Aýa raıy
Astana -5 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýsqa qarsy vaktsına: Halyqty túgel qamtıtyn aýqymdy óndiris qashan bastalady

2020 jyldyń 21 shilde 2020 12:38

NUR-SULTAN. QazAqparat – COVID-19 pandemııasy bastalǵaly beri álemde vaktsına jasaý úshin báıge júrip jatqandaı. Osy jyldyń naýryz aıynyń ózinde 35 zerthana men ınstıtýt koronavırýsqa qarsy vaktsınany ázirleý jumysyna kirisip ketken bolatyn. Sol tustyń ózinde qolda bar prototıpterge klınıkalyq synaq júrgizile bastady. Álemdik sarapshylardyń kóbi jáne Dúnıejúzilik densaýlyq saqtaý uıymy vaktsınany oılap tabý úshin bir jarym jyl ýaqyt kerektigin jarııalaǵan edi. Alaıda Reseı mamandary tipti bul vaktsına 11 aıdyń ishinde jasalatynyna senim bildirip otyr, dep habarlaıdy QazAqparat tilshisi.

Qazirgi tańda koronavırýsqa qarsy vaktsınany jasaý baǵytynda álemde 150 joba bastalyp ketken.

Máselen naýryz aıynyń sońynda Qytaı bıligi aldyn ala tıimdiligin kórsetken vaktsınany oılap tapqanyn jarııa etken edi. Qytaılyq mamandar synaq jumystary segiz aıdyń ishinde aıaqtalýy múmkin ekenin málimdegen. Maýsym aıynyń sońynda Qytaıda atalmysh vaktsına áskerı preparat retinde maquldanǵany habarlandy.

Sheteldik BAQ-tyń dál qazirgi aqparatyna sensek, qytaılyq CanSino Biologics atty úmitker-vaktsına 508 patsıenttiń 85 paıyzynynyń aǵzasynda beıtaraptandyratyn antıdene qalyptastyrǵan. 90%-dan astamynda T-jasýshalyq jaýap bolǵan.

Amerıkalyq ǵalymdar da koronavırýsqa qarsy eksperımentaldy vaktsınany klınıkalyq zertteýleren ótkizýdiń birinshi kezeńinen keıin shildede úmit bererlik nátıjege qol jetkizdi. Testileýge qatysqan eriktilerdiń aǵzasynda COVID-19 qozdyrǵyshyna qarsy antıdeneler anyqtalǵan. Massachýsets shtatyndaǵy «Moderna» bıotehnologııalyq kompanııasy jasaǵan koronavırýsqa qarsy tájirıbelik vaktsına erte klınıkalyq zertteýlerde teris ásersiz ımmýndyq reaktsııany týdyrǵan.

AQSh taǵy bir vaktsınany sáýirde Brazılııada jáne Ońtústik Afrıka Respýblıkasynda klınıkalyq synaqtardan ótkize bastaǵany habarlanǵan bolatyn. Naqtyraq aıtqanda Brazılııada, vaktsınany ásirese COVID-19 ınfektsııasyn juqtyrǵan myńdaǵan medıtsına qyzmetkerine synap jatqany jarııalanǵan. Oksford ýnıversıteti AstraZeneca kompanııasymen birlesip ázirlengen vaktsına synaqtan ótken 1077 adamnyń boıynda aıtarlyqtaı ımmýndyq reaktsııany kórsetti. Beıtaraptandyratyn antıdeneler patsıentterdiń 90% -dan astamynan tabylsa, barlyq qatysýshylardyń boıynda T-jasýshalar jaýaby anyqtalǵan.

Nemis aqparat quraldary da sáýir aıynda koronavırýs ınfektsııasyna qarsy vaktsınanyń alǵashqy klınıkalyq synaqtardan ótetinin jarysa jazǵan.

Alaıda belgili bolǵandaı shilde aıynda Reseı Federatsııasynda jasalǵan vaktsına álemde birinshi bolyp jappaı óndiriske engizilmek. Reseılik buqaralyq aqparat quraldarynyń habarlaýynsha, COVID-19 indetine qarsy vaktsına óndirisine Reseı Federatsııasynyń Densaýlyq saqtaý mınıstrligi osy jyldyń tamyz aıynda maquldaýy múmkin. Al álemniń basqa elderi mundaı sheshimdi qyrkúıekte shyǵarýy yqtımal. Qalaı bolǵanda da, 20 shildede Sechenov ýnıversıteti habarlaǵandaı, Reseı Federatsııasy Densaýlyq saqtaý mınıstrliginiń Gamaleıa ulttyq epıdemıologııa jáne mıkrobıologııa ǵylymı ortalyǵy jasaǵan jańa koronavırýsqa qarsy vaktsınany tekserýge qatysqan eriktilerdiń ekinshi tobynyń bári de emhanadan shyǵarylǵan. Eriktiler vaktsınany jaqsy qabyldaǵan. Eshqandaı janama teris áser bolmaǵany jarııalanyp otyr.

Reseı jyl sońyna deıin basqa seriktes eldermen birge 200 mıllıon doza óndirýdi kózdep otyr. Latyn Amerıkasy, Taıaý Shyǵys jáne basqa memleketter Gamaleıa ulttyq epıdemıologııa jáne mıkrobıologııa ǵylymı ortalyǵy jasaǵan reseılik vaktsınany satyp alýǵa qyzyǵýshylyq tanytqan kórinedi.

Óz kezeginde Premer-Mınıstr Asqar Mamın Qazaqstan reseılik preparatty alǵashqylardyń biri bolyp satyp alatynyna úmittenetinin aıtyp ótti.

Qazaqstandyq ǵylymǵa keletin bolsaq, otandyq ǵalymdar da COVID-19 indetine qarsy vaktsınany jasaý úshin belsendi jumys júrgizýde. Dúnıejúzilik densaýlyq saqtaý uıymy tirkegen kandıdattyq vaktsına klınıkalyq synaqtardan qyrkúıek aıynda bastalýy múmkin. Klınıkaǵa deıingi synaq jumystary mamyr aıynyń ortasynda bastalǵan edi. Bul - Qazaqstan Respýblıkasy Bilim jáne ǵylym mınıstrligi Ǵylym komıtetiniń Bıologııalyq qaýipsizdik máseleleri jónindegi ǵylymı-zertteý ınstıtýtynyń damýy ónimi.

Jalpy Qazaqstanda koronavırýsqa qarsy vaktsınanyń bes prototıpi boıynsha jumys júrgizilip jatyr. COVID-19 vaktsınasyn jasaý boıynsha jumystardyń barysyna qyzyǵýshylyq tanytqan azamattar DDSU veb-saıtynda vaktsınaǵa úmitkerler týraly jalpy sholýdy oqı alady.

Vaktsınaǵa úmitkerlerdiń tizimi únemi jańartylyp otyrady.


Joǵary qaraı