Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Maımyl sheshegine qarsy vaktsına jasaýǵa áleýetimiz jetedi – Kúnsulý Zákarııa

2022 jyldyń 27 mamyr 2022 16:06

NUR-SULTAN. QazAqparat – Bıologııalyq qaýipsizdik máseleleri jónindegi ǵylymı-zertteý ınstıtýtynyń bas dırektory maımyl sheshegine qarsy vaktsına ázirleýge daıyn ekenderin aıtty, dep habarlaıdy QazAqparat tilshisi.

Kúnsulý Zákarııanyń aıtýyna qaraǵanda, Bıologııalyq qaýipsizdik máseleleri jónindegi ǵylymı-zertteý ınstıtýty Poxviridae vırýstar tobyn talaı jyldan beri zerttep keledi. Onyń ishinde Capripoxvirus tarmaǵy da bar. Bul tarmaqqa qoı men eshki sheshegi, teridegi túıindi bórtpe kiredi. Sondaı-aq taýyq, kógershin, sıyr, túıe jáne maımyl sheshegi kiretin Avipoxvirus tarmaǵy da atalmysh ınstıtýttyń únemi nazarynda bolǵanǵa uqsaıdy.

«Zertteý jumystarynyń nátıjesinde qoı sheshegine, eshki sheshegine, teriniń túıindi bórtpesine, túıe sheshegine, taýyq sheshegine qarsy vaktsınalar ázirlendi. Olar Qazaqstannan bólek postkeńes elderi veterınarııa salasynda keńinen qoldanylyp júr. Instıtýt óziniń 63 jyldyq tarıhynda asa qaýipti ınfektsııalyq aýrýlardyń respýblıkalyq depozıtarıin qalyptastyrǵan. Ol qorda túrli janýarlardyń sheshek synamalary da saqtalǵan», - dedi ǵalym QazAqparat tilshisine bergen suhbatynda.

Instıtýttyń bas dırektory qazir eldiń nazary aýyp turǵan maımyl sheshegine qarsy vaktsına jasaý múmkindikterine toqtaldy.

«Sheshek vırýsymen jumys istep jáne sheshek aýrýlaryna qarsy ekpe jasap jınaǵan tájirıbemiz bolǵandyqtan, bizdiń ınstıtýtta maımyl shesheginen qorǵaıtyn vaktsına jasaý boıynsha zertteý júrgizýdiń búkil múmkindikteri bar», - dedi Kúnsulý Zákarııa.

Sondaı-aq atalǵan vaktsınany jasap shyǵarý úshin arnaıy ǵylymı-zertteý baǵdarlamasy qajet ekenin aıtty. Ol baǵdarlamany memleket qarjylandyryp, tapsyrma berý arqyly qoldaý kórsetýi qajet kórinedi.

Densaýlyq saqtaý mınıstrliginiń sońǵy derekteri boıynsha, Qazaqstanda maımyl shesheginiń yqtımal faktileri tirkelmegen. Al Kúnsulý Zákarııa basqaratyn Bıologııalyq qaýipsizdik máseleleri jónindegi ǵylymı-zertteý ınstıtýtynyń ujymy «QazVac» atty COVID-19 ınfektsııasyna qarsy otandyq vaktsınany jasap shyǵarǵanyn qazaqstandyqtar jaqsy biledi. Elimizde osy otandyq vaktsınanyń 500 myń dozasyn shyǵarý múmkindigi bar. qazir atalǵan vaktsınany Dúnıejúzilik densaýlyq saqtaý uıymynyń tirkeýinen ótkizý jumystary júrip jatyr.


Joǵary qaraı