Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Mańǵystaýda qoqys basqan «Golýbaıa býhta» týrıstik aımaǵy tazalandy

2021 jyldyń 10 mamyr 2021 20:20

AQTAÝ. QazAqparat - Mańǵystaýda qoqys basqan «Golýbaıa býhta» týrıstik aımaǵy tazalandy, dep habarlaıdy QazAqparat tilshisi.

Buǵan deıin áleýmettik jelide Kaspıı teńiziniń jaǵalaýynda ornalasqan týrıstik aýmaqty qoqys basqanyn aıtyp aqtaýlyq turǵyn Pavel Hýdıakov vıdeo jarııalaǵan bolatyn.

«Qazir kólikpen júrip kelemin. Oń jaǵymda áli de bolsa qaldyqtar shashylyp jatyr. Máseleni sheshý úshin mynadaı usynysym bar: Aqtaý – Fort-Shevchenko jolynda jol polıtsııasy júredi. «Golýbaıa býhtadan» shyqqan kólik syrty ádette shań bolyp turady. Toqtatyp, qorabyn tekserý kerek. Qoqys salynǵan qapshyq bolmasa shara qoldaný kerek. Bolmasa, Túlkili saı aýmaǵynda qoqystardy suryptap, satyp alatyn beket qoıý qajet», - dedi ol.

Áleýmettik jelide tabıǵat janashyrlarynyń narazylyǵyn týdyrǵan taspadan soń Túpqaraǵan aýdany ákimdigi jedel tazalaý jumystaryna kiristi.

Jınalǵan qoqys aýyldaǵy arnaıy polıgonǵa jetkizilgen. Jarty táýlikte 2 tonnadan astam turmystyq qaldyq jınalyp, polıgonda joıyldy.

«Qazirgi tańda kún jylynyp kele jatyr. Soǵan baılanysty demalýshylar sany artýda. Aldaǵy ýaqytta bul jer turaqty tazalanyp turady. Aptasyna bir ret, demalysqa qaraı. Barýshylardan suraıtynymyz – ózimizdiń tabıǵatymyzdy tazalap, aıalap ustaý. Jáne de múmkinshilik bolǵan jaǵdaıda shyqqan qoqystardy ózimen birge alyp ketýin suraımyn», - dedi Saıyn Shapaǵatov aýyldyq okrýginiń ákimi Saıram Qylysh.

Osy mańda turmystyq qaldyq salýǵa arnalǵan 3 konteıner men úlken temir jáshik qoıylǵan. Jaqynda taǵy birneshe konteıner qoıý josparlanyp otyr.

Aıta keteıik, «Golýbaıa býhta» jaǵajaıy Aqtaýdan 63 shaqyrym qashyqtyqta ornalasqan. Taýly-jartasty meken týrısterdiń súıikti orny. Ásirese, kún jylyda demalýshylar shatyr tigip, birneshe kún aıaldaıdy.


Joǵary qaraı