Qus tumaýynan zardap shekkenderge ótemaqy tolyq tólendi – AShM

NUR-SULTAN. QazAqparat - QR Aaýyl sharýashylyǵy mınıstrligi veterınarııalyq baqylaý jáne qadaǵalaý komıteti joǵarǵy patogendi qus tumaýynan ólgen qustar úshin ótemaqyny tolyq tóledi, dep habarlaıdy QazAqparat.

Vedomstvonyń málimetine sensek, ótken jyldyń tamyz jáne qyrkúıek aılarynda elimizdiń veterınarııalyq baqylaý jáne qadaǵalaý komıteti Reseıdiń keı aımaqtarynan Qazaqstanǵa tiri qus pen qus sharýashylyǵy ónimderin alyp kelýge jáne olardyń tranzıtine ýaqytsha shekteý engizgen.

Biraq AShM tarapynan jasalǵan jedel sharalarǵa qaramastan joǵarǵy patogendi qus tumaýy elimizdiń 8 oblysyna jabaıy qustar arqyly taraǵan bolatyn.

Epızootııaǵa qarsy is-sharalardyń aıaqtalýyna jáne qustardyń ólim-jitiminiń jańa jaǵdaılarynyń tirkelmeýine baılanysty qazirgi ýaqytta osy óńirlerde karantın alynyp tastaldy.

Aýrý oshaqtaryn oqshaýlaý jáne joıý barysynda 1,9 mln qus joıyldy, onyń 97% - 4 qus fabrıkasyna tıesili.

2020 jyldyń jeltoqsanynda veterınarııalyq baqylaý jáne qadaǵalaý komıtetiniń «Respýblıkalyq epızootııaǵa qarsy otrıad» RMM ortasha aılyq naryqtyq quny boıynsha indettiń kesirinen ólgen qus ıelerine ótemaqy tóleý jumystaryn júrgizdi.

Veterınarııalyq-sanıtarııalyq qaǵıdalarǵa sáıkes tárkilengen jáne joıylǵan qustardyń qunyn óteý «joǵarǵy patogendi qus tumaýy» indetinen ólgenin rastaıtyn qujattar negizinde atqaryldy. Olar bolmaǵan jaǵdaıda tólem júrgizilmeıdi.

Barlyq usynylǵan qujattar boıynsha tólem tolyq kólemde júrgizildi.

Atap aıtqanda, jeke qosalqy sharýashylyqtaryna 94 470 bas úshin 295,3 mln. teńge tólendi. «Agroınterptıtsa» JShS 433 066 qus úshin 445,9 mln teńge tólendi.

Búgingi tańda «Respýblıkalyq epızootııaǵa qarsy otrıad» RMM-de tólenbegen qaryz joq.