Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Májilis depýtaty janar-jaǵarmaı men kómir baǵasyna qatysty pikir bildirdi

2021 jyldyń 10 qarasha 2021 14:05

NUR-SULTAN. QazAqparat – Májilis depýtaty Serik Erýbaev «Aq jol» partııasy parlamenttik fraktsııasynyń depýtattyq saýalyn Úkimet basshysynyń orynbasary Roman Sklıarǵa joldap, dızel men gaz jáne kómir baǵalarynyń máselesin kóterdi, dep habarlaıdy QazAqparat tilshisi.

«Partııamyzǵa elimizdiń túkpir-túkpirinen kelip jetken avtogaz otynyń tapshylyǵy jáne onyń baǵasynyń kúrt ósýi jónindegi shaǵymdary osy depýtattyq saýalǵa negiz boldy. Buǵan deıin 50-60 teńge turatyn gaz, sońǵy kezde 120-150 teńgege deıin ulǵaıdy. Tipti, qoınaýy munaı men gazǵa toly Atyraýdyń ózinde, gazdyń baǵasy bir túnde 95 teńgeden 110 teńgege deıin ósti. Bunyń bári gaz qojaıyndarynyń qoldan istep otyrǵan isi degen sóz el aýzynda. Bıylǵy qazan aıynda dızel otynyń tapshylyǵyna jáne baǵasynyń ósýine kýá boldyq. Osy jaǵdaıǵa baılanysty, júrgizýshiler óńirlerde ereýilge de shyǵyp jatty», - dedi Serik Erýbaev Májilistiń jalpy otyrysynda.

Sonymen qatar ol qazan aıynyń sońynda avıakerosın tapshylyǵy bolǵanyn eske saldy. Kórshiles eldiń energetıka mınıstrliginiń kómegimen dızel otyny men kerosınniń máselesi ýaqytsha jabylǵan.

«Biraq, dál osy jerde «ýaqytsha» degen sózdi esten shyǵarmaýymyz kerek! Jýyrda, Memleket basshysy, munaı ónimderimen qamtamasyz etý máselesi boıynsha Úkimettiń jumysyn qatań synǵa alyp, dızel otynynyń tapshylyǵy jasandy ekendigin basa aıtty. 2017 jyly Elbasy qoldanystaǵy úsh munaı óńdeý zaýytyn jańǵyrtýmen qatar, tórtinshi zaýyt salý qajettigin atap ótken bolatyn. Alaıda, bul bastamaǵa mınıstrlik tarapynan jańa zaýyt qajet emes degen tujyrym, búgingi jaǵdaıda el ekonomıkasynyń tıimdiligine kúmándi bolyp otyr. Elimizdegi Atyraý, Pavlodar, Shymkent munaı óńdeý zaýyttaryn jańǵyrtýǵa eki trıllıon teńge jumsaldy. Endeshe, atalǵan zaýyttardyń jyl saıyn jóndeýge toqtatylýyn nemen túsindiredi?

Biraq, mınıstrliktiń jaýaby árqashan daıyn, eger, dızel otyny tapshy bolsa oǵan kórshiles elderdiń aýyr júk kólikteri kináli, al avtogaz jetpese, oǵan gazben júretin kólikter sanynyń kóbeıýi týraly syltaý aıtylady», - dedi depýtat.

Sonymen qatar ol kómirdiń de tapshylyǵyna qatysty syn aıtty.

«Mysaly, «Shubarkól» kenindegi kómirdiń tonnasy 5800 teńge bolsa, karerden satyp alýshyǵa barar jolda kómirdiń baǵasy 16 myńǵa deıin jetedi. Bundaı jaǵdaıda da defıtsıt jasandy bolyp, baǵalyq sóz baılasý faktileri rastalsa, quqyq qorǵaý organdary da syrtta qalmaýy kerek. Janar-jaǵarmaıdyń qymbattaýy transporttyq kompanııalarǵa qosa, kúndelikti taýarlardyń da baǵasynyń ósýine ákelip soqtyrady. Memleket óz tarapynan daǵdarys kezinde adal kásipkerlerden baǵany kótermeýdi árdaıym talap etýdi erejege aınaldyryp alǵandaı. Qalyptasyp otyrǵan jaǵdaıda, kásipkerlerdiń de memleketten munaı ónimderi men kómirdiń baǵasyn retteýdi talap etý oryny bar dep esepteımiz. Joǵaryda aıtylǵandy qoryta kele, «Aq jol» fraktsııasynyń usynystaryn júzege asyrý múmkindigin qaraýdy suraımyz», - dedi Serik Erýbaev.


Joǵary qaraı