Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs: Qytaıda ǵımarattardyń syrty úsh túrli túspen belgilene bastady

2021 jyldyń 11 sáýir 2021 03:16

NUR-SULTAN. QazAqparat - Brazılııada jerleý rásimderiniń qyzmetkerleri koronavırýstan qaıtys bolýshylardyń kóptiginen táýlik boıy jumys isteýge kóshirildi. Beıjińde ǵımarattardyń syrty úsh túrli túspen belgilene bastady, dep habarlaıdy QazAqparat.

Osy aptada Frantsııa Eýropadaǵy indet kúrt taraǵan elge aınaldy – pandemııa bastalǵaly beri koronavırýs juqtyrǵandardyń jalpy sany bes mıllıonǵa jýyqtady. Sonymen qatar, jergilikti medıtsınalyq ortalyqtar aldyn ala jazylǵanyna qaramastan, kóptegen azamattyń ekpe alýǵa kelmeı qalǵanyna keıistik bildirdi.

Al Venesýelanyń soltústigindegi Sýkre shtatynyń bıligi COVID-19 juqtyrǵan jáne koronavırýsqa kúdigi bar adamdarǵa úıleriniń syrtyna arnaıy qyzyl belgi qoıýǵa májbúr etýde. Atalǵan shtattyń meri buıryqty oryndamaǵandarǵa eń tómengi jalaqy mólsherinen birneshe ese kóp aıyppul salynatynyn jetkizdi, al karantın sharalaryn buzýshylar tegin azyq-túlik jıyntyqtary men gazdan qur qalatyn kórinedi.

Beıjińde túrli-tústi japsyrmalar qoldanyla bastady. Budan bylaı dúkender, meıramhanalar jáne basqa da mekemelerdiń ǵımarattary qyzmetkerlerdiń kem degende 80% koronavırýsqa qarsy egilse - «jasyl», 40 - 80% aralyǵynda - «kók» jáne 40% az bolsa «qyzyl» japsyrmamen belgilenetin bolady.

Brazılııada pandemııa bastalǵaly 213 mıllıon halyqtyń 13 mıllıon 200 myńǵa jýyǵy koronavırýs ınfektsııasyn juqtyrǵan. Jerleý rásimin uıymdastyrýshylar qaıtys bolǵan adamdar sanynyń kóptiginen táýlik boıy jumys isteýge aýystyrylǵan. SARS CoV2 aınalymyn báseńdetý úshin el úkimeti qatań shekteý sharalaryn engizýde.


Joǵary qaraı