Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Mańǵystaý oblysynda tirkelgen maldyń 0,18 paıyzy qýańshylyqtan qyryldy

2021 jyldyń 14 qyrkúıek 2021 13:11

AQTAÝ. QazAqparat - Mańǵystaý oblysynda 600 iri sharýa qojalyǵy men 6 myńǵa jýyq jeke úı qojalyǵyna qarjylaı qoldaý kórsetildi, dep habarlaıdy QazAqparat tilshisi.

Bul týraly oblystyq qoǵamdyq kommýnıkatsııa ortalyǵynda ótken brıfıngide Mańǵystaý oblysy aýyl sharýashylyǵy basqarmasynyń basshysy Serik Qaldyǵul málim etti.

«Bıyl Mańǵystaý oblysynda qýańshylyqtan zardap shekken sharýalarǵa qarjylaı qoldaý kórsetý úshin úkimet rezervinen 1,9 mlrd teńge bólindi. Qaıtarymsyz qarajat tórt túliktiń analyq basy úshin mal azyǵyna jumsalǵan shyǵyndy ishinara óteýge berilip otyr. Qazirgi tańda bólingen qarajattyń 57% ıgerildi ıaǵnı, 5900 jeke qosalqy úı sharýa qojalyqtaryna 745 mln. teńge jáne 575 sharýa qojalyǵyna 395 mln. teńge qarjylaı memlekettik qoldaý kórsetildi»,- dedi S. Qaldyǵul.

Qazirgi ýaqytta sharýalardy jem-shóppen qamtamasyz etip, mal azyǵy tapshylyǵyn joıý maqsatynda birqatar jumystar júrgizilip jatyr.

1. Jergilikti bıýdjetten 150 mln.teńge bólinip, «Kaspıı» ÁKK AQ-y arqyly atalǵan qaıtarymdy qarjyǵa 15 shildeden beri ár qala, aýdandardan taǵaıyndalǵan operatorlar qajettilikke qaraı shóp tasymaldap jatyr.

Búgingi kúnge deıin 1350 tonna shóp satyp alyndy. Bul jumystar jyl aıaǵyna deıin jalǵasady.

2. Jergilikti bıýdjetten 54 mln teńge bólinip, qaıtarymdy qarajatqa aýdandardan taǵaıyndalǵan operatorlar Qostanaı oblysynan 950 tonna arpa jetkizdi. Qazirgi tańda arpa túgel satylyp, aınalymdaǵy qarjyǵa qosymsha 1 myń tonna mal azyǵyn satyp alý jumystary júrýde.

3. Sonymen qatar 107 mln teńgege 15 vagon 3-4 sortty bıdaı (bıdaı qaldyǵy) satyp alyndy, jaqyn kúnderi óńirge jetkiziledi.

Jalpy jyl basynan beri oblysqa 41 500 tonna shóp tasymaldandy.

Sonyń 3500 tonnasy ózge óńirlerden kómek retinde jetkizilip, qýańshylyqtan zardap shekken mal ıelerine tegin úlestirildi.

Al, óńirge tasymaldanǵan jem kólemi 24 myń tonnany qurady.

Spıkerler aýylsharýashylyǵy janýarlaryn birdeılendirý bazasyna tirkelmegen malǵa memleket tarapynan sýbsıdııa nemese qoldaý kórsetilmeıtinin aıtty.

Qazir óńirde 636 824 bas mal tirkelgen. Onyń ishinde ólgeni 1163 (jalpy sanynyń 0,18%).

Ólgen maldyń 194-i ǵana aýylsharýashylyǵy janýarlaryn birdeılendirý derekqoryna tirkelgen.

Tótenshe jaǵdaılar departamenti aýa ylǵaldylyǵyna tekserý júrgizdi. Nátıjesi tótenshe jaǵdaı jarııalaý sharttaryna sáıkes kelgen joq.

Sondaı-aq, janýarlar arasynda ýlaný men juqpaly aýrýǵa shaldyǵý deregi tirkelmedi jáne ósimdikter zııankesterden zaqymdanbaǵan, ıaǵnı tótenshe jaǵdaı jarııalaýǵa zańdy negiz joq.

Sonymen qatar óńirde qysqy mal azyǵynyń qoryn daıyndaý qyzý júrip jatyr.

2021 - 2022 jyldarǵa óńirdegi tórt túlikti qystyq mal azyǵymen qamtamasyz etý maqsatynda, QR Premer-Mınıstri A.Mamınniń tapsyrmasyna sáıkes, bıýdjetten qaıtarymdy qarajat retinde mal azyǵyna 5,3 mlrd teńge qarjy bólindi (1,9 mlrd teńge – shóp, 3,4 mlrd teńge – jem).

«Bul qarjyǵa jyl sońyna deıin 26 myń tonna shóp pen 34 myń tonna jem satyp alynady dep josparlanǵan. Qazir atalǵan qarjynyń 600 mln teńgesine mal azyǵyn tasymaldaıtyn operatorlar taǵaıyndalyp, ózge óńirlerden shóp tasymaldaý jumysy bastalyp ketti»,- dedi S. Qaldyǵul.

Budan bólek Atyraý men Aqtóbe oblystarynyń shabyndyq jerlerinen shóp shabýǵa 5 sharýa qojalyǵy attandy. Olar ózderine qor jınap, artyǵyn ózge mal ıelerine satady.

Sonymen qatar búgingi kúni jergilikti shabyndyqta 14 brıgada shóp shaýyp jatyr. Olar jyl aıaǵyna deıin 15 myń tonna shóp daıyndamaq.


Joǵary qaraı