Aýa raıy
Astana 0 °S
Almaty 7 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandaǵy qos Aqtaýdyń basshylary kezdesti

2020 jyldyń 26 qyrkúıek 2020 17:59

AQTAÝ. QazAqparat - Elimizde attas eki Aqtaý bar. Biri - Kaspıı̆ jaǵalaýynda ornalassa, ekinshisi - Saryarqanyń tósinde jaı̆ǵasqan. Batystaǵy Aqtaý - Mańǵystaý oblysynyń ortalyǵy, ekinshi Aqtaý - Qaraǵandy oblysyndaǵy shaǵyn kent, dep habarlaıdy QazAqparat tilshisi.

Búgin Mańǵystaý oblysynyń ortalyǵy Aqtaýdyń 57 jyldyǵyna oraı, shahar basshysy Nurdáýlet Igilikulynyń shaqyrtýymen Qaraǵandy oblysynan Aqtaý kentiniń ákimi Altynbek Esmurzaev bastaǵan arnaıy delegatsııa keldi. Qos Aqtaýdyń basshylary men delegatsııa ókilderi qala kúnine oraı oblys ortalyǵynda ashylǵan «Geologtar alleıasynyń» tusaýkerine qatysty. Sondaı-aq, sharada ardager geolog-barlaýshylar, Qazaqstan munaıshy-geologtar qoǵamynyń prezıdenti Baltabek Qýandyqov boldy.

Joba avtory qurmetti geolog, ardager Bısenbaı Bısenǵalıev. On ekinshi shaǵyn aýdanda ornalasqan alleıany salýǵa óńirdegi munaı kompanııalary qarjylaı demeýshilik jasaǵan. Qurylys jumystaryna 15 mıllıon teńge jumsaldy.





«Arhıtektýralyq nysanda burǵylaý, munaı alý qondyrǵysy, geologtardyń atrıbýty: balǵa men tabylǵan tas kompozıtsııasy beınelendi. Mańǵystaýda ashylǵan ken-oryndarynyń tizimi men ataqty geolog-barlaýshylardyń esimderi jazyldy. Geologtar men munaıshylar eńbeginiń tek Mańǵystaý oblysynda ǵana emes, tutastaı respýblıkamyzdyń ekonomıkalyq salasyndaǵy erekshe róli men mańyzdylyǵyn atap aıtýǵa tıistimiz. Búgin osy ardaqty mamandyq ıeleriniń qurmetine ashylǵan alleıa aldaǵy ýaqytta qala turǵyndarynyń súıikti demalys oryndarynyń birine aınalady dep oılaımyn», - dedi Mańǵystaý óńirlik geologııa ınspektsııasynyń basshysy Almagúl Kelbet.





Sondaı-aq, qala kúni qarsańynda «Qurylysshylar alleıasynyń» irge tasyn qalaý rásimi ótti. Aqtaýdy kórkeıtý, abattandyrý maqsatynda aldaǵy ýaqytta on ekinshi shaǵyn aýdanda jańa alleıany ashý josparlanǵan.

Delegatsııa músheleri Mańǵystaýdaǵy Ábish Kekilbaev atyndaǵy mýzeıge bardy.

Qala qonaqtary mańǵaz Mańǵystaýdyń keremetterin tamashalap, abyz jazýshy atyndaǵy ortalyqqa Saryarqa kitaphanasynyń jınaǵy «Saryarqanyń aqyndarynyń óleńderi» atty 100 tomdyq pen «Elbasyna tuǵyr bolǵan Saryarqa» kitabyn syıǵa tartty.

«Búgin erekshe kún. Qala ákimi Nurdáýlet Igilikulynyń shaqyrtýymen Mańǵystaýdyń ortalyǵyna keldik. Delegatsııa quramynda metallýrg, Tuńǵysh Prezıdent – Elbasy Nursultan Nazarbaevpen birge oqyp, Temirtaýdaǵy kombınatta jumys istegen zamandastary Kýanysh Omashev pen Toqtarhan Isqaqov bar. Bul ıgi bastama kópshilikke úlgi bolady degen senimdemin. Óıtkeni, elimizde qalalar baılanysynyń damýy birneshe salanyń tamyryna qan júgirtedi. Bir jaǵynan jastarǵa úlgi bolady degen senimdemin. Qaraǵandy oblysyndaǵy Aqtaý kentinde kezinde 40 myńǵa jýyq halyq turdy. Qazir turǵyndar sany 7 myńǵa jýyqtaıdy», - dedi Aqtaý kentiniń ákimi Altynbek Esmurzaev.





Shara aıasynda qos Aqtaýdyń basshylary ózara yntymaqtastyqty damytý maqsatynda memorandýmǵa qol qoıdy.

«Búgin eki óńirdiń arasynda saýda jáne ekonomıkalyq qatynastardy jandandyrý, bilim, mádenıet, densaýlyq salasynda ortaq jobalardy iske asyrý maqsatynda memorandýmǵa qol qoıdyq. Aldaǵy ýaqytta tyǵyz áriptestik qarym-qatynasta bolamyz degen úmittemin», - dep atap ótti qol qoıý rásiminde Aqtaý qalasynyń ákimi Nurdáýlet Qılybaı.


Joǵary qaraı