Aýa raıy
Astana -13 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs juqtyrǵan 6 myńnan astam medıtsına qyzmetkerine birjolǵy tólem berildi

2020 jyldyń 14 qazan 2020 10:20

NUR-SULTAN. QazAqparat - 6 myńnan astam medıtsına qyzmetkerine COVID-19 ınfektsııasyn jáne pnevmonııany juqtyrýyna baılanysty birjolǵy tólem berildi, dep habarlaıdy QazAqparat tilshisi.

QR Eńbek jáne halyqty áleýmettik qorǵaý mınıstrliginiń baspasóz qyzmetiniń málimetinshe, COVID-19-ben kúreske jumyldyrylǵan 6 006 medıtsına qyzmetkeri koronavırýs ınfektsııasyn nemese vırýstyq pnevmonııany juqtyrǵan jaǵdaıda beriletin birjolǵy áleýmettik tólemdi memlekettik áleýmettik saqtandyrý qorynan aldy. Atalmysh qor aýrý saldarynan qaıtys bolǵan 182 medıtsına qyzmetkeriniń týystaryna tólem aýdardy.

Atalǵan tólem tólenetin medıtsına qyzmetkerlerin óńirlerdiń jáne respýblıkalyq mańyzy bar qalalardyń densaýlyq saqtaý basqarmalary janyndaǵy arnaıy komıssııa aýyrǵan medıtsına qyzmetkerin tekserý nátıjesi negizinde anyqtaıdy. Ótinimdi jınaqtaýdy QR Densaýlyq saqtaý mınıstrligi júzege asyrady, odan keıin ótinimder elektrondyq is maketterin qalyptastyrý úshin «Azamattarǵa arnalǵan úkimet» memlekettik korporatsııasyna beriledi, sodan soń tólem taǵaıyndaý úshin memlekettik áleýmettik saqtandyrý qoryna jiberiledi.

«14 qazan saǵat 9.00-degi jaǵdaı boıynsha MÁSQ COVID-19 nemese vırýstyq pnevmonııa juqtyrǵan 6 006 medıtsına qyzmetkerdiń ótinishi boıynsha jáne aýrýdyń saldarynan qaıtys bolǵan 182 medıtsına qyzmetkerine qatysty aqshalaı qarajatty taǵaıyndaý men tóleýdi júzege asyrdy», delingen habarlamada.

Tólemdi COVID-19-ben kúreste qaıtys bolǵan barlyq medıtsına qyzmetkeriniń týystary aldy.

Óńirler bólinisinde medıtsına qyzmetkerlerine COVID-19 nemese vırýstyq pnevmonııany juqtyrý jaǵdaıyna tólemderdiń eń kóbi Nur-Sultan (1 105) jáne Almaty (560) qalalary jáne Qaraǵandy (551), Shyǵys Qazaqstan (507) jáne Atyraý (470) oblystary boıynsha júrgizildi.

Esterińizge sala keteıik, QR Eńbek jáne halyqty áleýmettik qorǵaý mınıstri men QR Densaýlyq saqtaý mınıstriniń 9 sáýirdegi «Densaýlyq saqtaý uıymdarynyń COVID-19 koronavırýs ınfektsııasyna qarsy kúres jónindegi epıdemııaǵa qarsy is-sharalarǵa tartylǵan qyzmetkerleri atalǵan ınfektsııany juqtyrǵan nemese odan qaıtys bolǵan jaǵdaıda olarǵa birjolǵy áleýmettik tólemdi júzege asyrý qaǵıdalaryn bekitý týraly» birlesken buıryǵyna 22 shildede engizilgen ózgeristerge sáıkes, joǵaryda kórsetilgen tólem:

– koronavırýs ınfektsııasy nemese vırýstyq pnevmonııa juqtyrǵan medıtsına qyzmetkerlerine – 2 mln teńge;

– COVID-19 koronavırýstyq ınfektsııasyn juqtyrǵannan, vırýstyq pnevmonııamen aýyryp qaıtys bolǵan jaǵdaıda olardyń otbasyna – 10 mln teńge kóleminde tólenedi.


Joǵary qaraı