Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Kúlekbaev jezókshelerdi «Allahtan qoryqpasańdar, bárińdi jaryp jiberemin» dep qorqytqan

2016 jyldyń 24 qazan 2016 11:18

ALMATY. QazAqparat - Búgin Almatydaǵy tergeý abaqtysynda Rýslan Kúlekbaevtyń isine qatysty basty sot otyrysy ótip jatyr. Sot barysynda memlekettik aıyptaý tarapy Kúlekbaevtyń Sodnıkovany óltirýine qatysty aıyptaý qorytyndysyn oqydy.

«Kúlekbaev 2016 jyldyń 17-18 shildesinde Jansúgirov kóshesindegi "Aıat" qonaqúıinde jezóksheler júrýi múmkin ekenin aldyn ala josparlap, óziniń dinı áleýmettik kózqarasyna qaıshy bolǵandyqtan, jezókshelikpen aınalysatyn áıelderdi óltirý maqsatynda atalǵan orynǵa barǵan. Qonaq úı aýlasynda turǵan Imanǵalıevke tıesili Kıa Rıo avtokóligine baryp, onyń ishinde jezóksheler bar ekenin boljap, ishinde otyrǵan Imanǵalıevten terezesin ashýdy suraǵan. Kólik terezesi ashylǵannan keıin, birneshe eskertý jasap, oǵan kónbegen soń artqy oryndyqta otyrǵan Sodnıkovany basynan atyp óltirgen. Osy kezde Imanǵalıev qashyp shyqqan. Kúlekbaev onyń artynan oq atqanymen, tıgize almaǵan. Ýaqytyn tıimdi paıdalaný maqsatynda kólikke kelip, ishinde otyrǵan ekinshi Ómirzaqovany alyp, Sodnıkovanyń máıtin alyp, qalada júrgen. Jolda Ómirzaqovaǵa «Sender Allahtan qoryqpaısyńdar! Allahtan keshirim sura?! Allahtyń jolyna qarsy shyqsańdar, bárińdi jaryp jiberemin» dep qorqytqan. Ómirzaqova ómirine qaýip tóngendikten keshirim surap, óz ámıanyn Kúlekbaevqa bergen. Kúlekbaev ishinde 7 myń teńgesi bar Ómirzaqovanyń ámııanymen qosa, kólik ishinde turǵan Imanǵalıevtiń ishinde 42 000 teńgesi bar ámııanyn alǵan. Jolda kóliktiń qyzyl baǵdarshamǵa toqtaǵanyn paıdalanyp, Ómirzaqova odan qashyp shyǵyp qutylǵan. Kúlekbaev ony qýmaǵan. Osydan keıin Kúlekbaev qaladaǵy bir dúken aldyna kelip kólikti qaldyryp ketken», dedi prokýror Jarqyn Baqashbaev.

Aıta keteıik, Almaty qalasynyń Qylmystyq ister jónindegi mamandandyrylǵan aýdanaralyq sotyna R.Kúlekbaevqa qatysty qylmystyq isti atalǵan sot sýdıasy Erlan Bolatov júrgizip jatyr. Kúlekbaev birneshe qanquıly tonaý jáne qaraqshylyq áreketterge qatysty bolyp otyr. Buǵan deıin habarlanǵandaı, tergeý toby 57 sot saraptamasy men zertteýler júrgizdi jáne bolǵan oqıǵanyń barlyq jáıtterin anyqtaý maqsatynda 200-den astam kýágerler men oqıǵany kórgen adamdardy tergedi. 2016 jyldyń 12 qazanynda 61 tomnan turatyn qylmystyq is sotqa joldandy. R.Kúlekbaevqa 8 quqyq qorǵaý jáne arnaıy organ qyzmetkerlerin jáne 2 beıbit turǵyndy óltirdi, terrorlyq akt jasady degen aıyp taǵyldy. Sonymen qatar, ol 3 beıibit turǵyndy óltirmek boldy dep aıyptalyp otyr.

Naqtyraq aıtqanda, aıyptalýshyǵa qatysty QR Qylmystyq kodeksiniń (QR QK) 255-baby 4-tarmaǵy (lańkestik akt), 99-baby 2-tarmaǵy (eki nemese odan da kóp adamdy óltirý), 24-babynyń 3-tarmaǵy (óltirý úshin shabýyl jasaý), 192-bap 4-tarmaq (top adamǵa qaraqshylyq shabýyl), 287-bap 4-tarmaq (zańsyz qarý tasymaldaý), 288-bap 2-tarmaq (qarýdy zańsyz jasaý), 291-bap 4-tarmaq (qarý urlaý), 200-bap 4-tarmaq (kólik urlaý), 126-bap 2-tarmaq (adamdy zańsyz bas bostandyǵynan aıyrý) boıynsha qylmystyq is qozǵalǵan.

Sondaı-aq, R.Kúlekbaevpen birge sotqa atys qarýyn zańsyz saqtap, ózimen birge alyp júrip, daıyndap, R.Kúlekbaevpen birge M. atty kásipkerdiń úıine qaraqshylyq shabýyl uıymdastyrǵan R.Lıý, J.Saparbekov, D.Ásembekuly, E.Qusaıynov, N.Ábdimomyn da sot zalynda.

Aıyptalýshy N.Ábdimomynǵa ruqsatsyz qaladan ketýine tyıym salynǵan. R.Lıýǵa qatysty QR QK 188-babynyń 4-tarmaǵy, 288-babynyń 1-tarmaǵy, 287-babynyń 4-tarmaǵyna qatysty qylmystyq is qozǵaldy. J. Saparbekovtiń ústinen QR QK 192-baby 4-tarmaǵy; 287-bap 4-tarmaq boıynsha qylmystyq is qozǵaldy. E. Qusaıynovqa qatysty QR QK 192-babynyń 4-tarmaǵy boıynsha, D. Ásembekulyna qatysty QR QK 192-babynyń 4-tarmaǵy, N. Ábdimomynǵa qatysty QR QK 287-babynyń 4-tarmaǵy boıynsha qylmystyq is qozǵaldy.

Joǵary qaraı