Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs: Qazaqstan ǵalymdary revaktsınatsııa máselesin talqylaýda

2021 jyldyń 4 tamyz 2021 18:26

NUR-SULTAN. QazAqparat – Joǵary sanatty ınfektsıonıst dáriger, medıtsına ǵylymdarynyń kandıdaty Sáýle Atyǵaeva revaktsınatsııa júrgizý úshin qandaı alǵysharttar bolý kerektigin aıtty, dep habarlaıdy QazAqparat tilshisi.

«Ol úshin halyqtyń ımmýndyq deńgeıi, ınfektsııadan keıingi jáne vaktsınatsııadan keıingi ımmýnıtettegi qaıshylyqtar zertteledi. Aýyrǵan adamdar men vaktsına alǵan adamdarda antıdenelerdiń deńgeıi qanshalyqty joǵary ári uzaq saqtalatyny qadaǵalanady. Immýnolog, vırýsolog, ınfektsıonıst mamandar osynyń bárin taldaıdy. Sol talqylaýlardyń qorytyndysy boıynsha Densaýlyq saqtaý mınıstrligine halyqty qaıta vaktsınalaý qajettiligi nemese qajet emestigi týraly usynymdar beredi», - dedi ınfektsıonıst.

Mamannyń aıtýynsha, qazir bul másele otandyq ǵalymdar arasynda talqylanyp jatyr.

«Qandaı da bir qorytyndy bermes buryn, máseleni zertteý kerek. Revaktsınatsııa máselesi ınfektsııamen aýyrǵan nemese vaktsınalanǵan adam aǵzasyndaǵy antıdenelerdiń qanshalyqty uzaq saqtalatynyn bilgennen keıin sheshiledi. Naqty qorytyndy alǵan kezde ǵana revaktsınatsııa týraly suraqqa jaýap bolady», - dedi Sáýle Atyǵaeva.


Joǵary qaraı