Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qurlyqtyq hokkeı lıgasy: «Barys» elordada «Lokomotıvke» ese jiberdi

2021 jyldyń 22 qazan 2021 21:48

NUR-SULTAN. QazAqparat - Búgin astanalyq «Barys» Qurlyqtyq hokkeı lıgasyndaǵy kezekti oıynyn elordada Reseıdiń «Lokomotıv» (ıAroslavl) komandasyna qarsy ótkizdi, dep habarlaıdy QazAqparat tilshisi.

Kezdesý barysynda eki komanda tartysty oıyn ótkizdi. Esepti birinshi bolyp reseılik hokkeıshiler ashty.

Oıynnyń 15-mınýtynda Artem Anısımov esep ashsa, 27-mınýtta Maksım Shalýnov esepti ústemeleı tústi.

Budan keıin «Barys» hokkeıshileri alǵa qaraı umtyldy. Degenmen ekinshi kezeńde tablodaǵy esep ózgerissiz qaldy.

Úshinshi kezeńde qazaqstandyq komanda gol soǵý múmkindigin izdedi. Nátıjesinde 43-mınýtta ıAkýb Lılıa kózdegen nysanadan múlt ketken joq. Qazaqstandyq hokkeıshiler endigi kezekte tarazy basyn teńestirýge kúsh saldy. Alaıda óziniń qaqpasyna qatarynan eki gol jiberip aldy. Bul goldar 54-mınýtta Alekseı Marchenkonyń, 57-mınýtta Pavel Kýdrıavtsevtiń enshisine jazyldy.

Aıta ketsek, elordalyq klýb úshin «Lokomotıv» - qolaısyz qarsylastyń biri. Eki komanda búginge deıin 24 márte kezdesken.

Onyń 8-inde qazaqstandyq hokkeıshiler jeńiske jetse, qalǵanynda qarsylas klýbtyń mereıi ústem boldy.

Eske salsaq, budan buryn «Barys» belarýstik «Dınamoǵa» ese jiberdi.

Endi «Barys» kelesi oıynyn 24 qazanda Reseıdiń «Severstal» (Cherepovets) komandasyna qarsy ótkizedi.


Avtor Ádiljan Úmbet
Basty sózder: Sport,
Joǵary qaraı