Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstandyqtar úshin Táýelsizdik abstraktili uǵym emes – Zarema Sháýkenova

2021 jyldyń 2 jeltoqsan 2021 12:48

NUR-SULTAN. QazAqparat - Qazaqstandyqtar úshin Táýelsizdik abstraktili uǵym emes. Mundaı pikirdi QR Prezıdenti janyndaǵy QSZI dırektory, QR UǴA akademıgi Zarema Sháýkenova bildirdi, dep habarlaıdy QazAqparat tilshisi.

«Osydan 30 jyl buryn halqymyzdyń tarıhyndaǵy eń mańyzdy oqıǵalardyń biri – Qazaqstannyń Táýelsizdigin alýy. Bul oqıǵa tek qazaqstandyqtar úshin ǵana mańyzdy bolyp qoımaı, sonymen qatar búkil adamzattyń damý traektorııasyna oń áser etti. Álemde qolda bar ıadrolyq arsenaldan bas tartqan alǵashqy memleket bola otyryp, Qazaqstan ıadrolyq qarýdan azat álem qurý úshin tek saıası erik-jiger ǵana qajet ekenin dáleldedi. Semeı polıgonyn jabý arqyly Qazaqstan álemde júrgizilgen barlyq ıadrolyq synaqtardyń tórtten birin toqtatyp qana qoımaı, ıadrolyq synaqtardan bas tartýdyń jahandyq úrdisin qalyptastyrdy. Búginde álemniń 88 memleketi ıAdrolyq qarýǵa tyıym salý týraly kelisimge qol qoıdy. Biz adamzattyń osy jetistigine qosqan úlesimizdi maqtan ete alamyz», - dedi ol Elbasy amanaty: eldiktiń jeti tuǵyry» saraptamalyq dóńgek ústel otyrysynda.

Sonymen qatar ol Táýelsizdiktiń tórtinshi onjyldyǵyna qadam basqan qazaqstandyqtardyń basym kópshiligi bolashaqqa senimmen qaraıtyndyǵyn jáne óz elin maqtan etetindigin basa aıtty

«Elordamyz, Qazaqstannyń halyqaralyq saıası arenadaǵy jetistikteri, memlekettiń EKSPO, Qysqy Ýnıversıada, kúres túrlerinen álem chempıonaty sııaqty iri halyqaralyq sharalardy ótkizý múmkindigi maqtanysh sezimin oıatady. Gennadıı Golovkın, Dımash Qudaıbergen, Imanbek Zeıkenov, Marııa Mýdrıak, Danelııa Týlesheva, Skrıptonıt, Dana Aqylbekova, Artýr Turalıev jáne basqa da jerlesterimizdi maqtan tutamyz. Qazaqstandyqtar úshin Táýelsizdik abstraktili uǵym emes, onyń naqty praktıkalyq mazmuny bar. Bul – bizdiń barlyq etnıkalyq jáne konfessııalyq ártúrliligimizdegi birligimiz, ol damyǵan ekonomıka, áleýmettik lıftter, óz pikirimizdi ashyq bildirý jáne eldiń saıası basqarýyna qatysý múmkindigi», - dedi Zarema Sháýkenova.


Joǵary qaraı