Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs: Jambyl oblysynda 150 myńnan asa turǵyn vaktsına saldyrdy

2021 jyldyń 24 maýsym 2021 00:30

TARAZ. QazAqparat – Jambyl oblysynda koronavırýs ınfektsııasyn juqtyrýshylar sany azaıyp keledi, - dep habarlaıdy QazAqparat tilshisi.

Búgingi tańda óńirde vırýs juqtyrǵandardyń ortasha aptalyq kórsetkishi kúnine 17-den 30-ǵa deıingi aralyqty quraıdy. Buǵan epıdemııaǵa qarsy is-sharalardyń saqtalýy jáne jappaı vaktsınatsııanyń bastalýy arqasynda qol jetkizildi. Bul týraly oblystyq densaýlyq saqtaý basqarmasynyń basshysy Áset Qalıev aıtyp berdi.

«Pandemııanyń negizgi sabaǵy – aýrýdyń aldyn alý. Vırýsty juqtyrý ońaı, kóp jaǵdaılarda ony emdeý qıyn. Ózińizdi jáne jaqyndaryńyzdy ınfektsııadan qorǵaý jáne aımaqtaǵy jaǵdaıdyń nasharlaýyna jol bermeý úshin epıdemııaǵa qarsy barlyq sharalardy jaýapkershilikpen oryndaý qajet. Bul – betperde kııý jáne qoǵamdyq oryndarda áleýmettik qashyqtyqty saqtaý, jeke gıgıena»,-deıdi basqarma basshysy.

Vırýstan qornaýdyń eń tıimdi ádisi – vaktsınatsııa bolyp qala bermek. Búgingi tańda oblysta vaktsınany 150415 turǵyn saldyrdy jáne bul óńir turǵyndarynyń 25,8 paıyzy. Aımaqta egý pýnktteri jetkilikti.

«Búginde óńirde Qazaqstan, Reseı, Qytaı óndirýshileriniń vaktsınalary bar. Turǵyndar ózderi qalaǵan vaktsınany tańdaı alady. Sonymen, vaktsına alǵan adamdarda, onyń túrine qaramastan, aýrý 30 ese azaıady. Bul degenimiz, COVID-19 patsıentimen baılanysta bolǵan vaktsınatsııalanbaǵan adamnyń juqtyrý yqtımaldyǵy – 90,0 paıyz, al vaktsınatsııalanǵanda tek – 3,0 paıyz quraıdy. Jalpy, egilgenderde aýrý jáne asqynýlar 15 ese az bolady. Olar koronavırýs ınfektsııasyn juqtyrǵan jaǵdaıda syrqaty áldeqaıda jeńil, ári aýyr asqynýlarsyz bolatyny dáleldengen»,-deıdi Á. Qalıev.


Joǵary qaraı