Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qýańshylyq: Mańǵystaýlyq eriktiler sharýalarǵa jem-shóp aparyp berdi

2021 jyldyń 22 tamyz 2021 00:41

AQTAÝ. QazAqparat – Mańǵystaý oblysynyń eriktiler toby Túpqaraǵan aýdan ákimdigimen birlesip qýańshylyqtan zardap shekken sharýalarǵa kómektesti, dep habarlaıdy QazAqparat tilshisi.

Aýdan ákimdiginiń habarlaýynsha, shara «Klýb dobrıakov Aktaý» eriktiler qozǵalysynyń muryndyq bolýymen júzege asyrylǵan.

Óńiregi qýańshylyqqa baılanysty atalǵan eriktiler toby Qazaqstan turǵyndarynan kómek suraǵan. Búginge deıin eriktiler 8 mln teńge qarajat jınaǵan. Olar 21 tamyzda jınalǵan qarjynyń bir bóligine Túpqaraǵan aýdanyndaǵy Qańǵa jerinde ornalasqan 4 sharýa qojalyǵyna, atap aıtqanda «Medet» sharýa qojalyǵyna 100 qap, «Meńdihanov Muhanbetkereı», «Serik Seńgirbaev», «Abat» sharýashylyǵyna 50 qaptan jem jetkizdi.


«Osyndaı qıyn-qystaý kezeńde kómek qolyn sozyp jatqan erikti jastarǵa jáne ákimdik qyzmetkerlerine zor alǵysymdy bildiremin. Bul biz úshin kómek boldy», - dedi «Medet» sharýa qojalyǵynyń ıesi Aqsyrǵa Talasbaeva.

Qazirgi ýaqytqa deıin óńirdegi eriktiler qozǵalysy jalpy 10 sharýa qojalyǵyna kómek kórsetken.

«Biz Mańǵystaý oblysyndaǵy qýańshylyqqa baılanysty turǵyndar arasynan kómek retinde qarjy jınaı bastadyq. Bul rette qazaqstandyqtardan bólek Ońtústik Koreıa, Reseı Federatsııasy men Qyrǵyz eliniń azamattary qalys qalmaı, kómek kórsetti. Ár adam múmkindiginshe 200, 500, 1000 teńgeden bolsa da qarjy aýdardy. Nátıjesinde 8 mln teńge jınaldy. Búginge deıin 10 qojalyqqa kómek kórsettik. Mal azyǵyn tıisti jerge jetkizý úshin júk kólikterin jaldadyq. Árıne, bul jumystar qosymsha qarjyny talap etetin. Al búgin sharýalarǵa shópti jetkizý úshin Túpqaraǵan aýdany ákimdigi kólikpen kómektesti», - dedi «Klýb dobrıakov Aqtaý» eriktiler qozǵalysynyń jetekshisi Sabına Beısembaeva.


Joǵary qaraı