Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Mamın «Nur Otan» baǵdarlamasynyń nysanaly ındıkatorlarynyń oryndalýyn qamtamasyz etýdi tapsyrdy

2021 jyldyń 27 qyrkúıek 2021 14:26

NUR-SULTAN. QazAqparat – QR Premer-Mınıstri Asqar Mamın «Nur Otan» partııasynyń saılaýaldy baǵdarlamasynyń jol kartasyn iske asyrý jónindegi shtab otyrysyn ótkizdi, dep habarlaıdy primeminister.kz.

Mádenıet pen bilim berýdi damytý máseleleri qaraldy. Mádenıet jáne sport mınıstri Aqtoty Raıymqulova «Nur Otan» partııasynyń saılaýaldy baǵdarlamasynda 2025 jylǵa qaraı 1500 mádenıet nysanyn salý jáne jóndeý boıynsha alǵa qoıylǵan mindetterdi iske asyrý barysy týraly baıandady.

Bıyl 89 mádenıet nysanyn salyp, 211 nysandy jóndeý kózdelgen. Qazaqstandyqtar men sheteldik týrıster arasynda tanymal etý maqsatynda Túrkistan jáne Atyraý oblystaryndaǵy respýblıkalyq mýzeı-qoryqtardyń aýmaqtarynda «Ordabasy» jáne «Saraıshyq» vızıt-ortalyqtaryn salý jumystary júrgizilip jatyr. Mádenıet nysandaryn salý kestesin iske asyrý boıynsha jumys barysy týraly óńir ákimderi baıandady.

Bilim jáne ǵylym mınıstri Ashat Aımaǵambetov «Nur Otan» partııasynyń saılaýaldy baǵdarlamasyn iske asyrý aıasynda 2021 jyldan 2025 jylǵa deıingi kezeńde shaǵyn qalalarda, aýdan ortalyqtary men aýyldarda 5000 mektep jańǵyrtylatynyn baıandady.




Bıyl 1015 mektepti jańǵyrtý jumystary júrgizilýde, oǵan kúrdeli jáne aǵymdaǵy jóndeý, pán kabınetterin jabdyqtaý, mektep jıhazdaryn jańartý, mektep kitaphanalary men ashanalaryn damytý, qaýipsiz jaǵdaılar jasaý sııaqty baǵyttar kiredi. Bul rette mektepterdiń 80%-ynda fızıka, hımııa jáne bıologııa pánderi kabınetteri ashylady. Petropavl jáne Shymkent qalalarynda bazasynda Nazarbaev Ýnıversıtetiniń tájirıbesi boıynsha ozyq óńirlik joǵary oqý oryndary qurylatyn ýnıversıtetter aıqyndaldy.

Osylaısha, M. Qozybaev atyndaǵy Soltústik Qazaqstan ýnıversıtetiniń bazasynda qazirgi tańda Áleýmettik-gýmanıtarlyq ǵylymdar joǵary mektebi (Nazarbaev Ýnıversıtetiniń basqarýymen) jáne Tehnologııa jáne jaratylystaný ǵylymdary joǵary mektebi (AQSh Arızona ýnıversıtetiniń basqarýymen) quryldy. M. Áýezov atyndaǵy Ońtústik Qazaqstan memlekettik ýnıversıtetiniń bazasynda daıarlaýdyń kelesi baǵyttary anyqtaldy: hımııalyq ınjenerııa jáne bıotehnologııa, toqyma jáne tamaq ınjenerııasy, aqparattyq tehnologııalar jáne energetıka, sáýlet, qurylys jáne kólik. Premer-Mınıstr «Nur Otan» partııasynyń saılaýaldy baǵdarlamasynyń jol kartasyn iske asyrý boıynsha bıylǵy jylǵa belgilengen nysanaly ındıkatorlardyń oryndalýyna qatań baqylaýdy qamtamasyz etýdi tapsyrdy.

«Nur Otan» partııasynyń saılaýaldy baǵdarlamasyn iske asyrýda júıeli jumysty jalǵastyrý qajet. Partııanyń halyq aldyndaǵy barlyq mindettemeleri ýaqytyly oryndalýy tıis», — dedi A. Mamın.


Joǵary qaraı