Aýa raıy
Astana 10 °S
Almaty 14 °S
valıýta baǵamy
USD 421.58
EUR 496.83
RUB 5.53
CNY 62.20

Kóbeıtuzdyń balshyǵyn alǵan erli-zaıypty ákimshilik jaýapkershilikke tartyldy

2020 jyldyń 7 tamyz 2020 21:22

NUR-SULTAN. QazAqparat – Kóbeıtuz kóline aınalma jolmen kirip ketken erli-zaıypty ákimshilik jaýapkershilikke tartyldy, dep habarlaıdy QazAqparat Polisia.kz portalyna silteme jasap.

Ereımentaý aýdanyndaǵy qyzyl tústi Kóbeıtuz kólinen tuz ben balshyq alyp ketpekshi bolǵan elorda turǵyndary Ákimshilik kodekstiń úsh baby boıynsha jaýapkershilikke tartyldy.

7 tamyzda erli-zaıypty kóligimen polıtsııa beketterin aınalyp jetip, Ereımentaý aýdany aýmaǵyndaǵy Kóbeıtuz kólinen kúrekpen laı jınap júrgeni anyqtaldy. Aýdandyq polıtsııa bólimshesiniń qyzmetkerleri dereý tártip buzǵan azamattardy anyqtady.

Erli-zaıypty elorda turǵyndary aýdanǵa qonaqqa kelgen eken. Biraq erekshe kóldi kórgisi kelip, beketterdi aınalyp, dala jolymen Kóbeıtuzǵa jetken.

58 jastaǵy er adam men onyń áıeline qatysty QR ÁQBtK-niń 364-baby «Ortaq sý paıdalaný erejelerin buzý» boıynsha ákimshilik hattama toltyryldy.

Sondaı-aq, karantın talaptaryn buzǵany úshin polıtsııa qyzmetkerleri QR ÁQBtK-niń 425-baby «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha materıal jınap, oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentine jiberdi.

QR ÁQBtK-niń 139-babyna sáıkes memlekettik menshik quqyǵyn buzǵan erli-zaıyptylarǵa qatysty jınalǵan materıaldar Ekologııa departamentine jiberildi.

Polıtseıler karantın erejesin buzǵany úshin jaýapkershilikke tartylatynyn taǵy bir márte eskertip, tabıǵat resýrstaryna uqypty qaraýdy suraıdy.

Eske sala ketsek, shilde aıynyń sońynda Aqmola oblystyq polıtsııa departamenti bastyǵynyń tapsyrmasy boıynsha Kóbeıtuz kóline baratyn eki kólik jolynda úsh mobıldi beket qoıylǵany habarlanǵan edi.

Aıta keterligi, Ekologııa, geologııa jáne tabıǵı resýrstar mınıstrligi Kóbeıtuzdyń lastanyp, ol jaqtan tuzdyń tıelip áketilýine baılanysty alańdaýshylyq bildirdi. Keıin Kóbeıtuz jáne sol mańdaǵy taǵy úsh kól karantınge jabylyp, onda barýǵa tyıym salyndy. Sonymen qatar, kóldiń tuzyn satqandardyń kimder ekeni belgili boldy. Aqmola oblysynyń polıtseıleri kóligimen kólge kirip ketken adamdy taýyp, jazalanǵanyn habarlady.

Osy tusta Aqmola oblysynyń tabıǵı resýrstar jáne tabıǵatty paıdalanýdy retteý basqarmasy Kóbeıtuz ben Qorjynkól kólderin 49 jylǵa jalǵa berýge baıqaý jarııalaǵan belgili boldy. Keıinnen Kóbeıtuz jalǵa berilmeıdi degen sheshim shyqty.


Basty sózder: Aqmola oblysy, QR ІІM, Ekologııa,
Joǵary qaraı