Aýa raıy
Astana -1 °S
Almaty -2 °S
valıýta baǵamy
USD 421.58
EUR 496.83
RUB 5.53
CNY 62.20

Qytaıdyń koronavırýsqa qarsy vaktsınasynyń baǵasy belgili boldy

2020 jyldyń 15 qyrkúıek 2020 09:35

BEIJІŃ. QazAqparat – China National Biotech Group (CNBG) farmatsevtıkalyq kompanııasy óndiretin koronavırýsqa qarsy qytaılyq vaktsınanyń eki dozasynyń baǵasy 1000 ıýannan (shamamen 146 dollar) tómen bolady, dep habarlaıdy QazAqparat CGTN-ge silteme jasap.

«China National Biotech Group ázirlegen eki vaktsına bıylǵy jyldyń jeltoqsan aıynda naryqqa shyǵady dep josparlanyp otyr. Vaktsınalardyń eki dozasy 1000 ıýannan tómen bolady», - dedi CNBG bas zań keńesshisi Chjoý Sýn.

Onyń aıtýynsha, kompanııanyń eki vaktsınasy BAÁ, Bahreın, Perý, Morokko, Argentına jáne Iordanııany qosa alǵanda, 10-nan astam elde qaýipsizdigi men tıimdiligi tekseriletin synaqtyń úshinshi kezeńinen ótýde.

«Vaktsınatsııalanǵan on myńdaǵan adam COVID-19 indetin juqtyrý qaýpi joǵary elder men aımaqtarǵa sapar shekti. Osy ýaqytqa deıin olardyń eshqaısysy aýrý juqtyrmaǵan. Bul vaktsınalardyń tıimdiligin dáleldeıdi», - dep atap ótti Chjoý Sýn.

CGTN materıalynda klınıkalyq zertteýlerdiń nátıjeleri CNBG vaktsınasynyń eki dozasyn eki-tórt apta aralyǵynda alǵan adamdarda alǵashqy dozadan jeti kún ótken soń antıdeneler túzilgenin kórsetti.

CNBG vaktsınalary adamdy koronavırýstan 1-3 jyl aralyǵynda qorǵaı alady. Bes aıdan astam ýaqyt buryn vaktsınatsııalanǵan alǵashqy 180 eriktini baqylaý kezinde bul toptaǵy antıdeneler deńgeıiniń «joǵary shekte jáne olardyń tómendeý belgileri joq» ekenin kórsetti.

Sonymen qatar, CNBG olardyń vaktsınalary COVID-19-dyń barlyq shtamyn qorǵaýǵa qabiletti ekenin aıtty.

«Shynynda da, vırýstyń mýtatsııaǵa ushyraıtyn birneshe kishi túrleri bar, biraq onyń negizgi gendik tizbegi men aqýyz qurylymy túbegeıli ózgergen joq. Vaktsınalar aldaǵy birneshe jylda osy mýtatsııalanǵan vırýstarmen kúresýde eshqandaı qıyndyq týǵyzbaıdy», - dedi CNBG bas zań keńesshisi Chjoý Sýn.

«China National Biotec Group» kompanııasynyń jyldyq óndiristik qýaty – 300 mln dozany quraıdy. Úsh-alty aıdan keıin vaktsınalar óndirisin 1,3 mlrd dozaǵa deıin ulǵaıtýy múmkin.

Rýslan Súleımenov


Joǵary qaraı