Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qyzylordada Baıqońyr qalasyn damytý máseleleri talqylandy

2021 jyldyń 3 qyrkúıek 2021 20:50

QYZYLORDA. QazAqparat - Qyzylorda oblysy ákimdiginde Baıqońyr qalasyn damytý máseleleri talqylandy, dep habarlaıdy Qazaqparat tilshisi.

Búgin oblys ákimi Gúlshara Ábdiqalyqova Baıqońyr qalasy ákimshiliginiń basshysy Konstantın Býsygınmen kezdesti. Otyrysqa oblys ákiminiń orynbasary, Qazaqstan Respýblıkasy Prezıdentiniń «Baıqońyr» keshenindegi arnaýly ókili Serik Súleımenov, QR Prezıdentiniń Baıqońyr keshenindegi arnaýly ókiliniń qyzmetin qamtamasyz etý basqarmasynyń basshysy Jasulan Abatov qatysty.

Jıyn barysynda taraptar arasyndaǵy ortaq josparlar sóz bolyp, onyń ishinde Baıqońyrdaǵy jylý elektr stantsııasyn gazǵa qosý arqyly turǵyndarǵa tólem qunyn tómendetý máselesi talqylandy.

«Qazaqstan men Reseı Federatsııasynyń memlekettik organdarynyń birlesken nátıjeli jumystarynyń arqasynda Baıqońyr qalasynyń jáne tutastaı keshenniń uzaq merzimde damýyn qamtamasyz etý máseleleri sheshilýde. Qazirgi tańda Baıqońyrda 5 turǵyn úıdiń qurylysy men ınjenerlik ınfraqurylymdy jańartý boıynsha jumystar júrgizilýde. «Baıqońyr» keshenin gazben qamtamasyz etý boıynsha kelisim negizinde juldyzdy qaladaǵy kóp qabatty turǵyn úıler, shaǵyn jáne orta bıznes nysandary gazǵa qosyldy», - dedi oblys ákimi.

Kezdesý barysynda Baıqońyr qalasy ákimshiliginiń basshysy Konstantın Býsygın jylý elektr stantsııasyn gazǵa qosý máselesine qatysty birlesken jumystardyń mańyzdylyǵyn atap ótti. Bul rette «QazTransGaz Aımaq» AQ Qyzylorda óndiristik fılıaly dırektorynyń mindetin atqarýshy Ermek Qaldyǵulov, oblystyq ekologııa departamentiniń basshysy Nurjan Ómirserikuly negizgi máseleler boıynsha jasalǵan jumystardy tizipp berdi.

Kezdesýdi qorytyndylaǵan oblys ákimi aldaǵy ýaqytta birlesken jobalardyń nátıjeli oryndalatynyna senim bildirdi.


Avtor Ádiljan Úmbet
Basty sózder: Qyzylorda oblysy, Baıqońyr,
Joǵary qaraı