Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qysqy Olımpıada: Qazaqstanda sporttyń 8 túrinen 82 joldama bar

2022 jyldyń 18 qańtar 2022 20:50

NUR-SULTAN. QazAqparat – 17 qańtar kúni aq Olımpıada oıyndaryna arnalǵan barlyq irikteý jáne reıtıngilik dodalar aıaqtalyp, lıtsenzııalardyń basym bóligi úlestirildi. Nátıjesinde Qazaqstandyq atletter sporttyń 8 túrinen 82 joldama aldy, dep habarlaıdy QazAqparat.

QR Ulttyq olımpıada komıtetinen málim etkendeı, shańǵy jarysy boıynsha qorjynda 30 joldama bar. Frıstaılshylar toǵyz joldamaǵa ıe bolǵan. Sonyń ishinde mogýl boıynsha – 5, akrobatıka boıynsha 4 joldama bar. Konkıshiler men bıatlonshylar – 12, short-trekshiler 9 joldamany qorjynǵa saldy. Taý shańǵysy men shańǵymen tuǵyrdan sekirý sportynan el quramalary 4 joldamadan enshilese, shańǵy qossaıysynan otandyq sportshylar eki lıtsenzııaǵa ıe boldy.

Búgingi tańda olımpıadalyq qurama sapyna 32 sportshy endi. Aıta keterligi, bul sportshylardyń sońǵy ári naqty sany emes. Sebebi UOK keıbir sport túrlerinen halyqaralyq federatsııalardyń lıtsenzııalardy qaıta bólý, úlestirý nátıjelerin kútýde. Atap aıtqanda, bıatlon, shańǵy jarysy, mogýl jáne akrobatıkadan taǵy da joldamalar úlestirilýi múmkin. Olımpıada oıyndaryna qatysatyn sportshylardyń sońǵy ári naqty tizimi 20 qańtardan keıin belgili bolady.

Búgin, 18 qańtar kúni Mádenıet jáne sport mınıstri Dáýren Abaev XXIV qysqy Olımpıada oıyndarynyń daıyndyǵy jaıynda jıyn ótkizdi. Mınıstr Olımpıada oıyndarynda ulttyq qurama aldynda turǵan birqatar mindetterge toqtaldy.

«El úshin qazirgi qıyn jaǵdaıda, sonyń ishinde koronavırýs ınfektsııasynyń kóbeıýi kezinde biz sportshylarymyzǵa aldaǵy Olımpıadada dopıngisiz, janjalsyz, laıyqty óner kórsetý mindetin qoıdyq. Árıne, árbir sportshy jetistiktiń shyńy sanalǵan Olımpıada medaline umtylady. Al biz olımpıadashylarymyzdyń kez kelgen jetistigine qýanamyz. Bul úshin memleket qoldan kelgenniń barlyǵyn jasap, sportshylardy daıyndaý, sapaly jattyǵý, oqý-jattyǵý jıyndary jáne irikteý jarystaryna qatysý qarjylandyryldy», - dedi Mádenıet jáne sport mınıstri.

«Búgingi kúnniń basty mindeti – sportshylar men jattyqtyrýshylar densaýlyǵy men qaýipsizdigin saqtaý. Olardyń kópshiligi, ıaǵnı irikteý týrnırlerin aıaqtaǵandar sońǵy apta boıy jabyq karantındik aımaqtarda ornalasty. Onda daıyndyqtyń sońǵy kezeńi júrip jatyr. Álemdik dodalar aıaqtalǵan soń Beıjińge ushpas buryn sportshylar karantınde ýaqyt ótkizedi», - deıdi UOK bas hatshysy Andreı Krıýkov.

Oıyn kezinde Olımpıada aýylynyń turǵyndarynan kún saıyn PTR-test alynyp, densaýlyǵy tekseriledi, jazdaǵy Tokıo Olımpıadasynyń úlgisi boıynsha qatysýshylardyń ornalasqan jeri arnaıy telefon qosymshasy arqyly baqylanady.

Qazaqstan quramasy 27 qańtar kúni «Air Astana» charterlik reısimen Nur-Sultannan Almaty arqyly Beıjińge attanady. Aıta keterligi, Qazaqstan quramasynyń olımpıadalyq formasynyń tanystyrylymy 20 qańtarǵa josparlanǵan.

Qysqy Olımpıada oıyndary 4 aqpan kúni bastalady jáne 109 medal jıyntyǵy sarapqa salynady.


Joǵary qaraı