Aýa raıy
Astana -25 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Lıtsenzııasynan aıyrylǵan JOO stýdentteri basqa ýnıversıtetterge qalaı aýysady

2020 jyldyń 28 qazan 2020 11:53

NUR-SULTAN. QazAqparat -Lıtsenzııasynan aıyrylǵan joǵary oqý oryndarynyń stýdentteri semestrdiń aıaqtalýyn kútpeı-aq basqa ýnıversıtetterge aýysa alady. Bul týraly Bilim jáne ǵylym mınıstrliginen málim boldy, dep habarlaıdy QazAqparat tilshisi.

«Joǵary oqý oryndarynyń jabylýy men stýdentterdi basqa oqý oryndaryna ýaqytyly aýystyrý qajettiligine baılanysty mınıstrlik normatıvtik qujattarǵa ózgerister engizdi. Endi JOO bilim berý qyzmetimen aınalysý lıtsenzııasynan nemese lıtsenzııaǵa qosymshadan aıyrylǵan, sondaı-aq joǵary oqý orny jabylǵan jaǵdaıda atalǵan oqý ornynyń stýdentteri semestrdiń aıaqtalýyn kútpesten birden basqa JOO-ǵa aýysa alady. Bul norma oqýlaryn jalǵastyrý barysynda stýdentterge qoldaý kórsetýge baǵyttalǵan», - delingen vedomstvo málimetinde.

Qazir mınıstrlikte bilim berý uıymdary qyzmetiniń úlgilik qaǵıdalaryna lıtsenzııasy toqtatylǵan JOO bilim alýshylaryn aýystyrý bóliginde qosymsha ózgerister engizý boıynsha joǵary oqý oryndarynan túsip jatqan birqatar usynys qarastyrylyp jatyr. Aldaǵy ýaqytta mundaı jaǵdaılar oryn alsa, stýdentter lıtsenzııanyń yqtımal keri qaıtarylýyn kútpeı-aq basqa JOO-ǵa aýysa alady.

«Joǵaryda kórsetilgen usynystar múddeli uıymdarmen kelisý boıynsha tıisti rásimderden ótedi. Mınıstrlik jabylatyn joǵary oqý oryndarynyń stýdentterin basqa JOO-ǵa aýystyrýdy qamtamasyz etedi. Bul rette stýdentterdi qabyldaıtyn joǵary oqý oryndarynyń oqý qunyn kótermeýi boıynsha máseleler sheshiletin bolady», - dep atap ótilgen habarlamada.


Joǵary qaraı