Aýa raıy
Astana 8 °S
Almaty 12 °S
valıýta baǵamy
USD 421.58
EUR 496.83
RUB 5.53
CNY 62.20

Lıvan Prezıdenti eldegi Qazaqstan azamattary qaýipsizdigin qamtamasyz etý úshin barlyq sharany qabyldaıdy

2020 jyldyń 5 tamyz 2020 18:47

NUR-SULTAN. QazAqparat - Memleket basshysy Qasym-Jomart Toqaev Lıvan Respýblıkasynyń Prezıdenti Mıshel Aýnmen telefon arqyly sóılesti, dep habarlaıdy QazAqparat Aqordanyń baspasóz qyzmetine silteme jasap.

Qasym-Jomart Toqaev Beırýt portyndaǵy jarylys saldarynan qaza tapqan adamdardyń jaqyndary men týystaryna kóńil aıtyp, zardap shekkenderdiń tezirek saýyǵyp ketýine tilektestik bildirdi.

Jarylys kezinde Qazaqstannyń dıplomatııalyq ókildiginiń ǵımaraty búlinip, bir qyzmetkerdiń jeńil jaraqat alýyna baılanysty Qasym-Jomart Toqaev Mıshel Aýnǵa Beırýtte júrgen Qazaqstan azamattarynyń (200-den astam) qaýipsizdigin qamtamasyz etýdi surady.

Memleket basshysy Lıvannyń ońtústiginde BUU Ýaqytsha kúshteriniń quramynda qazaqstandyq 120 bitimger sarbazdyń óz mindetterin laıyqty ári joǵary deńgeıde atqaryp jatqanyn atap ótti. Osy oraıda Qasym-Jomart Toqaev Lıvan úkimeti qazaqstandyq áskerı qyzmetshilerdiń aýysýy kezinde olardyń qaýipsizdigin saqtaý úshin qajetti kómek kórsetetinine senim bildirdi.

Áńgimelesý barysynda taraptar Qazaqstan men Lıvan arasyndaǵy qarym-qatynastardy odan ári keńeıtý máseleleri boıynsha pikir almasty. Qasym-Jomart Toqaevtyń pikirinshe, Lıvan Qazaqstannyń Taıaý Shyǵystaǵy mańyzdy seriktesi jáne eki eldiń yntymaqtastyǵyna basa mán beriledi.

Óz kezeginde Mıshel Aýn Qasym-Jomart Toqaevqa osyndaı qıyn-qystaý kezeńde telefon shalyp, qoldaý kórsetkeni úshin rızashylyǵyn bildirip, onyń jyly lebizin Lıvan halqyna jetkizetinin aıtty. Sondaı-aq Lıvan bıligi Qazaqstan azamattary men dıplomattarynyń qaýipsizdigin qamtamasyz etý úshin barlyq qajetti sharalardy qabyldaıtynyn jetkizdi.

Lıvan Prezıdenti Qazaqstanmen aradaǵy ekijaqty jáne kópjaqty formattaǵy is-qımyldardy odan ári nyǵaıtý maqsatynda birlese tyǵyz jumys isteýge múddeli ekenin naqtylady.

Sonymen qatar Mıshel Aýn Qazaqstannyń BUU mandaty aıasyndaǵy bitimgershilik qyzmetin joǵary baǵalap, elimizdiń óńirlik jáne jahandyq qaýipsizdikti qamtamasyz etýdegi rólin atap ótti.

Eske sala ketsek, keshe Lıvan astanasy Beırýt qalasynda joıqyn jarylys boldy. Qaladaǵy kóptegen ǵımaratqa zaqym kelip, kóbisiniń terezesi qırap qaldy. Jarylys saldarynan Qazaqstannyń SІM Lıvandaǵy dıplomatııalyq mıssııasy ǵımaratyna zaqym kelgen. Jarylys kezinde dıplomatııalyq mıssııanyń qyzmetkerleri jumys kúni aıaqtalǵannan keıin ǵımarattan ketip qalǵan. Konsýl keńsede qalǵan bolatyn jáne jarylys tolqyny saldarynan jeńil jaraqat aldy. Buǵan deıin habarlanǵandaı, 5 tamyz kúni Beırýt ýaqytymen saǵat 00:30-da Lıvannyń Densaýlyq saqtaý mınıstri Muhammed Hasan jarylystan qaza tapqandar sany 70-ke jetkenin, 4 myńǵa jýyq turǵyn jaraqat alǵanyn málimdedi. 5 tamyz kúni jarylystyń neden bolǵany anyqtaldy. Bılik málimdemesine sáıkes, ammonıı nıtratynyń úlken partııasy (ammıak selıtrasy dep te atalady) portta uzaq ýaqyt saqtalyp, qaýipsizdik talaptary saqtalmaǵan.

Joǵary qaraı