Aýa raıy
Astana 5 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Koronavırýstyń beti qaıtty, biraq erkinsýge bolmaıdy

2020 jyldyń 4 tamyz 2020 13:01

NUR-SULTAN. QazAqparat - Elimizde koronavırýs indetin juqtyrǵandar sanynyń kúrt artyp ketýine baılanysty Memleket basshysy Qasym-Jomart Toqaevtyń tikeleı tapsyrmasymen shilde aıynyń 5-inde shekteý sharalary 2 aptaǵa qatańdatylyp, barlyq óńirde qoǵamdyq kólikterdiń, qalaaralyq avtobýstardyń, qalamańy poıyzdarynyń qozǵalysy toqtap, birqatar jolaýshylar poıyzy kestesi qysqartylǵan edi.

Nátıje de kóp kúttirgen joq. Sol aıdyń sońyna qaraı elimizde indet juqtyrýshylardyń sany 29 paıyzǵa tómendep, bir kúnde indet juqtyratyn adamdardyń sany 1500-1600 aralyǵynda turaqtandy. Statsıonarlardaǵy emdelýshilerdiń qatary 43 paıyzǵa, onyń ishinde, reanımatsııalyq palatalardaǵy naýqastar sany 27 paıyzǵa azaıdy. Saýyǵyp shyqqandardyń sany 63 paıyzǵa deıin ósti. Degenmen, mundaı kórsetkishter kóńil kónshiterlik emes bolatyn. Sondyqtan shilde aıynda engizilgen shekteý sharalarynyń oń áserin odan ári arttyrý maqsatynda, sondaı-aq, Qazaqstandaǵy jáne shekaralas memleketterdegi epıdemıologııalyq jaǵdaıdyń kúrdelene túsý yqtımaldyǵyn eskere otyryp, Qasym-Jomart Toqaev Koronavırýs ınfektsııasynyń taralýyna jol bermeý jónindegi vedomstvoaralyq komıssııaǵa karantın sharalaryn kezeń-kezeńimen jeńildetý arqyly taǵy eki aptaǵa uzartýdy tapsyrǵan-dy.

4 aptalyq qatańdatylǵan karantın: Nátıje qandaı?

Al búgin 4 aptaǵa sozylǵan qatańdatylǵan karantın sharalarynyń nátıjeleri Premer-Mınıstr Asqar Mamınniń tóraǵalyǵymen onlaın rejımde ótken Úkimet otyrysynda qaraldy. Mınıstrler kabınetiniń otyrysynda atalǵan másele boıynsha negizgi baıandama jasaǵan Densaýlyq saqtaý mınıstri Alekseı Tsoıdyń dereginshe, 3 tamyzǵa deıin 93 820 naýqas tirkelip, onyń 27 597-si em alyp jatyr. 55 132 adam emdelip shyǵyp, 1 091 adam qaıtys boldy. Jalpy respýblıka boıynsha ótken aptamen salystyrǵanda tirkelgen jaǵdaılardyń 18 paıyzǵa tómendegeni baıqalady. 4 aptalyq karantın kezinde tósek-orynnyń bosaýy 56 paıyzǵa jetti. Onyń ishinde reanımatsııalyq tósek-oryndar 36 paıyzǵa qysqardy. Jazylyp shyqqandar sany 69,4 paıyzǵa artty. Jedel járdem shaqyrý, onyń ishinde koronavırýsqa baılanysty shaqyrtýlar 40 paıyzǵa azaıdy. Vırýstyń reprodýktıvtik kórsetkishi 24 paıyzǵa, ıaǵnı, 1,2-den 0,89-ǵa deıin tómendedi.

«Osylaısha, densaýlyq saqtaý júıesine júktemeniń negizgi kórsetkishterin tómendetýge qol jetkizildi. Qatań shekteý sharalaryn engizgenge deıin reprodýktıvtik kórsetkishi 1,2 bolǵan edi. Karantın engizilgen soń 2 aptadan keıin reprodýktıvtik kórsetkishtiń turaqty túrde tómendeý úrdisin baıqap otyrmyz», - dedi Alekseı Tsoı.

Onyń aıtýynsha, 23 shildeden bastap ınfektsııanyń reprodýktıvtik kórsetkishi turaqty túrde tómendep kele jatyr. Bul kórsetkish 4 tamyzda 0,89-ǵa deıin qysqardy. Bul rette epıdemıologııalyq turǵydan alǵanda atalǵan kórsetkishtiń 1-den tómen bolǵany mańyzdy ekenin atap ótken oryndy. Mundaı kórsetkishke Aqmola men Qostanaı oblystarynan basqa barlyq óńir qol jetkizip otyr.

Aıta keterligi, elimizdiń Densaýlyq saqtaý mınıstrligi Dúnıejúzilik densaýlyq saqtaý uıymynyń Eýropa boıynsha aımaqtyq bıýrosymen birqatar tehnıkalyq konsýltatsııalar ótkizgennen keıin aýrýlardyń halyqaralyq jiktelýiniń kodtaryna sáıkes COVID-19 jaǵdaılaryn jańasha kodtaýǵa jáne esepke alýǵa kóshken bolatyn. ıAǵnı, 1 tamyzdan bastap zerthanalyq rastalǵan COVID-19 jaǵdaılary, sonyń ishinde PTR teris nátıjesi bar pnevmonııa jaǵdaılary biriktirilgen edi. Osyǵan oraı Densaýlyq saqtaý mınıstrligi tamyz aıynyń alǵashqy 10 kúniniń derekteri negizinde reprodýktıvtik kórsetkishine qaıtadan esepteý júrgizetin bolady.

Maska taǵý daǵdyǵa aınalýy kerek

Búginde maska taǵý tek qazaqstandyqtardyń ǵana emes, búkil álem jurtshylyǵynyń kúndelikti daǵdysyna aınalǵany ras. Óıtkeni, halyqaralyq tájirıbe kórsetip otyrǵandaı, maska taǵýdyń mýltıplıkatıvtik áseri 1 aıdan keıin vırýstyń reprodýktıvtilik deńgeıin 4 ese tómendetedi eken. Máselen, maska taǵyp júrgen adamnyń vırýsty ózge adamdarǵa juqtyrý táýekeli 30 paıyzǵa tómen bolady. ıAǵnı, onyń bir aı ishindegi vırýs juqtyrý kórsetkishi 300-den 85 adamǵa deıin qysqarady.

Sondyqtan ózińizdi vırýstan qorǵap, jaqynyńyzǵa janashyrlyq tanytamyn deseńiz kóshege shyqqanda, qoǵamdyq oryndarǵa barǵanda, qoǵamdyq kólikpen qatynaǵanda, ashyq aspan aıasyndaǵy qoǵamdyq oryndarda maska taqqanyńyz jón. Bul mindetti de. Al 5 jasqa deıingi balalarǵa, áleýmettik ara qashyqtyq saqtalǵan jaǵdaıda 5 adamǵa deıin sportpen toptyq jáne jeke aınalysqan tulǵalarǵa, densaýlyǵyna baılanysty taǵa almaıtyn tulǵalarǵa maska taqpaýǵa bolady. Sonymen qatar daladaǵy qoǵamdyq tamaqtaný oryndarynda áleýmettik ara qashyqtyq saqtalǵan kezde maska taqpaýǵa ruqsat etiledi.

«Maska taǵý qoǵamda paıdaly daǵdyǵa aınalýy tıis. Ókinishke qaraı, búginde bul ýaqytsha bolsa da asa qajet bolyp otyr. Osylaısha, mindetti maska rejımin qamtamasyz etý aýrýdyń taralý qarqynyn tómendetý úshin qosymsha faktorǵa aınalady. Óıtkeni, maska taqqan kezde halyq arasynda ınfektsııanyń taralýy qysqarady. Sanıtarlyq talaptardyń kúsheıtilýiniń arqasynda sońǵy 4 aptada barlyq óńirde halyqtyń aýrýǵa shaldyǵý deńgeıiniń aıtarlyqtaı tómendegenin atap ótkim keledi. Ortasha eseppen alǵanda el boıynsha aýrýǵa shaldyǵý 1,5 esege jýyq tómendedi», - dedi Alekseı Tsoı.

Qaı óńirde ınfektsııanyń reprodýktıvtik deńgeıi joǵary?

Úkimet otyrysynda koronavırýs ınfektsııasynyń aldyn alý máselelerine qatysty derekterdi qorytyndylaǵan Premer-Mınıstr Asqar Mamınniń aıtýynsha, jalpy, eldegi sanıtarııalyq-epıdemıologııalyq jaǵdaı jaqsaryp kele jatyr. Koronavırýs ınfektsııasy tirkelgen jaǵdaılardyń táýliktik ósýi 1,2 paıyzdan aspaıdy. Qazirgi ýaqytta emdelip shyqqan adamdar barlyq aýrý juqtyrǵandardyń 69,4 paıyzyn quraıdy, qalǵan naýqastar qajetti medıtsınalyq kómek alýda. Aýrýhanalardyń júktemesi 36 paıyzǵa deıin tómendedi.

«Densaýlyq saqtaý mınıstrliginiń derekteri boıynsha, aptanyń qorytyndysy boıynsha, ınfektsııanyń reprodýktıvtik deńgeıi 1-den tómen kelesi oblystardy atap ótýge bolady. Bul - Atyraý, Aqtóbe, Mańǵystaý, Qyzylorda, Shyǵys Qazaqstan, Jambyl, Túrkistan, Pavlodar oblystary jáne Nur-Sultan, Shymkent, Almaty qalalary. Sonymen qatar, ınfektsııanyń reprodýktıvtik deńgeıi 1-den joǵary kelesi óńirlerde tirkelgen. Bul – Qostanaı men Aqmola oblystary», - dedi Úkimet basshysy.

Osy rette Asqar Mamın atalǵan oblystarda jaǵdaı kúrdeli ekenin jáne osy óńirlerdiń ákimderi epıdemııaǵa qarsy sharalardy kúsheıtýge asa nazar aýdarýlary qajettigin basa aıtty.

«Aýrý juqtyrǵan azamattardy emdeý jáne vırýstyń taralýyn tómendetý jónindegi qarqyndy jumysty, onyń ishinde sanıtarııalyq normalardy, maska taǵý rejımin saqtaý týraly túsindirý naýqanyn jalǵastyrý kerek. Qazirgi tańda, álemdik statıstıka 126 memlekette aýrý juqtyrǵandar sanynyń jańa ósimin kórsetip otyr. Pandemııanyń jańa tolqyny kúzde paıda bolýy múmkin jáne oǵan daıyn bolýymyz kerek. Ári onyń aldyn alý úshin barlyq belgilengen talaptardyń saqtalýyn qamtamasyz etip, josparlanǵan sharalar kesheniń iske asyrý qajet», - dedi Premer-Mınıstr.


Joǵary qaraı