Aýa raıy
Astana 7 °S
Almaty 21 °S
valıýta baǵamy
USD 421.58
EUR 496.83
RUB 5.53
CNY 62.20

Qyzylordada kásipkerler aýrýhanalarǵa 39,7 mln teńgeniń medjabdyqtaryn tabystady

2020 jyldyń 5 tamyz 2020 00:20

QYZYLORDA. QazAqparat - Qyzylorda qalasynda kásipkerler medıtsınalyq mekemelerge jalpy quny 39,7 mln teńgeni quraıtyn 1 ókpeni jasandy tynystandyrý apparaty men 15 ottegi kontsentratoryn tartý etti, dep habarlaıdy QazAqparat tilshisi.

Qala ákimi Nurlybek Nálibaev oblys ortalyǵyndaǵy birqatar medıtsınalyq mekemelerdi aralaý barysynda emdeý mekemeleriniń jaı-kúıimen tanysty. Aıta ketelik, qala ákimdiginiń uıymdastyrýymen jáne kásipkerlerdiń qoldaýymen 39,7 mln. teńgege medıtsınalyq jabdyqtar alynǵan bolatyn. Nátıjesinde emdeý oryndaryna 1 ókpeni jasandy tynystandyrý apparaty men 15 ottegi kontsentratory tabystaldy. Olardy alýǵa «Sát-Servıs», «Baq-Bereke 2030», «Asanas-Dar», «MetPromMontaj», «Nur-Aı Aqjol», «Altyn Aıdarly» jaýapkershiligi shekteýli seriktestikteri men «Sapaq» óndiristik kooperatıvi qarjylaı qoldaý kórsetti.

Jańa qurylǵylar qalalyq, oblystyq juqpaly aýrýlar, oblystyq balalar aýrýhanalaryna jáne «Ana men bala» ortalyǵyna tabystaldy. Qala ákimi syn sátte demeýshilik tanytqan kásipkerlerge turǵyndar atynan alǵys bildirdi.

Nurlybek Nálibaev odan keıin medıtsına salasyndaǵy máselelerge nazar saldy. Máselen oblystyq balalar aýrýhanasynyń bas dárigeri Zoıa Kóshenova ózi basqaratyn emdeý mekemesiniń reanımatsııa bólimine jóndeý qajet ekenin málimdedi. Negizinde 12 orynǵa laıyqtalǵan ortalyq 3 jyldan beri tek aǵymdyq jóndeýden ótip kelgen. Alaıda, jansaqtaý bólimi tolyǵymen jańalaýdy qajet etedi. Bul máseleni qala ákimi demeýshilik esebinen jaqyn ýaqytta sheship beretinin jetkizdi.

Aıta keteıik, qaýpti vırýspen kúreste jergilikti eriktiler de belsendilik tanytty. Olardyń qatarynda kásipkerler, qurylysshylar jáne máslıhat depýttary da bar.

Pandemııa kezinde 400-den astam dáriger otbasynan oqshaýlanyp, belgilengen ǵımarattarǵa ornalastyryldy. Olarǵa qala kásipkerleri qoldaý kórsetti. Máselen, «Qyzylorda» qonaq úıi 110 dárigerdi jatyn orynmen qamtamasyz etse, «Báıterek» qonaq úıinde 49 dárigerdiń demalýyna jaǵdaı jasaldy. Sondaı-aq, «Arbat» qonaq úıinde oblystyq týberkýlez dıspanseriniń 30 dárigerine oryn berildi.

Sondaı-aq, Qyzylordaǵa sońǵy aptada 200 ottegi kontsentratory jetkizildi.


Joǵary qaraı