Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qýǵyn-súrgin qurbandaryn aqtaý: Qaraǵandy oblysynda qansha qujat qupııasyzdandyrylady

2021 jyldyń 14 qyrkúıek 2021 20:56

NUR-SULTAN. QazAqparat – Qaraǵandy oblysynda saıası qýǵyn-súrgin qurbandaryn tolyq aqtaý jónindegi óńirlik komıssııanyń tóraǵasy, oblys ákiminiń orynbasary Abzal Núkenov qupııasyzdandyrýǵa jatatyn qujattar týraly aıtyp berdi, dep habarlaıdy QazAqparat tilshisi.

Aıta keteıik, búgin qýǵyn-súrginnen zardap shegip qurban bolǵan kýlaktar, baılar, jartylaı feodaldar (orta sharýalar) jáne sharýalar týraly zertteý, oǵan qorytyndy jáne usynymdar daıyndaý jóninde tájirıbe bólisýge arnalǵan onlaın-semınar ótti.

Semınar jumysyna Almaty, Shymken qalalary, Almaty, Shyǵys Qazaqstan, Jambyl, Pavlodar, Qaraǵandy, Túrkistan oblystaryndaǵy óńirlik komıssııalardyń Jumys toptarynyń jetekshileri men músheleri, ǵalym-sarapshylar qatysty.

«Qaraǵandy óńiri ózge eldi-mekennen jer aýdarylyp, qýǵyn-súrginge ushyraǵan san myńdaǵan adamdar panalaǵan qasıetti ólkeniń biri. Oblys aýmaǵynda qasiretke toly KARLAG, Steplag sekildi GÝLAG júıesiniń birneshe iri lagerleri bolǵanyn atap ótken jón. Keńestik dáýirdegi solaqaı saıasattyń kesirinen jáne zulmat jyldary jazyqsyz japa shegip, qurban bolǵandardy eske alý, esimderin ulyqtaý jumystary Qaraǵandy oblysynda osy kúnge deıin túrli baǵyttarda uıymdastyrylyp keldi. Saıası qýǵyn-súrgin qurbandaryn tolyq aqtaý jáne tarıhı ádilettilikti tolyq qalpyna keltirý baǵytyndaǵy Memlekettik ári óńirlik komıssıalardyń qyzmeti joǵaryda atalǵan salalarǵa jańa serpin beredi degen oıdamyz», - dep toqtaldy oblys ákiminiń orynbasary.

Osy oraıda ol jyl basynan beri Qaraǵandy oblysyndaǵy óńirlik komıssııasy tarapynan atqarylǵan jumystarmen tanystyrdy.

«Óńirlik komıssııa quramy Jobalyq keńse jibergen Nusqaýlyqqa sáıkes jańartylyp jáne aımaqtaǵy óńirlik ǵylymı-sarapshylar áleýeti tartyldy. Qazirgi ýaqytta óńirlik komıssııanyń úsh otyrysy, jumys toptarynyń eki otyrysy ótti. Jobalyq keńseniń 2021 jylǵy maýsym aıyndaǵy arnaıy tapsyrmasyna sáıkes, bastapqy jumys toptarynyń ornyna jańadan 7 baǵyt boıynsha taqyryptyq Jumys toptary quryldy», - dedi A. Núkenov.

Sondaı-aq, A.Núkenov qazirgi ýaqytta quqyqtyq statıstıka jáne arnaıy esepke alý Basqarmasynyń vedomostvolyq muraǵatynda 180 myńnan astam muraǵattyq ister saqtalǵanyn habarlady. Oǵan qosa, májbúrlep qonys aýdarylǵandar, jer aýdarylǵandar jáne basqa kategorııalar boıynsha 61 624-i qupııasyzdandyrylǵan, qalǵan 118 546-sy qupııasyzdandyrýǵa jatady. Abzal Núkenovtyń sózine qaraǵanda, Memlekettik komıssııa jáne Óńirlik komıssııanyń Jumys toptary qyzmeti týraly ótkizilgen sharaǵa Buqaralyq-aqparattyq jeliler men áleýmettik jarııalanymdarda keńinen uıymdastyrylyp jatyr.


Joǵary qaraı