Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs: Astanada 4,5 myń adam statsıonarda jatyr

2021 jyldyń 17 sáýir 2021 01:43

NUR-SULTAN. QazAqparat - Sońǵy táýlikte elordada koronavırýs juqtyrýdyń 600-den astam jaǵdaıy anyqtaldy. Qalada ınfektsııanyń joǵary deńgeıi baıqalady. Bul týraly Nur-Sultanda koronavırýs ınfektsııasynyń paıda bolýy men taralýyna jol bermeý jónindegi komıssııa otyrysynda elordanyń bas memlekettik sanıtarlyq dárigeri Sarhat Beısenova málim etti, dep habarlaıdy QazAqparat.

«Búgingi tańda qalada ınfektsııanyń joǵary deńgeıi basylar emes. Bir táýlik ishinde 7 386 zertteý júrgizildi, onyń 678-i — oń nátıje, al onyń ishinde 77-si qaıta taldaý nátıjeleri. 601-i — alǵash ret anyqtalyp otyr. Sımptomdary bar 422 jaǵdaıdyń 11-i aldyn alý sharalary barysynda anyqtaldy. Baılanysta bolǵandar — 132, óz ótinishi boıynsha — 279. Bul shekteý jáne karantın sharalarynyń buzylýyn, jeke tulǵalardyń da, zańdy tulǵalardyń da aldyn alý sharalaryn saqtamaǵanyn rastaıdy. Jurt úı jaǵdaıynda biz kórsetken sharalardy saqtamaıdy», — dep atap ótti Sarhat Beısenova.

Onyń málimetinshe, 60 jastan asqan adamdar arasynda KVI aýrýynyń 2-3% ósýi baıqalady.

Qoǵamdyq densaýlyq saqtaý basqarmasynyń basshysy Tımýr Muratov ta densaýlyq saqtaý júıesine shamadan tys kúsh túskenin atap ótti.

«Qazirgi ýaqytta 4 373 naýqas ambýlatorlyq em qabyldaýda. Qalada kún saıyn 250 brıgada jumys isteıdi jáne PTR alady. Statsıonarlarda 1 112 adam — ortasha jáne ortasha aýyr jaǵdaıda. Qazir jansaqtaý bóliminde jatqan adamdardyń sany 100-den asady, onyń ishinde 32 adam — ókpeni jasandy jeldetý apparatyna qosylǵan», — dedi Qalalyq qoǵamdyq densaýlyq saqtaý basqarmasynyń basshysy.

Onyń aıtýynsha, qazir halyq mundaı júktemeden beıhabar. Sebebi densaýlyq saqtaý júıesi tyńǵylyqty daıyndalǵan. Al dárihanalar men statsıonarlarda, bólshek saýdada dárilik zattar qory jetkilikti.

Bul rette dárigerler qala turǵyndaryn adam kóp jınalatyn jerlerge barmaýǵa, sanıtarlyq normalar men karantındik talaptardy saqtaýǵa shaqyrady. Olar vaktsınatsııany qaýipti ınfektsııamen kúresýdiń eń tıimdi ádisi dep sanaıdy. Bul qalypty ómirge tezirek oralýǵa kómektesedi.


Joǵary qaraı