Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyq JOO-larda 300-den astam jańa bilim berý baǵdarlamasy engizildi

2021 jyldyń 13 qazan 2021 15:58

NUR-SULTAN. QazAqparat – Bıylǵy oqý jylynyń basynan beri qazaqstandyq joǵary oqý oryndarynda 300-den astam jańa bilim berý baǵdarlamasy engizildi, dep habarlaıdy QazAqparat QR Bilim jáne ǵylym mıınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, atalmysh baǵdarlamalar eńbek naryǵyndaǵy zamanaýı suranystar men jumys berýshilerdiń mamandarǵa qoıatyn talaptaryna sáıkes beıimdelip, ázirlengen.

Jańa oqý baǵdarlamalary boıynsha bolashaq ınjenerlerdi, qurylysshylar men pedagogterdi, menedjerlerdi, ekonomıster men zańgerlerdi jáne basqa da mamandardy oqytady. Máselen, «ıAdrolyq medıtsına», «Smart City tehnologııalary», «Matematıkalyq ekonomıka, statıstıka jáne derekterdi taldaý», «Bilim berýdegi fızıka», «Ǵylymı tarıh», «New media», «Taý-ken isindegi 3D modeldeý ınjeneri», «Nanomaterıaldar jáne nanotehnologııalar» men basqa da jańa baǵdarlamalar boıynsha.

Budan basqa, IT-mamandarǵa degen suranystyń artýyna baılanysty aqparattyq-kommýnıkatsııalyq tehnologııalar (AKT) salasynda da jańa bilim berý baǵdarlamalary engizildi. Jańa oqý jylynan bastap ýnıversıtetter «Big Data Analysis» (aýqymdy derekterdi taldaý), «Jasandy ıntellekt tehnologııasy», «Krıptologııa», «IT-quqyq», «Digital Engineering», «Robototehnıkalyq júıeler», «Data Science», «Kıberfızıkalyq júıeler», «Robottandyrylǵan pılotsyz ushý apparattary», «IT-menedjment», «Tsıfrlyq ekonomıka» sııaqty baǵdarlamalar boıynsha myńdaǵan bolashaq baǵdarlamashylardy oqytady.

Aıta keteıik, 2021 jyly AKT salasyndaǵy mamandardy daıarlaýǵa 10 myńǵa jýyq grant bólindi, bul 2018 jylmen salystyrǵanda eki ese kóp.

«Sońǵy jyldary Qazaqstannyń eńbek naryǵynda IT-mamandarǵa suranystyń kúrt ósýi baıqalady. Búgingi tańda aqparattyq tehnologııalar ómirdiń barlyq salasyna engizilgen. Joǵary oqý oryndary mamandarǵa qoıylatyn qazirgi talaptarǵa sáıkes keletin bilim berý baǵdarlamalaryn ázirledi. Bilim berý baǵdarlamalaryn engizý barysynda joǵary oqý oryndary jumys berýshilerdiń pikirleri men suranystaryn eskerdi. Mysaly, jumys berýshiler aqparattyq júıelerdi qorǵaý boıynsha kadrlar daıarlaý qajettiligi týraly habarlady. Jańa baǵdarlamalardyń basty artyqshylyǵy — olar eńbek naryǵynda qajet praktıkalyq bilim alýǵa baǵyttalǵan. IT baǵyty boıynsha kóp jańa baǵdarlama bar. Máselen, IT-quqyq, IT-medıtsına», — dedi QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

Sonymen qatar JOO-lar IT-kompanııalarmen — bolashaq jumys berýshilerimen yntymaqtastyq ornatýda. Dýaldi oqytý belsendi túrde engizilip jatyr, stýdentter oqý ýaqytynyń 40%-yn kásiporyndarda ótkizedi. Óz kezeginde stýdentter jańa bilim berý baǵdarlamalaryna oń baǵa berip, olardy ázirleý kezinde praktıkalyq bilimge basa nazar aýdarylǵanyn atap ótti.

Aıta keteıik, barlyq jańa bilim berý baǵdarlamasy joǵary jáne joǵary oqý ornynan keıingi bilim berý baǵdarlamalarynyń tizilimine engizilgen.

Esterińizge sala keteıik, buǵan deıin QR BǴM qazaqstandyq joǵary oqý oryndarynyń bilim berý qyzmetine qoıylatyn talaptardy ózgertken bolatyn. Jańashyldyqtar mamandyqtarǵa baılanysty engizilip, joǵary bilimniń tájirıbege baǵyttalýyn kúsheıtýge baǵyttalǵan. Joǵary oqý oryndary jumysqa tájirıbeli mamandardy tartýǵa múmkindik aldy.


Joǵary qaraı