Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Máýlen Áshimbaev túrkitildes elderdiń jastar forýmyna qatysty

2021 jyldyń 22 maýsym 2021 16:39

NUR-SULTAN. QazAqparat - Túrkistan qalasynda «Túrkistan – túrki áleminiń besigi» atty túrkitildes elderdiń kóshbasshy jáne belsendi jastarynyń halyqaralyq forýmy bastaldy. Іs-sharanyń plenarlyq otyrysyna QR Parlamenti Senatynyń tóraǵasy Máýlen Áshimbaev vıdeo-baılanys rejımi arqyly qatysyp, quttyqtaý sóz sóıledi, dep habarlaıdy QazAqparat.

Onlaın jáne oflaın formatta ótken jıynǵa 300-den astam adam qatysqanyn aıta ketken jón.

Óz sózinde Máýlen Áshimbaev Túrkistannyń túrki áleminiń tarıhynda róli erekshe ekenine nazar aýdardy. Ol kóne shahardyń qaıta túleýi tutas túrki álemi úshin mańyzdy ekenin tilge tıek etip, mundaı qadam ortaq tarıhymyzdy saqtaýǵa jáne túrkitildes halyqtardyń qarym-qatynasyn odan ári nyǵaıtýǵa yqpal etetin aıtty. Senat tóraǵasy Elbasynyń tarıhı sheshimi men Memleket basshysynyń qalanyń damýyna erekshe kóńil bólýiniń arqasynda Túrkistan sońǵy jyldary zamanaýı, kórikti qalaǵa aınalǵanyn atap ótti.

«Qazirgi tańda kóne Túrkistannyń jańa beınesi qalyptasýda. Shahardyń osyndaı jetistigi Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń jasampaz sheshiminiń nátıjesi. Osydan úsh jyl buryn Elbasy Túrkistan oblysyn qurý týraly tarıhı Jarlyqqa qol qoıǵan edi. Sodan bastap qalanyń ekinshi tynysy ashyldy. Túrkistandy damytý isine Qazaqstan Respýblıkasynyń Prezıdenti Qasym-Jomart Kemeluly Toqaev basa mán berip keledi. Kóktemde ótken Túrkitildes memleketter basshylarynyń sammıtinde Túrkistannyń «Túrki áleminiń rýhanı astanasy» bolyp jarııalanýy sonyń jarqyn kórinisi», – dedi Máýlen Áshimbaev.

Sonymen qatar Senat tóraǵasy búginde túrkitildes elder arasyndaǵy qarym-qatynas belsendi damyp kele jatqanyn aıtty. Oǵan baýyrlas halyqtardyń túrli baǵyttaǵy ózara baılanysy aıqyn dálel. Osyndaı aýqymdy jumystardyń aıasynda túrki memleketteriniń jastary arasyndaǵy yntymaqtastyqty nyǵaıtý máselesi de basty nazarda.

«Túrkitildes elderdiń yntymaqtastyǵynan jastarymyz qalys qalmaýy kerek. Bul máselede jastar ortalyq mánge ıe bolýy shart», – dedi M. Áshimbaev.

Sondaı-aq, Senat tóraǵasy kezinde túrki álemi álemdik órkenıettiń iri ortalyqtarynyń biri bolǵanyn jetkizdi. Ol túrki halyqtarynan shyqqan ǵalym-ǵulamalardyń adamzattyń damýyna qosqan úlesine nazar aýdaryp, túrkitildes elderdiń jastary da jahandyq órkenıet jolynda eseli eńbek etýi kerek ekenin aıtty.

«Sizder alyp órkenıettiń urpaqtary jáne ókilderisizder. Teńdessiz ǵylymı jáne mádenı eńbekterdiń muragerisizder. HHІ ǵasyr ǵylym men bilimniń ǵasyry. Qazirgi tańda ǵylym men tehnologııa memleketterdiń damýyndaǵy negizgi kórsetkishke aınaldy. Túrkitildes elder osy úrdisten shet qalmaýǵa tıis. Bul rette jastarǵa úlken mindet júkteledi», – dedi Senat Tóraǵasy.

Odan bólek, Máýlen Áshimbaev túrki álemindegi uly oıshyldardyń eńbekteri jastar úshin ómirlik ustanymǵa jáne kásibı baǵdarǵa aınalýy kerektigin aıtty. Sondyqtan olardyń muralaryn keńinen dáriptep, jan-jaqty zerdeleýdiń mańyzy zor. Bul rette osyndaı is-sharalar da ortaq tarıhymyzdy tanýǵa tyń serpin beretini sózsiz.

Senat tóraǵasy túrki halyqtarynyń jastaryn álemniń damýyna óz úlesterin qosýǵa, túrkitildes elderdiń ǵylym-bilim, mádenı, rýhanı qundylyqtaryn eselep, osy jolda talmaı eńbek etýge shaqyrdy.


Joǵary qaraı