Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs: Astanada aýyr jaǵdaıda aýrýhanaǵa túsetin naýqastar azaımaı otyr

2021 jyldyń 10 maýsym 2021 13:02

NUR-SULTAN. QazAqparat – Elorada jansaqtaý bóliminde koronavırýspen 73 naýqas jatyr. Bul týraly Nur-Sultan qalalyq qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova aıtty, dep habarlaıdy QazAqparat tilshisi.

«20 mamyrǵa deıin kúnine orta eseppen shamamen 360 jańa jaǵdaı tirkelgen bolsa, mamyrdyń ekinshi jartysynan bastap 200-ge jýyq derek tirkeldi. Maýsymnyń 9 kúniniń ishinde koronavırýs ınfektsııasynyń 1 721 jańa jaǵdaıy anyqtaldy.

Juqpaly aýrýlar aýrýhanalarynda emdelýshiler sany da azaıdy. Qazir aýrýhanalardyń júktemesi mamyrdyń basyndaǵy 63 paıyzdan 37 paıyzǵa deıin tómendedi. Buǵan halyqty vaktsınalaý mańyzdy ról atqardy dep sanaımyz», - dedi ol.

Onyń atap ótýinshe, patsıentter sanynyń tómendeýine baılanysty sońǵy bir aptada jalpy sany 240 tósek-oryndy quraǵan 3 ınfektsııalyq aýrýhana jabylyp, bir juqpaly aýrýlar aýrýhanasyndaǵy kereýetter 130 tósek-orynǵa qysqardy.

«Alaıda, aýrýhanalarǵa aýyr jáne óte aýyr jaǵdaıda túsetin naýqastardyń sany azaımaı otyrǵanyn atap ótkim keledi. Máselen, búginde jansaqtaý bóliminde 73 naýqas jatyr, onyń 19-y ókpeni jeldetý apparatyna qosylǵan. Olardyń 70 paıyzy 60 jastan asqan adamdar, orta jastaǵy adamdar da jatyr. Onyń ústine barlyǵynda aýrýdyń aǵymyn qıyndatatyn janama aýrýlar bar. Buǵan qosa, naýqastardyń 80 paıyzy úıde ózin-ózi emdep, dárigerlerge qaralmaǵan, kásibı medıtsınalyq kómekke júginbegen», - dedi Álııa Rústemova.



Joǵary qaraı