Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs boıynsha álemdegi jaǵdaı

2021 jyldyń 25 aqpan 2021 08:58

NUR-SULTAN. QazAqparat – Dúnıejúzilik densaýlyq saqtaý uıymy koronavırýstyń álemde taralý qarqyny tómendep jatqanyn, alaıda indettiń jańa shtamdarynyń paıda bolýy alańdaýshylyq týǵyzyp otyrǵanyn málimdedi. Sársenbide Covax halyqaralyq baǵdarlamasy iske qosyldy, onyń aıasynda eń kedeı memleketter vaktsına ala bastaıdy. Sonymen bir mezette Grýzııa týrısterdiń kirýine shekteýler men basqa da karantın shekteýlerin alyp tastaýda. Álemdegi osy jáne ózge de jańalyqtar jóninde QazAqparat BBC saıtyna silteme jasap habarlaıdy.

DDU-nyń «saq» optımızmi

Dúnıejúzilik densaýlyq saqtaý uıymy 6-shy apta qatarynan álemde koronavırýstyń jańa jaǵdaılary men ólim-jitimniń tómendep kele jatqanyna optımızm tanytty. DDSU málimetteri boıynsha, ótken aptada ınfektsııanyń 2,4 mıllıon jańa jaǵdaıy tirkeldi, bul aldyńǵy aptamen salystyrǵanda 11% az. Sol kezeńde COVID-19 óliminiń deńgeıi 20% tómendedi. Alaıda aýrý qarqyny báseńdegenimen, dárigerler jańa shtamdardy juqtyrýdyń kóbeıýine alańdaýly.

Pandemııa bastalǵannan beri álemde 110,7 mıllıon adam indetti juqtyryp, 2,4 mıllıonnan astamy qaza boldy.

Covax-qa úmit artyldy

Gana álemdegi eń kedeı elderdiń turǵyndaryn vaktsınalaýǵa arnalǵan «Covax» baǵdarlamasy aıasynda koronavırýstyń vaktsınalar partııasyn alǵan alǵashqy el boldy. Úndistanda óndirilgen AstraZeneca preparatynyń 600 myń dozasynyń partııasy sársenbide Akkraǵa jetkizildi.

Ganada (el halqy 30 mıllıon) pandemııa bastalǵannan beri koronavırýs ınfektsııasynyń 80 myńnan astam jaǵdaıy jáne 580 ólim tirkeldi. Biraq testileý problemalaryna baılanysty bul sandar tolyq bolmaýy múmkin.

Bir ǵana ekpe jetkilikti…

Amerıkalyq retteýshiler qaýipsiz, koronavırýs aýrýynyń aldyn alatyn jáne qaıta egilýdi qajet etpeıtin Johnson & Johnson shyǵarǵan Covid-19 vaktsınasyn maquldaýǵa daıyn.

Sarapshylardyń pikirinshe, jańa vaktsına Pfizer jáne Moderna preparattaryna bıýdjettik balama bola alady. Óıtkeni olardan aıyrmashylyǵy – ony arnaıy tońazytqyshta emes, qarapaıym tońazytqyshta saqtaýǵa bolady.

AQSh, Ońtústik Afrıka jáne Brazılııadaǵy aldyn ala klınıkalyq zertteýler kórsetkendeı, jańa vaktsına 85% astam aýyr jaǵdaılardyń aldyn alady. Biraq koronavırýstyń ortasha jáne jeńil túri úshin onyń tıimdiligi 66% aspaıdy.

Sonymen qatar synaqqa qatysqandardyń eshbiri vaktsınatsııadan keıingi 28 kún ishinde qaıtys bolmaǵan jáne aýrýhanaǵa túspegen.

Buǵan deıin Johnson and Johnson olardyń vaktsınasy maquldanǵan jaǵdaıda birden 4 mıllıonnan astam dozany shyǵaryp, naýryz aıynyń sońynda 20 mıllıondy qamtamasyz ete alatyndyǵyn málimdedi.

Ulybrıtanııa: mektep oqýshylaryna demalys bolmaı ma?

Ulybrıtanııa premer-mınıstri Borıs Djonson joǵary synyp oqýshylary jazda qaıta oqyp, muǵalimderimen jeke jumys isteýi úshin qosymsha qarajat bólýge ýáde berdi.

Ótken jyldyń naýryz aıynda engizilgen eleýli shekteýler mektep oqýshylaryn qashyqtan oqytýǵa kóshýge májbúr etkendikten, bul olardyń úlgerimine de áser etti.

Osyǵan uqsas bastamalar Shotlandııa, Ýels jáne Soltústik Irlandııada iske asyrylýy múmkin. Olardyń bıligi mektepterge qosymsha qarjy bólýdy josparlaýda.

Grýzııa shekarany ashady

25 aqpannan bastap Grýzııa koronavırýs pandemııasyna baılanysty shekteýlerdi birtindep alyp tastaı bastaıdy. 1 naýryzdan Qazaqstan, Reseı, Armenııa, Ázerbaıjan, Belarýs, Ýkraına azamattary koronavırýsqa PTR-anyqtama bolǵan jaǵdaıda elge ushyp kele alady. Buǵan deıin elge kirý tek Eýroodaq memleketteriniń azamattary úshin ruqsat etilgen bolatyn.

Grýzııadaǵy taý shańǵysy kýrorttarynda aldymen qonaqúıler, al 8 naýryzdan bastap taýǵa kóterý keshenderi ashylady. Sodan keıin meıramhanalar, saýda ortalyqtary men bazarlar qaıta jumys isteı bastaıdy.

15 naýryzda joǵary oqý oryndary men jattyǵý zaldaryn ashý josparlanýda, al 1 sáýirden bastap teatrlar, sport klýbtary men sport arenalary qyzmetine kirisedi. Degenmen, keshki saǵat 9-dan tańǵy 5-ke deıin júrip-turýǵa salynǵan tyıym áli de kúshinde.

Basty sózder: Koronavırýs, Álem,
Joǵary qaraı