Aýa raıy
Astana 9 °S
Almaty 15 °S
valıýta baǵamy
USD 386.71
EUR 429.17
RUB 6.02
CNY 54.66

Qajylyqqa attanǵan 2 myńǵa jýyq jerlesimizge dárigerdiń kómegi qajet boldy

2019 jyldyń 19 tamyz 2019 03:27

NUR-SULTAN. QazAqparat - Qajylyq saparǵa barǵan 3 200 otandasymyzǵa 21 medıtsına mamany qyzmet kórsetýde, dep habarlaıdy QazAqparat.

«Bıyl Mekkede kún óte ystyq. Onyń ústine adam kóp. Taýly jer bolǵan soń qan qysymy taǵy bar. Keı qonaqúıler qaǵbadan alys bolǵandyqtan qajylar kóbine jaıaý júredi. Sodan bolar tez aýyryp qalyp jatyr. Tipti Mına jazyǵy men shaıtanǵa tas atatyn aralyqtyń ózi 3 shaqyrym. Úlken kisiler qınalatyny ras. Kóbisiniń tabandary qajalyp, sýyq sýdan tamaǵy qabynǵan. Biz meılinshe kómek berýdemiz», - dedi dáriger Birjan Dosmaıylov.

QMDB-nyń aqparatyna súıensek, osy kúnge deıin 1 744 qajy dárigerlik kómekke júgingen. Olarǵa barlyǵy 21 medıtsına mamany qyzmet kórsetýde.

«Onyń basym bóligi jedel respıratorlyq vırýsty ınfektsııamen kelgender. Naqty sany 1 150 adam. Asqazan ishek joldary aýrýlarymen 90 adam, onyń 12-sinde ózderindegi sozylmaly aýrýlarynyń órshýi boldy. 380 adamda tirek qımyl apparaty aýrýlary tirkelse, onyń 360-da aıaqtyń ár túrli qajalýlary bar. Sondaı aq júrek qantamyr júıesi aýrýlary 220, onyń 215-de arterıaldy qan qysymnyń joǵarylaýy baıqalǵan. Sonymen qatar qant dıabetimen 4 adam, bronh demikpesimen 6 adam dárigerden em aldy.

Bir adam jedel appendetsıtpen aýrýhanaǵa jetkizilip, belgili dárejede dárigerlik kómek kórsetildi. Bir adam jol apatyna ushyrap, der kezinde jedel járdemmen aýrýhanaǵa jetkizilip, barlyq zertteý amaldary júrgizilip, jeńil dárejede bas mı jaraqaty, dene jaraqaty dıagnozymen em taǵaıyndaldy», - dedi ol.

Onyń aıtýynsha, naýqastardyń qazirgi jaǵdaıy qanaǵattanarlyq. Sol sııaqty qajet maman men dári-dármek jetkilikti.

Avtor Álı Ibraev
Basty sózder: Din, Medıtsına,
Joǵary qaraı