Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qyzmetkerdiń zeınetaqysyz qalmaýyna jumys berýshi de jaýapty bolady

2021 jyldyń 6 qazan 2021 14:47

NUR-SULTAN. QazAqparat - Buǵan deıin eńbekke jaramdy adamnyń qartaıǵan shaǵynda zeınetaqysyz qalmaýyna memleket pen azamattyń tikeleı jaýapty bolsa, 2023 jyldan bastap jumys berýshiler de bul jaýapkershilikti bólisedi», - dep habarlaıdy QazAqparat tilshisi.

Zeınetaqy júıesin odan ári jańǵyrtýdyń 2030 jylǵa deıingi tujyrymdamasyna osy maǵynada ózgerister engizilip jatyr. Ol ózgerister men túzetýlerdi QR Eńbek jáne halyqty áleýmettik qorǵaý mınıstrligi ázirleýi tıis. Vedomstvonyń Áleýmettik saqtandyrý, bazalyq áleýmettik jáne zeınetaqymen qamsyzdandyrý saıasaty departamentiniń sarapshysy Aıgúl Sakeeva BAQ ókilderine ázirlenip jatqan jańashyldyqtaryń túpki máni men maqsatyn túsindirdi.

Aıgúl Sakeevanyń aıtýyna qaraǵanda, tujyrymdamaǵa engiziletin jańashyldyqtar Memleket basshysy Qasym-Jomart Toqaevtyń tapsyrmasy boıynsha ázirlenip jatyr. Eń birinshi ózgeris jumys berýshiniń jaýapkershiligine qatysty. 2023 jyldan bastap jumys berýshi óz qarajaty esebinen ár qyzmetkerdiń zeınetaqy shotyna 5 paıyzdyq mindetti zeınetaqy jarnasyn tóleı bastaıdy. Muny jumystaǵy adamnyń aılyǵynan ustalatyn zeınetaqy aýdarymymen shatastyrmaý úshin mindetti 5 paıyzdyq aýdarym dep ataýǵa bolady. ıAǵnı, onyń qazir qoldanystaǵy mindetti 10 paıyzdyq zeınetaqy jarnalaryna eshqandaı qatysy joq.

«Óıtkeni engiziletin 5 paıyzdyq mindetti zeınetaqy jarnalary jumys berýshiniń óz qarajaty esebinen júrgiziledi. Al qazirgi 10 paıyzdyq mindetti zeınetaqy jarnalary qyzmetkerdiń tabysynan alynady. Osylaısha biryńǵaı jınaqtaýshy zeınetaqy qoryna aı saıyn 15 paıyzdyq aýdarylym júrgiziledi. Onyń 5 paıyzy jumys berýshiniń qarajaty esebinen júrgizilse, 10 paıyzy qyzmetkerdiń tabysynan júrgiziledi», - deıdi sarapshy.

Tujyrymdamaǵa ózgeris engizýi tıis mańyzdy sharalardyń biri – kepildendirilgen zeınetaqyǵa kóshý jospary.

«2028 jyldan bastap bazalyq zeınetaqynyń ornyna eń tómengi kepildik berilgen zeınetaqyǵa aýysamyz. Mundaı shara, jalpy alǵanda, zeınetaqymen qamsyzdandyrý deńgeıin arttyryp qana qoımaıdy. Sonymen qatar, halyqaralyq jáne otandyq sarapshylardyń usynystaryna sáıkes keletin biryńǵaı tásildeme boıynsha eseptelgen zeınetaqyǵa kóshý bolyp tabylady», - deıdi mınıstrlik mamany.

Qarapaıym tilmen aıtsaq, zeınetaqy jasyna tolǵan adamǵa bazalyq zeınetaqyny taǵaıyndaý ádistemesine ózgerister engizilmekshi. Mysaly, qazir eń tómengi bazalyq zeınetaqynyń kólemi eń tómengi kún kóris deńgeıiniń 54 paıyzyna teń bolsa, ózgeristerden keıin eń tómengi kúnkóristiń 70 paıyzyna deıin ósedi. ıAǵnı, eń tómengi kúnkóris deńgeıiniń 54 paıyzyna teń bazalyq zeınataqynyń ornyna eń tómengi kún kóris deńgeıiniń 70 paıyzyna teń kepil berilgen zeınetaqy tólenedi. Ósim 16 paıyz degen sóz.

«Sonymen qatar, ádistemege jasalyp jatqan taǵy bir ózgeristerdiń biri – zeınetaqyǵa qatysý ótiliniń tómendetilýi», - deıdi mınıstrliktiń sarapshysy.

Basqasha aıtsaq, memleket kepil beretin zeınetaqy qazaqstandyqtarǵa burynǵydan áldeqaıda qoljetimdi bola túspek. Buryn bazalyq zeınetaqyǵa qol jetkizý úshin keminde 10 jyl eńbek ótili bar ekenin dáleldeý kerek bolatyn. Onyń ornyna engiziletin kepildendirilgen zeınetaqyǵa ıe bolý úshin eńbek ótilińiz 5 jyldan kem bolmasa, jetip jatyr.

«Qazir eń tómengi bazalyq zeınetaqy eńbek ótili 10 jyl nemese odan tómen bolmaǵan jaǵdaıda taǵaıyndalsa, usynylyp otyrǵan ózgeristerden keıin ol 5 jyl jáne odan tómen bolmaǵan jaǵdaıda taǵaıyndalady», - deıdi vedomstvo sarapshysy.

Ádistemege engizilip jatqan ózgersterdiń biri joǵarǵy shekteýmen baılanysty. Muny mınıstrlik ókili mynadaı mysalmen túsindirdi.

«Qazirgi tártip boıynsha eńbek ótili 33 jyldan asqan adamdardyń bári bazalyq zeınetaqy retinde eń tómengi kúnkóris deńgeıiniń 100 paıyzyn alady. Odan joǵary mólsher joq. Bul shekteýdi ózgeristerden keıin alyp tastaý kózdeledi. Mysaly, azamatta 45 jyl eńbek ótili bolsa, usynylatyn ózgeristerden keıin ol eń tómengi kúnkóris deńgeıiniń 150 paıyzyn, ıaǵnı, 1,5 ese kóbirek zeınetaqy alatyn bolady», - deıdi Aıgúl Sakeeva.


Joǵary qaraı