Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Kiltin alyp qoıǵan: SQO turǵyny taksıdiń mas júrgizýshisin ustap berdi

2021 jyldyń 16 qazan 2021 20:09

PETROPAVL. QazAqparat – Petropavlda kólikti mas kúıde júrgizgen taksı júrgizýshisin polıtseıler jolaýshynyń kómegimen ustady, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, 13 qazan kúni tańerteń «102» arnasyna Petropavl turǵyny habarlasqan. Ol taksıde kele jatqanyn jáne júrgizýshiden spırttik ishimdiktiń ıisi shyǵyp turǵanyn aıtqan. Onyń júrgizý tásilinen qaýiptenip, kólikti toqtatýdy ótingen.

Atalǵan fakti boıynsha kezekshilikte júrgen patrýldik polıtsııa batalony ekıpajyna shuǵyl baǵdar berildi. «Volvo» avtokóligi Gorkıı kóshesinen tabyldy. Jolaýshy júrgizýshiden kólikti toqtatýdy ótinip, polıtseıler kelgenshe odan kiltin alyp qoıǵan eken. Tártip saqshylary taksı júrgizýshisin medıtsınalyq kýálandyrýǵa jetkizdi, nátıjesinde onyń mas bolǵany rastaldy.

Polıtseıler QR Ákimshilik quqyq buzýshylyq týraly kodeksiniń 608-baby boıynsha materıal jınap, sotqa tapsyrdy. Sot sheshimine sáıkes, mas kúıde kólik basqarǵan 48 jastaǵy júrgizýshi 15 táýlikke ákimshilik qamaqqa alyndy jáne 7 jylǵa kólik júrgizý quqyǵynan aıyryldy.

«Jolaýshynyń áreketi óziniń jáne quqyq buzýshynyń ómirine tóngen qaýipten saqtap qalǵany jaıly atap ótken jón. Mas kúıde kólik júrgizýge bolmaıdy, sebebi barlyq jol qozǵalysyna qatysýshylardyń ómiri men densaýlyǵyna qaýip tónedi. Oblysta 9 aıda mas júrgizýshiler 16 jol-kólik oqıǵasyn jasady, onda 5 adam qaza taýyp, 22-si jaraqat alǵan. Osyndaı oqıǵalardyń aldyn alýǵa reıdtik jáne jedel-profılaktıkalyq is-sharalar septigin tıgizedi. Qańtardan bastap oblys joldarynda spırttik ishimdik iship rólge otyrǵan 849 kólik júrgizýshisi ustaldy», - deıdi SQO PD jergilikti polıtsııa qyzmeti basqarmasy bastyǵynyń orynbasary Aleksandr Rozbah.


Joǵary qaraı