Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Quqyq buzýshylyqtyń aldyn alý jónindegi keshendi jospar ózektendirildi - ІІM

2021 jyldyń 22 qarasha 2021 11:28

NUR-SULTAN. QazAqparat – Quqyq buzýshylyqtyń aldyn alý jónindegi keshendi jospar ózektendirildi. Bul týraly QR ІІM baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«QR Úkimeti janyndaǵy Quqyq buzýshylyqtyń aldyn alý jónindegi vedomstvoaralyq komıssııa otyrysynda Іshki ister mınıstri Erlan Turǵymbaev Qazaqstan Respýblıkasynda quqyq buzýshylyqtyń aldyn alý jónindegi 2020-2022 jyldarǵa arnalǵan keshendi jospardyń ózektiligi týraly habarlady. Josparǵa esirtki qylmysyna qarsy is-qımyl, jol qaýipsizdigin qamtamasyz etý jáne brakonerlikpen kúres salasynda qosymsha 15 jańa is-shara engizildi», - dedi ol QR ІІM baspasóz alańynda ótken brıfıng barysynda.

Onyń atap ótýinshe, ózgeristerdi eskere otyryp, Bilim jáne ǵylym mınıstrligi kámeletke tolmaǵandar arasyndaǵy quqyq buzýshylyqtyń aldyn alý máseleleri boıynsha zańnamaǵa túzetýler engizdi. Sonymen qatar, atalǵan jaǵdaıdy eskere otyryp, keshendi jospardyń 12 is-sharasy redaktsııalandy.

«ІІM júıesinde aýqymdy ózgerister júrip jatyr. Memleket basshysy Qasym-Jomart Toqaevtyń nusqaýlaryna sáıkes reformalardyń negizgi baǵyty polıtsııa jumysynyń servıstik modeline kóshý bolyp tabylady. Osyǵan baılanysty quqyq buzýshylyqtardyń aldyn alý jónindegi keshendi josparǵa «polıtsııa jumysynyń servıstik modelin engizý jónindegi tujyrymdamany» ázirleý engizildi», - dep atap ótken Erlan Turǵymbaev atalǵan otyrys barysynda.


Joǵary qaraı