Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

MÁMS: Almatyda 435 myńǵa jýyq adam saqtandyrylmaǵan

2021 jyldyń 17 qazan 2021 04:16

ALMATY. QazAqparat - Almaty qalasynda Mindetti áleýmettik medıtsınalyq saqtandyrý (MÁMS) júıesi boıynsha 435 myńǵa jýyq qala turǵyny saqtandyrylmaǵan. Bul týraly Medıtsınalyq saqtandyrý qorynyń Almaty qalalyq fılıalynda málimdedi, dep habarlaıdy QazAqparat tilshisi.

Sarapshylardyń málimetinshe, saqtandyrylmaǵan qala turǵyndarynyń ishinde: 21% – jaldamaly jumyskerler, 21,4% – azamattyq-quqyqtyq kelisimshart arqyly eńbek etetinder, 4,2% – jeke kásipkerler, 25,4% – biryńǵaı jıyntyq tólem tóleýshiler, 2,8% – óz betinshe tóleýshiler, 32,3% – júıe engizilgeli beri birde-bir ret tólem jasamaǵandar quraıdy.

Mindetti áleýmettik medıtsınalyq saqtandyrý Almaty fılıaly dırektory Tileýhan Ábildaevtyń aıtýynsha, búginde 1,6 mln almatylyq saqtandyrý júıesimen qamtylǵan. «Olar qajet bolǵan jaǵdaıda kez-kelgen ýaqytta medıtsınalyq saqtandyrý paketindegi qyzmetterdi eshbir shekteýsiz paıdalana alady. Biraq osy júıege enbeı qalǵan, ózderin belgili-belgisiz sebeptermen saqtandyrmaǵan 435 myń adam saqtandyrý paketindegi aýqymdy qyzmetterdi paıdalaný múmkindiginen qaǵylyp otyr», - dedi ol.

Fılıal ókilderiniń aıtýynsha, «Jaldamaly jumyskerler» sanatyndǵy azamattar Egov.kz elektrondy úkimet portalyna kirip, statýsyn tekserip otyrǵany durys. Portaldaǵy «MÁMS júıesine tólengen tólemder men medıtsınalyq qyzmetterdi paıdalaný týraly málimet berý» dep atalatyn onlaın-qyzmet arqyly jumys berýshiniń aı saıyn aýdaryp otyrǵan aýdarymdary jaıly aqpar alýǵa bolady.

«Azamattyq-quqyqtyq kelisimshart arqyly eńbek etetinder».

Bul sanattaǵy azamattar MÁMS júıesindegi statýsyn ózderi baqylap otyrýy tıis. Sebebi salyq agenti olardan qyzmet kórsetilgen aılar úshin ǵana jarna ustaıdy.

«Jeke kásipkerler».

Kóptegen jeke kásipkerler eger JK nysany tabys tappasa, MÁMS jarnasyn aýdarýdyń qajeti joq dep esepteıdi. Bul – qater pikir.

Jeke kásipker belgili bir aılarda tabys tappaǵan bolsa, mindetti zeınet jarnasy men áleýmettik tólemderden bosatylady. Biraq, MÁMS jarnasy mindetti túrde tólenýi tıis (1,4 eń tómengi jalaqynyń (ETJ) 5% - 2975 teńge).

Eger jeke kásipkerlik nysany eshqandaı tabys tappaıtyn bolsa JK jumysyn resmı túrde toqtatý qajet, sonda kásipker jarna tóleý mindetinen bosatylady.

«BJT tóleýshiler»

Qazaqstanda 2019 jyldan bastap Biryńǵaı jıyntyq tólem engizilgen bolatyn. Ol:


• Jeke tabys salyǵy;

• Memlekettik áleýmettik saqtandyrý qoryna jasalatyn áleýmettik tólem;

• BJZQ zeınetaqy tólemderi;

• Mindetti medıtsınalyq saqtandyrý tólemderinen turady.

Biryńǵaı jıyntyq tólem Salyq kodeksi arqyly retteledi. Kodekske sáıkes, BJT ár aıdyń basynda tólenýi tıis jáne tólem sol aıdyń sońyna deıin ǵana jaramdy.

Sondaı-aq, Almaty qalasynda saqtandyrylmaǵandar arasynda «birde-bir ret saqtandyrý jarnasyn tólemegen» azamattar bar. Saqtandyrý paketindegi qyzmetterdi, sonyń ishinde baǵasy qymbat dıagnostıkalyq qyzmet túrlerin paıdalaný úshin olar qazirden bastap ózin-ózi saqtandyra bastaǵany jón.

Mundaı turǵyndar júıege eki túrli jolmen qosyla alady:

1. Eger patsıent shuǵyl túrde MÁMS paketindegi qyzmetti qajet etetin bolsa,«óz betinshe tóleýshi» retinde ótken 12 aıdyń ár aıyna 2125 teńgeden tóleıdi.

2. Asyǵys bolmasa 2917 teńge kóleminde «Biryńǵaı jıyntyq tólem» tólese bolady. Jıyntyq tólemdi ótken aılarǵa tóleýge bolmaıdy, sondyqtan aǵymdaǵy aıdan bastap 3 aıǵa tólese, úshinshi aıda «saqtandyrylǵan» statýsyna ıe bolady.


Joǵary qaraı