Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qytaılarǵa qazaq bıin úıretip júrgen bıshi qyz - Sheteldegi qazaq tildi BAQ-qa sholý

2021 jyldyń 23 mamyr 2021 11:19

NUR-SULTAN. QazAqparat- «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Gaýhar Baqytqyzy: Men álemdi bı arqyly túsinemin - CNR

Qytaılyq kazakcnr.com saıtynda Qytaıdyń teńiz jaǵalaýyndaǵy Shenchjen qalasynda jeke bı stýdııasyn ashqan qandasymyz bıshi Gaýhar Baqytqyzynyń suhbatty jaryq kórdi.

«Shenchjen qalasy (Shēnzhèn) - Qytaıdaǵy alǵashqy qurylǵan arnaıy ekonomıkalyq aımaq. Ol qazirgi tańda damyp kele jatqan, iri qalalardyń biri. Áıtsede osy ekonomıkasy qarqyndy damyǵan, zamanǵa saı boı túzegen jańa qalanyń ulttyq mádenıet pen dástúrden alshaqtaı túskeni anyq baıqalady. Sondyqtan el aýzynda bul qalanyń «Mádenıet shóli» degen aty bar. Mine osyndaı jahandyq úrdiske jutylyp, adamzattyń tól mádenıetinen alshaqtaı túsken alyp qalada jeke bı stýdııasyn ashyp, «mádenıet gúlin» egip júrgen qazaq qyzynyń eńbegi zor», - dep jazdy CNR.








Atalǵan BAQ-tyń dereginshe, qazirgi kúni Shenchjen qalasynda turyp jatqan Gaýhar Baqytqyzy Qytaıdyń Altaı aımaǵynyń týmasy. 2014 jyly Beıjińdegi Ortalyq ulttar ýnıversıtetiniń bı akademııasyn bitirgen. Ol Shyńjań bıshileri odaǵynyń jáne Shenchjen bıshileri odaǵynyń múshesi. Shyńjań án-bı ansamblinde bıshi bolǵan. Gaýhar 2014 jyly Hýh-Hoto qalasynda ótken Qytaıda turatyn sany az ulttardyń bı festıvaline qatysyp, bas júldeni jeńip alǵan. Sonymen birge 11-shi Qytaı óner festıvaliniń, 15-shi «Venhýa syılyǵynyń», «Tıanshandaǵy mahabbat» spektakli qoıylymnyń altyn medaldaryn qanjyǵalaǵan. Gaýhar Baqytqyzy 2016, 2017 jyldary Qazaqstan, Ózbekstan, Makao, Úndistan, Býtan jáne basqada kóptegen elderge óner saparymen baryp qazaqtyń bıin bılep, álemge nasıhattaǵan. Sondaı-aq, bıshiniń qazaqtyń ulttyq bı óneri týraly qaýzaǵan maqalalary Qytaıdaǵy belgili basylymdarda jaryq kórgen.











«Bı men úshin arman-tilek, táýeldilik, tabandylyq, izdenis jolym. Meniń álemdi tanyp, qabyldaıtyn eń úlken terezem. Sondyqtan men álemdi bı arqyly túsinemin dep aıtamyn. Ózim kishkentaı kezimnen bılegendi unatam. Bı úıirmelerinde tárbıelendim. Men osy ýaqytqa deıin ultymyzdyń bı ónerin ózge jurtqa tanytsam, tamashalatsam dep maqsat qoıdym. Óner saparymen álem elderin aralaǵanda kóbinese «Qara jorǵa» bıin bılep shyǵatynmyn. Sonda kóremen erekshe qyzyǵyp, qaıtalap bıleýge usynys jasaıtyn», - deıdi Gaýhar Baqytqyzy.





Sonymen birge bıshi suhbatynda Shenchjen qalasyndaǵy bı stýdııasynyń qalaı jumys istep jatqany týraly aıtyp bergen.


«Biz bala kúnimizden qazaqtyń toıy men túrli merekesindegi án men bıdi kórip óstik. Bul orta bizdi mádenıetti , ónerdi tanyp-bilýge, ony jaqsy kórip, áýestenýge úıretti. Al myna Shenchjen sekildi álemdik fınansy, ekonomıka, saýdanyń ortalǵy sanalatyn qalada adamdardyń ómiri tym qarbalas ótip jatyr. Meniń shákirtterim osynda kelgende bı úırenip, sonymen birge demalyp, sergip qalady. Shenchjen qalasy Gonkongqa jaqyn orynalasqan. Sondyqtan bolar adamdar Eýropa mádenıetin kóbirek qabyldap jatady. Soǵan qaramastan meniń shákirtterimniń arasynda qazaqtyń «Qara jorǵa» bıin óz bolmysymen bıleıtin bıshi qyz bar. Bıdi úırený barysynda qıyndyq boldy. Mende, shákirtimde sol qıyndyqtardy jeńip, úlken qulshynyspen, qajyrly eńbekpen sátti úırenip shyqtyq. Sonyń arqasynda Hýnan telearnasy uıymdastyrǵan alaman bı baıqaýynda sol qytaı ultynyń 10 jastaǵy qyzy «Qara jorǵa» bıin bılep júldeger atandy», - deıdi bıshi Gaýhar Baqytqyzy.


Mońǵolııa OSK halyqaralyq uıymdardy prezıdent saılaýyna shaqyrdy - - KAZNEWS





Mońǵolııa OSK eldegi prezıdent saılaýyna baqylaý jasaý úshin Eýroodaqqa múshe eldermen birqatar halyqaralyq uıymdarǵa resmı túrde shaqyrtý joldady, dep jazady Mońǵolııanyń Kaznews aqparattyq portaly.

«Buǵan deıin Eýropadaǵy qaýipsizdik jáne yntymaqtastyq uıymy (EQYU) – nyń Demokratııa ınstıtýty men adam quqyǵy jónindegi qyzmeti Mońǵolııada ótetin Prezıdent saılaýyna baqylaý jasaıtynyn habarlaǵan. Mońǵolııada Prezıdent saılaýy 9 maýsym kúni ótkiziledi», - dep jazdy Kaznews.


Ózbekstanda «Jańa Ózbekstan» atty bilim ordasy ashylady - «ÓzA» aqparattyq agenttigi





Prezıdent mektebin bitirgen túlekteri úshin «Jańa Ózbekstan» joǵary oqý orny ashylady, dep jazady Ózbekstannyń «ÓzA» memlekettik aqparattyq agenttigi.

Atalǵan BAQ-tyń jazýynsha, Ózbekstan Premer-Mınıstriniń orynbasary Behzod Mýsaev jastarmen suhbat barysynda, aldaǵy ýaqytta Ózbekstandaǵy bilim naryǵy taǵy bir úzdik oqý ornymen tolyǵatyny jaıly aıtqan. Jastarmen kezdesýde «Jańa Ózbekstan» ýnıversıtetinde bilikti mamandar, áleýetti oqytýshylardy jáne shetelden yqpaldy kadrlardy tartý jaıly málimetter aıtylǵan.





«2021 jyldyń 1 qyrkúıeginen bastap Prezıdenttik mektepter eldiń barlyq aımaqtarynda jumys isteı bastaıdy. Munda bilim berý metodıkasy Kembrıdjdiń bilim berý júıesine negizdelgen. Memleket basshysy osy mektepterge barǵanda máseleniń ekinshi jaǵyn qarastyryp, suraq qoıdy: Kembrıdj bilim berý júıesin bitirgen balalar qaıda oqıdy? Osy maqsatta Ózbekstanda «Jańa Ózbekstan» ýnıversıtetin qurý boıynsha alǵashqy qadamdar jasaldy «, - dedi Mýsaev suhbat barysynda.


Shentop Nyǵmatýlınmen telefonda sóılesti - TRT





Túrkııa Uly Ulttyq Májilisiniń tóraǵasy Mustafa Shentop Qazaqstan Májilisiniń Tóraǵasy Nurlan Nyǵmatýlınmen telefon arqyly sóılesti, dep habarlaıdy Túrkııa Radıo Televızııa portaly.

Atalǵan BAQ-tyń jazýynsha, áńgime barysynda Mustafa Shentop baýyrlas jáne dos Qazaqstannyń túrik ulty úshin erekshe ekenin aıtqan.

«Kovıd-19 indetine qarsy qazaqstandyq vaktsınanyń sáýirdiń sońynda qoldanysqa berilgenin jáne osy vaktsınanyń bir bólimi Túrkııada qutylarǵa quıylatynyn estidim. Osy saladaǵy tabystaryńyzben shynaıy quttyqtaımyn. Qarym-qatynastarymyzdy bekemdeı túsý úshin prezıdentterimizdiń, bizdiń ár órede sheshimdilik kórsetýimiz mańyzdy», - deıdi Mustafa Shentop.

Al Qazaqstan Májilis tóraǵasy Nurlan Nyǵmatýlın áńgime barsynda, Túrkııa men Qazaqstan arasynda ǵasyrlyq tarıhı baılanystar bolǵanyn eske salyp, Mustafa Shentopty kúz aılarynda ótýi josparlanǵan Túrkitildes elder Parlamenttik Assambleıasynyń (TúrikPa) 10-shy Jalpy Keńes jınalysyna qatysý úshin Qazaqstanǵa shaqyrǵan.



Avtor Baqytjol Kákesh
Basty sózder: Qandastar, BAQ,
Joǵary qaraı