Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«KazRoboProject-2021» konkýrsynyń jáne «Smart Zholy» hakatonynyń jeńimpazdary anyqtaldy

2021 jyldyń 22 qazan 2021 10:48

NUR-SULTAN. QazAqparat - «Tsıfrlyq transformatsııa jáne jańa ómir sapasy» taqyrybynda «OPEN MIND» ashyq ınnovatsııalar onlaın-forýmy jumysyn aıaqtady, dep habarlaıdy QazAqparat Nursultan Nazarbaev Qorynyń baspasóz qyzmetine silteme jasap.

Forým sessııalarynyń taqyryptary koronavırýstyń pandemııa kezinde búkil álemde bolyp jatqan jedeldetilgen tsıfrlyq transformatsııa baǵytyna arnaldy.

Ózekti máselelerdi talqylaýǵa Qazaqstan Úkimetiniń, korporatıvtik sektordyń, sarapshylar qaýymdastyǵynyń ókilderi, tsıfrlyq qyzmetterdi sheteldik ázirleýshiler, IT-kompanııalardyń basshylary jáne t.b. tulǵalar qatysty.

Forým sessııalary barysynda «Ashyq ınnovatsııalar men jańa tsıfrlyq shyndyqtyń mindetteri», «Tsıfrlandyrý jáne quqyq: jańa synaqtar», «Qazaqstandyq startaptar syrtqy naryqqa qalaı shyǵady», «Aýtsorsıng. Qazaqstan», «Qazaqstandyq ýnıversıtetter qalaı jańa tehnologııalyq jobalardyń paıda bolý alańyna aınalýy múmkin» degen taqyryptar talqylandy.

Forým kezinde Nursultan Nazarbaev Qory uıymdastyrǵan «KazRoboProject-2021» robototehnıka baıqaýynda jáne «Smart Zholy» hakatonynda jeńimpaz bolǵandardyń esimi anyqtaldy. Bul forýmnyń mańyzdy bólimi boldy.

Jyl saıyn robot tehnıkasy boıynsha chempıonat (10 jastan 21 jasqa deıingi jastar arasynda ótkiziledi) elimizdiń barlyq aımaqtarynan ondaǵan jas ónertapqyshtardy anyqtaıdy.

«Smart Zholy» baǵdarlamasy perspektıvaly IT -startaptardy qoldaýǵa, olardyń úzdikterin halyqaralyq deńgeıge shyǵarýǵa baǵyttalǵan. Baǵdarlama jeńimpazdary birneshe jyldan beri Sıngapýrdegi Ońtústik-Shyǵys Azııadaǵy eń iri startap alańynda óz jobalaryn usynyp keledi.

«KazRoboProject-2021» baıqaýynyń «Kontsept» nomınatsııasy boıynsha:

- 10 jastan 15 jasqa deıin – «Trashbot» jobasy bar «Jylyoi tehnik» komandasy. Bul sýdaǵy qoqysty jınaýǵa arnalǵan qurylǵy. Ol júzip konteınerde plastmassany jáne basqa qalqymaly qoqystardy jınaıdy. Bul modelde protsesti avtomattandyrý elementteri, datchıkter men aqparatty berý qurylǵylary bar;

- 16 men 21 jas aralyǵynda – «Eco-Robot» jobasy boıynsha «Team Atom» komandasy. Bul robot qala kóshelerindegi qoqysty oflaın rejımde jáne kamera men ınternetti qoldana otyryp basqarý arqyly joıady.

«Prototıp» nomınatsııasy boıynsha jeńimpazdar:

- 10-15 jas aralyǵynda – «Aqyldy Terminal» jobasyn daıyndaǵan «Smart-TOP» komandasy aldy. Olar mekemeniń kireberisine ornalastyrýǵa bolatyn, dene temperatýrasyn ólsheıtin, antıseptıkalyq zattar shashatyn jáne kelýshilerge maska taratatyn termınal oılap tapty;

- 16 men 21 jas aralyǵynda – «Kvantorıým» komandasy. Bul komanda 18650 akkýmýlıatordy avtomatty túrde zarıadtaýǵa arnalǵan stantsııa oılap tapty. Pavlodar kolledjiniń joǵary kýrs stýdentteri batareıalardy úlken kólemde úzdiksiz zarıadtaýǵa arnalǵan tolyq avtomattandyrylǵan keshen ázirledi. Batareıalar qurylǵyǵa konteınerden jetkiziledi. Batareıanyń zarıadtaýǵa jaramdylyǵy men polıarlyǵy tekseriledi.

«Smart Zholy» hakatonyna qatysýshylarǵa Qazaqstan Respýblıkasy Prezıdenti Іs basqarmasynda ishki protsesterdiń tıimdiligin arttyrý úshin jańa tsıfrlyq sheshimderdi qurý tapsyrmasy júktelgen bolatyn. Atap aıtqanda, bul mobıldi qosymshalar, zamanaýı tehnologııalar arqyly qoldanatyn baǵdarlamalyq sheshimder bolýy múmkin edi.

«Hakatonǵa 35 -ten astam qatysýshy ótinim jiberdi. Olardyń arasynan 5 komanda aqtyq kezeńge ótti. «Smart Zholy» baıqaýynyń nátıjesinde «Automatico komandasy» jeńimpaz atandy. Komanda transport salasy úshin protsesterdi avtomattandyrý men almastyrýdyń tıimdi sheshimin qurdy»,-delingen Nursultan Nazarbaev Qorynyń baspasóz qyzmeti taratqan habarlamada.


Basty sózder: Bilim, Aqparattyq tehnologııalar,
Joǵary qaraı