Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Májilis depýtattyq mandattardy bólýge qatysty zań jobasyn maquldady

2022 jyldyń 19 qańtar 2022 11:29

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Qazaqstan Respýblıkasy Konstıtýtsııalyq zańynyń jobasy maquldandy, dep habarlaıdy QazAqparat tilshisi.

Zań jobasyn qabyldaýdyń maqsaty - bıliktiń ókildi tarmaǵynda áıelderdiń jáne jastardyń, sondaı-aq múgedektigi bar adamdardyń da qatysýyn qamtamasyz etý jáne pikirin eskerý, olardy memlekettiń tynys-tirshiliginde belsendi jumysqa tartý.

«Konstıtýtsııaǵa sáıkes Qazaqstan Respýblıkasy ózin áleýmettik memleket retinde ornyqtyrady, azamattar aldyndaǵy áleýmettik mindettemelerdi oryndaýǵa baǵyttalǵan saıasatty dáıekti túrde iske asyrady. Memleketimiz saıasatty qalyptastyrýǵa halyqty tartýǵa erekshe nazar aýdarady. 2020 jylǵy mamyrda «Saıası partııalar týraly» Zańǵa partııalyq tizimderde áıelder men jastar úshin 30% kvota engizý jónindegi normalar engizildi. Sol kezden bastap saıası partııalar genderlik teńdik jáne jastardy qoldaý máselelerin jetildirýde mańyzdy ról atqara bastady. Saılaý tizimderine engizý arqyly jas kandıdattar men áıelderdi ókildi organdar qataryna qosý múmkindigi paıda boldy», - dedi QR Ádilet mınıstri Qanat Mýsın.

Onyń aıtýynsha, kvotalaý tetigi qoǵamdaǵy problemalyq jáne sezimtal máselelerdi sheshý kezinde ártúrli pikirlerdi eskerý arqyly norma shyǵarmashylyq protsesinde «qoǵamdyq kún tártibin» qalyptastyrý múmkindigin keńeıtti.

«Osy tetikti damytý úshin Memleket basshysy óziniń 2021 jylǵy Qazaqstan halqyna Joldaýynda erekshe qajettilikteri bar adamdardyń zańnamalyq qyzmette qatysý qajettiligin atap ótti. Osy tapsyrmany iske asyrý maqsatynda usynylǵan «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» Konstıtýtsııalyq zań jobasy ázirlendi. Konstıtýtsııalyq zań jobasy áıelder, 29 tolmaǵan adamdar jáne múgedek adamdar úshin 30% kvotadan basqa, olardy Parlament Májilisinde depýtattyq mandattardy bólý kezinde esepke alý qajettiligin bekitýdi kózdeıdi», - dedi Q. Mýsın.

«Usynylyp otyrǵan Konstıtýtsııalyq zań jobasy nysanaly toptarmen ártúrli alańdarda qaraldy. Jalpy alǵanda, bul túzetýler áıelderdiń, jastardyń, erekshe qajettilikteri bar adamdardyń elimizdiń zań shyǵarý organynda ókildigin keńeıtý úshin mańyzdy qadam bolyp sanalatynyn atap ótken jón. Bul zańdardyń sapasyna sózsiz áser etedi», - dedi Ádilet mınıstri.

Atap aıtqanda, zań jobasynyń erejelerin retteýdiń máni bıliktiń ókildi tarmaǵynda depýtattyq mandattardy bólýge, sondaı-aq kvotalanatyn adamdardyń tizbesine baılanysty qoǵamdyq qatynastar bolyp sanalady. Óıtkeni áıelder men jastardan basqa, múgedektigi bar adamdar úshin de mindetti kvota belgileý usynylady.


Joǵary qaraı