roman ıAenko men Vıktorııa Ilına, sondaı-aq Qazaqstan Respýblıkasynyń Frantsýz Respýblıkasyndaǵy Elshiliginiń qyzmetkeri Álııa Baısabaeva qatysty.

«Atalmysh baǵdarlamanyń Qazaqstandyq ulttyq komıteti karantın rejımine baılanysty barlyq qıyndyqqa qaramastan, UNESCO-nyń Dúnıejúzilik bıosferalyq rezervattar jelisine qosý úshin 2 nomınatsııalyq dereknama daıyndady. Komıtet músheleri Almaty jáne Batys Altaı memlekettik tabıǵı qoryqtary ákimshiligi qyzmetkerleriniń úılesimdi jumysynyń arqasynda Qazaqstandaǵy UNESCO-nyń «Adam jáne bıosfera» baǵdarlamasynyń bıosferalyq rezervattarynyń ulttyq jelisi eki jańa bıosferalyq rezervatpen tolyqtyryldy», delingen habarlamada.

Halyqaralyq deńgeıde arnaıy saraptamalyq keńes qazaqstandyq komıtet usynǵan qujattamanyń «Adam jáne bıosfera» baǵdarlamasynyń talaptaryna sáıkestigine baǵa berip, UNESCO-nyń Dúnıejúzilik bıosferalyq rezervattar jelisiniń bıosferalyq rezervattary retinde Almaty jáne Batys Altaı memlekettik tabıǵı qoryqtaryn maquldaý múmkindigi týraly sheshim qabyldady.

«Búgingi tańda UNESCO-nyń «Adam jáne bıosfera» baǵdarlamasynyń bıosferalyq rezervattarynyń Qazaqstandaǵy ulttyq jelisinde 12 rezervat tirkelgen. Bul Ortalyq Azııanyń basqa elderindegi bıosferalyq rezervattar sanynan edáýir asyp túsedi. Osynshama bıosferalyq rezervattyń tanylýy Qazaqstannyń bıologııalyq ártúrliligin saqtaý máselelerine álemdik qoǵamdastyqtyń nazaryn aýdaratynyn jáne ony bolashaq urpaq úshin saqtaýǵa umtylatynyn aıǵaqtaıdy», delingen habarlamada.

Dúnıejúzilik bıosferalyq rezervattar jelisine ártúrli elderdiń aýmaǵynda ornalasqan 24 bıosferalyq rezervat qosyldy. Sonyń biri transshekaralyq qoryq. Qazir Dúnıejúzilik rezervattar jelisine álemniń 129 eliniń aýmaǵynda ornalasqan 714 rezervat kiredi.

UNESCO baǵdarlamasy boıynsha jumys isteıtin ulttyq komıtettiń qyzmeti týraly tolyǵyraq mekemeniń saıtynan bilýge bolady.


Joǵary qaraı