Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Máýlen Áshimbaev Patrıarh Kırıllmen kezdesti

2021 jyldyń 26 qarasha 2021 13:35

NUR-SULTAN. QazAqparat - Qazaqstan Respýblıkasy Parlamenti Senatynyń Spıkeri Máýlen Áshimbaev Máskeý qalasyna jasaǵan jumys sapary kezinde Máskeý jáne Búkil Rýs Patrıarhy Kırıllmen kezdesti. Bul jaıynda Senat baspasóz qyzmetinen málim etti, dep habarlaıdy QazAqparat tilshisi.


Senat Tóraǵasy Orys Pravoslav Shirkeýiniń basshysyna Qazaqstan Prezıdenti Qasym-Jomart Toqaevtyń 2022 jylǵy qyrkúıekte ótetin Álemdik jáne dástúrli dinder lıderleriniń VII Sezine shaqyrý hatyn tapsyrdy.

Máýlen Áshimbaev qazaqstandyqtar Asa Qasıetti Patrıarh Kırılldiń álemde moraldyq, adamgershilik qundylyqtardy ilgeriletýge, dinaralyq dıalogty damytýǵa, halyqtar arasyndaǵy beıbitshilik pen kelisimdi nyǵaıtýǵa qosqan úlesin joǵary baǵalaıtynyn atap ótti.




Kezdesýde aldaǵy Álemdik jáne dástúrli dinder lıderleriniń Sezine daıyndyq barysy da talqylandy.

«Ótken 18 jyldyń ishinde alty Sezd uıymdastyryldy. Osy aralyqta qazaqstandyq dinaralyq forým bedeldi jáne belgili ashyq dıalog alańyna aınaldy. Osy múmkindikti paıdalana otyryp, Máskeý Patrıarhatyna Qazaqstan bastamasyna turaqty jáne belsendi qoldaý bildirip kele jatqany úshin alǵysymyzdy bildiremiz», – dedi Máýlen Áshimbaev.

Senat Tóraǵasy aldaǵy Sezge «Pandemııadan keıingi kezeńde adamzattyń rýhanı-áleýmettik damýyndaǵy álemdik jáne dástúrli dinder lıderleriniń róli» taqyryby arqaý bolatynyn aıtty. Senat Spıkeri jańa jaǵdaıda qazirgi zamannyń syn-qaterlerine toıtarys berý úshin birlesip áreket etýdiń mańyzdy ekenin atap ótti.

Suhbat barysynda taraptar Qazaqstan men Reseıdiń ózara qarym-qatynasynyń dástúrli joǵary deńgeıine nazar aýdardy.

«Eki eldiń yntymaqtastyǵyn damytýǵa Qazaqstannyń Tuńǵysh Prezıdenti – Elbasy Nursultan Nazarbaev úlken úles qosty. Qazaqstan Prezıdenti Qasym-Jomart Toqaev osy saıası sabaqtastyqty jalǵastyra otyryp, elderimiz arasyndaǵy ózara baılanysty odan ári nyǵaıtýǵa basa mán berip keledi. Qazaqstan Parlamentiniń Senaty óz tarapynan elderimizdiń basshylary qol jetkizgen ýaǵdalastyqtardy quqyqtyq turǵydan qamtamasyz etip, Qazaqstan-Reseı qatynastaryn ári qaraı damytý úshin barlyq qajetti jaǵdaıdy jasaýda», – dedi Máýlen Áshimbaev.




Óz kezeginde Asa Qasıetti Patrıarh Kırıll Qazaqstan Prezıdentine Sezge qatysýǵa shaqyrǵany úshin alǵysyn jetkizdi.

Orys Pravoslav Shirkeýiniń Basshysy Qazaqstannyń dinaralyq dıalogty jahandyq deńgeıde ilgeriletý jumystaryn joǵary baǵalady. Patrıarh Kırıll Qazaqstannyń Tuńǵysh Prezıdenti – Elbasynyń el Táýelsizdigin nyǵaıtýdaǵy jáne beıbitshilik pen kelisimniń tıimdi úlgisin qalyptastyrýdaǵy asa kórnekti rólin aıryqsha atap ótti. Sondaı-aq ol Memleket basshysynyń osy saıası sabaqtastyqty saqtaı otyryp, qazirgi tańda eldegi qoǵamdyq kelisimdi odan ári nyǵaıtýǵa úlken úles qosyp kele jatqanyna nazar aýdardy. Orys Pravoslav Shirkeýiniń Basshysy Qazaqstan men Reseıdiń ózara qarym-qatynasynyń joǵary deńgeıin de tilge tıek etti. Ol rýhanı lıderler elderimizdiń odaqtastyq seriktestigin ári qaraı nyǵaıtý jáne damytý úshin qoldan kelgenniń bárin jasaýǵa tıis ekenin atap ótti.




Kezdesý sońynda Senat Spıkeri Qazaqstannyń dinaralyq dıalogty damytýǵa qatysty bastamalary Orys Pravoslav Shirkeýiniń qyzmetimen úndesetinin tilge tıek etti. Máýlen Áshimbaev aldaǵy ýaqytta da dinaralyq dıalog pen kelisimdi halyqaralyq deńgeıde ilgeriletý boıynsha yntymaqtasa jumys isteýge daıyn ekenin jetkizdi.








Joǵary qaraı