Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyqtar Sırııadan elge qalaı qaıtaryldy

2021 jyldyń 13 shilde 2021 21:16

NUR-SULTAN. QazAqparat – QR UQK daıyndaǵan «Jýsan» gýmanıtarlyq arnaıy operatsııasy aıasynda júrgizilgen aýqymdy jumystar týraly baıandaıtyn «Raqymdy uıǵarym» atty derekti fılmniń tusaýy kesildi, dep habarlaıdy QazAqparat.

Derekti fılmde ulttyq qaýipsizdik organdarynyń jedel qyzmetkeri alǵash ret qarýly qaqtyǵys aımaǵynda bolý jaǵdaılaryn, arnaıy operatsııanyń daıyndyq protsesin ashady. Qazaqstandyq azamattardy Sırııadan qaıtarý boıynsha biregeı operatsııany júrgizýge tartylǵan memlekettik organdardyń kúshteri men quraldary týraly áńgimeleıdi.

Fılm basynda qazaqstandyqtardyń arasynda «Jýsan» operatsııasy týraly ne bilesiz degen saýalnama júrgizilgen.


«Basqa, teris dinı aǵymdardyń izinde ketken qazaqstandyqtardy qaıtarý jolynda qolǵa alynǵan «Jýsan» operatsııasyn durys bastama dep oılaımyn. Óz basym olardyń elge qaıta oralǵanyna qýanyshtymyn», - deıdi saýalǵa jaýap bergen otandasymyz.

Atalǵan operatsııanyń alǵashqy kezeńinde 47 adam elge oraldy. Onyń ishinde 30 bala, 6 er adam jáne 11 áıel bar. Ekinshi kezeńde 231 otandasymyz Qazaqstanǵa aman-saý oralǵan, atap aıtqanda, 156 bala (18 jetim bala), 16 er adam jáne 59 áıel. Úshinshi kezeńde 246 qazaqstandyq otanǵa oraldy. Naqtylaı tússek, 171 bala (9 jetim bala), 8 er adam jáne 67 áıel adam bar. Al operatsııanyń tórtinshi kezeńiniń nátıjesinde 71 adam, ıaǵnı 49 bala (5 jetim bala), 3 er adam jáne 19 áıel týǵan jerge oraldy. Jáne besinshi kezeńde 12 qazaqstandyq bar, onyń qatarynda 7 bala (2 jetim bala), 4 er adam jáne 1 áıelge elge qaıtaryldy.

Opertsııa nátıjesinde jalpy jıyny 607 adam otanyna aman-saý oraldy. Olardyń qatarynda, 413 bala (34 jetim bala), 37 er adam jáne 157 áıel bar.

«Bizge Elbasy Nursultan Nazarbaev óz kelisimin berip, qoldady. Opertsııa barysynda kóptegen qıyndyqtarǵa tap boldyq. Otandastyrymyzdy Sırııadan tabý, olardy elge ákelý, ushaqqa otyrǵyzý osynyń bári úlken sharýa. Árıne jan-jaqty kelissózder júrgizildi. 2018 jyldyń jartysynan 2019 jylǵa deıin tek daıyndyq jumystarymen aınalystyq», - dedi UQK-niń jedel qyzmetkeri.

QR Syrtqy ister mınıstriniń orynbasary, qazirgi QR Amerıka Qurama Shtattaryndaǵy Tótenshe jáne Ókiletti Elshisi Erjan Ashyqbaevtyń aıtýynsha, atalǵan operatsııa barysynda AQSh-pen jáne birqatar halyqaralyq uıymdarmen tyǵyz qarym-qatynasta jumystar júrgizildi.

«Árıne keıbir memleketter, uıymdar qaýipsizdik turǵysynda áli kúnge deıin óz rólderin aldyńǵy qatarǵa shyǵarmaýǵa tyrysýda. Biz árıne olardyń ustanymyna qurmetpen qaraımyz, qabyldaımyz. Sondyqtan osy iske atsalysqan barlyq memleketter men uıymdarǵa alǵysymyzdy bildiremiz. Kem degende 20 memleket pen halyqaralyq uıymdar qol ushyn sozdy», - deıdi E. Ashyqbaev.

Operatsııaǵa qatysýshylardyń aldynda Sırııada qansha otandasymyz bar, olardyń jaǵdaıy qalaı jáne olardyń qaýipsizdigin qamtamasyz etý máselesi turǵan.

«Biz shamamen qansha adam baryn bildik, degenmen naqty sanyn bilmedik. Osy maqsatta 2018 jyldyń qarasha aıynda alǵash Sırııaǵa bardyq. Maqsat – otandastarymyzdyń sany men jaǵdaıyn bilý. Ondaǵy biz kórgen jaǵdaı jantúrshilgerlik. Barǵan soń lagerler men áskerı gospıtaldardy aralap, jerlesterimizdi túgeldeýge kóshtik», - deıdi UQK-niń jedel qyzmetkeri.

«Jýsan» operatsııasy barysynda elordada Sırııadaǵy otandastarymyzdy qutqarýshylarmen tikeleı baılanys qurý maqsatynda jedel shtat qurylǵan.

«Soǵys, qaqtyǵys bolyp jatqan aımaqqa barý qıynǵa soqty. Soǵan qaramastan az ýaqyttyń ishinde azamattarymyzdy taýyp, tıisti sharalardy qabyldaı bildik. Jalpy Qazaqstan soǵys aımaqtarynan óz azamattaryn alǵan alǵash memleketterdiń biri boldy. Ata-anasyz qalǵan balalarǵa DNQ saraptamasyn júrgizip, óz qandasymyz ekenin anyqtalǵannan keıin ǵana elge ákelindi. Tipti Qazaqstan azamaty bolmasa da bizdi de ala ketińizdershi dep ótingender boldy», - deıdi E.Ashyqbaev.

«Biz jaqynyn jamandyqqa qımaǵan, jaýǵa bermegen halyqpyz. Memlekettiń basty qundylyǵy – adam. «Jýsan» operatsııasy bul adam ómiri, onyń bolashaǵy jáne eń bastysy árbir qazaqstandyqtyń ómiri memlekettiń basty múddesi ekenin kórsetti. Sol sekildi bul birneshe memlekettik organdardyń nátıjeli jumysyn kórsetip otyr. Qazir osy operatsııanyń barysyn basqa memleketter de zerdelep, qarap jatyr. Sol arqyly adam memlekettiń qorǵaýynda ekenin dáleldep otyrmyz. Azamattarymyzdy elge alyp kelý bir bólek, al olardy qalypty ómirge qaıta beıimdeý birneshe organdardyń qoıan-qoltyq júıeli eńbegi», - dep óz oıymen bólisti QR Aqparat jáne qoǵamdyq damý mınıstri Aıda Balaeva.

Atalǵan operatsııanyń nátıjesinde Sırııadan elge oralǵandardyń biri Ásııa Asqar atty jerlesimiz.

«Meniń 6 balam bar. Onyń bireýi sonda qalyp qoıdy. Sırııada júrgende ınternetten Nursultan Nazarbaevtyń qazaq eli eshqashan jetim-jesirin dalada tastamaıdy degen sózin estip qýanyp, elge qaıtý jolyndaǵy úmitim sónbedi», - deıdi Á. Asqar.


Avtor Álı Ibraev
Basty sózder: Sırııa, QR UQK, Qaýipsizdik, Din, Vıdeo,
Joǵary qaraı