Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Májilis bıologııalyq qaterlerge qatysty qujatty maquldady

2021 jyldyń 8 jeltoqsan 2021 10:35

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń bıologııalyq qaýipsizdigi týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasyn Densaýlyq saqtaý mınıstrligi Memleket basshysynyń 2020 jylǵy 27 mamyrda Ulttyq qoǵamdyq senim keńesiniń otyrysynda jáne 2020 jylǵy 16 qarashada koronavırýstyq ınfektsııa jónindegi keńeste bergen tapsyrmalaryn oryndaý maqsatynda múddeli memlekettik organdarmen birlese otyryp ázirledi.

«Zań jobasynyń basty tujyrymdamasy bıologııalyq qaýip-qaterlerdi erte anyqtaý, olardy boldyrmaý jáne aldyn alý bolyp otyr. Bıologııalyq qaýip-qaterlerdiń negizgi kózderi mynalar bolyp sanalady: asa qaýipti ınfektsııalardyń tabıǵı oshaqtary, halyq pen janýarlardyń belsendi qozǵalysynyń, taýarlar aınalymynyń nátıjesinde qaýipti ınfektsııalardyń ákelinýi», - dedi QR Densaýlyq saqtaý mınıstri Alekseı Tsoı.

Sonymen qatar mınıstr bıologııalyq qaýip-qaterlerdiń kózi retinde patogendi bıoagentterge ruqsatsyz qol jetkizý, olardyń rettelmeıtin jáne erkin aınalymy, tótenshe jaǵdaılar jáne terrorızm aktileri nátıjesinde joǵary qaýipti kózderge áser etý, bıoqaýipsizdik salasynda bilikti kadrlardyń jetispeýshiligi máselesin atady.

Alekseı Tsoıdyń paıymynsha, mundaı qaýip-qaterlerge qarsy is-qımyldyń tıimdi júıesin qalyptastyrý talap etiledi. Ol úshin zań jobasynda:

1) Qazaqstan Respýblıkasynyń Ulttyq qaýipsizdik strategııasy;

2) bıoagenttermen jumys isteýge qoıylatyn talaptardy birizdendirý;

3) mıkroorganızmderdiń ulttyq jáne jumys kollektsııalarynyń qyzmetin reglamentteý;

4) úılesimdi memlekettik basqarý júıesin qurý;

5) patogendi bıoagentterdiń aınalymy týraly derekterdi esepke alý men monıtorıngteýdiń biryńǵaı júıesin qurý;

6) bıotáýekelderdi basqarý júıesin engizý;

7) bıologııalyq qaýip-qaterlerdi boljaý júıesin qurý;

8) profıldi qyzmetter men halyqtyń tótenshe yqtımal jaǵdaılarǵa daıyndyǵyn qamtamasyz etý;

9) memlekettik retteýdiń preventıvti fýnktsııasyn kúsheıtý aıasynda retteý usynylady.

Belgili bolǵandaı, Respýblıkalyq bıýdjettik komıssııa zań jobasyn iske asyrýǵa shamamen 25 mlrd teńge mólsherinde 2022-2024 jyldarǵa arnalǵan shyǵystardy maquldady. Bul shyǵystarǵa beıindi qyzmetkerlerdi áleýmettik qorǵaý, memlekettik zerthanalyq bazany qosymsha jaraqtandyrý, bıoqaýipsizdik salasynda biryńǵaı memlekettik aqparattyq júıeni qurý jáne júrgizý, mıkroorganızmder kollektsııasyn ustap turý shyǵystary kiredi.


Joǵary qaraı