Májilis konstıtýtsııaǵa engiziletin ózgeristerdi qamtıtyn zań jobasyn qaraı bastady

NUR-SULTAN. QazAqparat – Májilis konstıtýtsııalyq reforma týraly zań jobasy boıynsha jumysty bastady, dep habarlaıdy QazAqparat tilshisi.

Naqtyraq aıtsaq, Májilis «Respýblıkalyq referendým týraly» QR Konstıtýtsııalyq zańyna ózgerister men tolyqtyrý engizý týraly» QR Konstıtýtsııalyq zańynyń jobasy boıynsha qorytyndy ázirleý jóninde sheshim qabyldady.

«Negizgi maqsat – referendým kezinde qoldanylatyn bıýlletenderdi saılaý bıýlletenderimen birizdendirý. Májilistiń bir top depýtaty zań jobasyn ázirledi. Zań jobasy respýblıkalyq referendým ótkizý kezinde bıýlletenderge qoıylatyn talaptardy reglamentteıtin erejeni qamtıdy. Bul daýys berý kezinde azamattarǵa qolaıly jaǵdaı jasaıdy», - dedi Májilistiń zańnama jáne sot-quqyqtyq reforma komıtetiniń tóraǵasy Arman Qojahmetov.

Aıta keteıik búgingi Májilistiń jalpy otyrysynda Aıdos Sarym Májilistiń Halyqaralyq ister, qorǵanys jáne qaýipsizdik komıtetine aýysty.