Aýa raıy
Astana -6 °S
Almaty 3 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýs juqtyrǵan adam ókpe qabynýynan tolyq aıyqpasa, kún sýytqanda qaıta asqynady

2020 jyldyń 23 qazan 2020 08:41

AQTAÝ. QazAqparat - Elimizde sońǵy aılarda epıdemıologııalyq ahýal turaqtalǵanymen keı óńirlerde karantın talaptary kúsheıdi. QR Densaýlyq saqtaý mınıstri Alekseı Tsoı da koronavırýs pandemııasy aıaqtalmaǵanyn eskertip, kúz mezgilinde ekinshi tolqyn júrýi múmkin degen boljam jasaǵan bolatyn. Osyǵan oraı, Mańǵystaý oblysynyń shtattan tys bas epıdemıology Maral Qadyr koronavırýs nemese vırýstyq pnevmonııamen aýyrǵan adamdardyń ókpesindegi qabyný tolyq aıyqpasa, kún salqyndaǵanda ókpe qabynýlary qaıta asqynýy múmkinekenin eskertti. QazAqparat tilshisiniń dárigermen suhbaty osy máseleni qaýzaıdy.

- Elimizde qarasha, jeltoqsanda koronavırýstyń ekinshi tolqyny bastalýy múmkin degen boljam bar. Jaz mezgilinde qaýipti indetti juqtyrǵandar kúzde qaıta aýyrýy múmkin be?

- Naqty boljam jasaý qıyn. Degenmen, ózińiz biletindeı, koronavırýstyń birinshi tolqyny bıyl naýryz aıynan shilde aıynyń sońyna deıin sozyldy. Munan soń tamyz-qyrkúıek aılary úzilis tapqan bolatyn. Shamamen qyrkúıekten 20-synan bastap aımaqta zerthanalyq jolmen dáleldengen koronavırýstyq ınfektsııalar tirkele bastady. Onyń ústine kúzde respıratorlyq aýrýlar órshıdi. Osy ýaqyttakoronavırýs nemese vırýstyq pnevmonııamen aýyrǵan adamdardyń ókpesindegi qabyný tolyq aıyqpasa, kún salqyndaǵanda ókpe qabynýlary qaıta asqynýy múmkin. Bul naýqastarmen buǵan deıin fızıoterapııa bóliminiń mamandary jumys jasady. ıAǵnı, olar úıretken tynys alý jattyǵýlaryn turaqty jasap turýlary qajet. Búgingi tańda ortalyq aýrýhanada 40 tósektik ońaltý bólimi jumys istep tur. Múmkindiginshe emhanalar arqyly portalmen sol bólimge túsip, emdelýge de bolady. Ol jerde emdik sharalardan bólek tynys alý jattyǵýlaryn durys jasaý joldary úıretiledi.

- Jaz mezgilinde ózińiz de vırýs juqtyryp, emdelip shyqqanyńyzdy bilemiz. Qaýipti indetpen aýyryp shyqqan naýqastar densaýlyǵyn nyǵaıtý maqsatynda ne isteýi kerek? Ózińiz qalaı ımmýnıtetti kóterip júrsiz?

- Shilińgir shildede naǵyz epıdemıologııalyq oshaqta júremiz dep, aty óshkir koronavırýsty juqtyryp 2 aıdan asa, onyń ishinde 12 kún jansaqtaý bóliminde em alyp, birinshi alla, sosyn áriptesterimizdiń táýlik boıy 24 saǵat tikesinen tik turyp atqarǵan qyzmeti, tileýles el jurttyń izgi nıetiniń arqasynda qatarǵa qosyldym. Dári men ıneden sharshadyq, Býrabaı, Saryaǵash asyp ketýge kúzgi maýsymnan seskendik. Sonymen «jaqynnan dorbalaıyq» dep Aqtaýdaǵy jattyǵý zalyna jazyldym. Doktor Býbnovskıı - eger qozǵalys bolmasa, deneń seni jerge janshyp jiberedi. «Densaýlyq - ol erkin qozǵalys», dep beker aıtpaǵan. Sebebi salaýatty ómir saltynyń negizi qozǵalysta. Kún salqyndaǵaly ókpedegi aıyqpaǵan qabyný aımaǵyndaǵy (matovoe steklo) qaldyq syr berip, entigý qaıta bastalýy múmkin. Sondyqtan ókpege arnalǵan tynys alý gımnastıkasyn jasap turý kerek. Ókpeni kerip, tazartý nátıjesi birinshi jattyǵýdan-aq biline bastady. Jalpy kúnine jaıaý júrgen durys. Máselen, taza aýada serýendeýdiń ózi aǵzaǵa úlken kúsh beredi. Bul jerde Mańǵystaý turǵyndary úshin eń qolaıly Kaspıı teńiziniń jaǵalaýy. Kúnine 1 saǵat teńiz jaǵasynda júrý ımmýnıtetti kúsheıtedi.

- Dárigerler koronavırýstan saqtanýdyń qarapaıym qaǵıdalaryn aıtyp júr. Maska kııý, adam kóp shoǵyrlanatyn jerlerge barmaý sekildi. Siz dáriger retinde taǵy qandaı keńes berer edińiz?

- Bizdiń mentalıtettiń tamaq rejıminde kóbine nan taǵamdary men maıly etter joǵary oryn alady. Biz ol ádetten alystaýymyz kerek. Tamaqqa kóbine kókónis ónimderin, mıneralǵa baı dándi-daqyldardy qosqan jón. Ásirese, balalardyń durys tamaqtanýyna kóńil bólgen durys. Sondaı-aq, kúzgi maýsymda juqpaly aýrýlardyń keń taraıtyn mezgilinde qosymsha vıtamınder ishýge keńes beremin. Kúnine birneshe ret úıdi jeldetip, aýany tazartý kerek. Durys tamaqtanýǵa kóńil bólý. Kúnine 1-1,5 lıtr sý ishý. Vıtamınge baı qunarly tamaq ishý. Maska taǵýdyń da óz tártibi bar - maska muryndy, aýyzdy tolyq jaýyp turýy kerek. Bir ret qoldanatyn maskany 2 saǵattan soń aýystyryp turǵan jón.

Maskany birneshe kún qaltamyzǵa nemese sýmkamyzǵa salyp júrýge bolmaıdy. Ony tek qulaq baýlary arqyly ustaý kerek. Paıdalanyp bolǵan soń polıetılen paketke salyp, qoqysqa tastaý qajet, ashyq kúıinde ár jerge tastaýǵa bolmaıdy. Tigilgen, kóp paıdalanatyn maskany 4 saǵat taqqannan soń jýyp, keptirip, útiktep qaıta paıdalanýǵa bolady. Maskany ashyq tústi matadan tikken durys, qara matadan tigip, birneshe kún kıip júrgen durys emes. Kópshilik orynda mindetti túrde maskamen júrý kerek. Eger kez kelgenimiz osy qarapaıym qaǵıdalardy saqtasaq, vırýstan 70,80 paıyz qorǵanýǵa múmkindik bar.

- Ýaqyt bólip, suhbat bergenińizge rahmet.


Joǵary qaraı